eish1_tsw_focuson

Ka fa Wellness e ka go thusang ka gone

Fa o tlelwa ke mathata a botshelo - kwa tirong kgotsa kwa gae - Lefapha la Wellness la YBB le teng go go thusa go okobatsa manokonoko a mathata ao ka lenaneo la lone.

eish! E ile ya botsa mankgemogolo wa tsa pholo le wa Wellness e leng Bonita Maboeta go re bolelela go le gontsi ka kemonokeng ya seporofešenale e ba nang le yone.

P: Lenaaneo leno la kemonokeng ke la setlamo sefe?

K: Lenaneo la rona le etelelwa pele ke setlamo sa Life Employee Health Solutions (Life EHS).

P: Go tla tlamelwa ka thuso ya mofuta ofe?

K: Go na le kgakololo ya seporofešenale le kemonokeng mo dikarolong di le tharo tsa konokono:

Dikgang tse di amang tlhaloganyo le loago
Ditšhelete
Dikgang tsa semolao

(Tobetsa mo dikhutlonnetsepeng tse di mmala wa namune mo godimo ga athikele go buisa go feta ka ga ditirelo.)

P: Ke eng fa lenaneo leno e le le le kgethegileng?

K: Ga le duelelwe, le direlwa mo sephiring mme fa o na le bothata jo bo masisi, o leletsa Senthara ya Tlhokomelo bosigo kgotsa motshegare, malatsi a le supa mo bekeng, gore ba go thuse ka puo e o tlhophang go thuswa ka yone. Nomoro ya mahala ya mogala (ya mahala fa o letsa ka mogala wa mo ntlong) ke 0800 213 149.

Gape o ka tlhomamisega gore bagakolodi le bakhanselara botlhe ba tshwanelega sentle ka tsela e e lekaneng e bile ba na le maitemogelo le gore, moo go tlhokegang gone, ba na le dilaesense tse di tshwanetseng e bile ba kwadisitswe kwa makgotleng a bone a semolao.

Mo godimo ga moo, go na le thuso e e newang ba ba tlhokomelwang ke wena.

P: Ke ka fitlhelela jang tirelo eno?

K: O ka dirisa mongwe wa mekgwa e e latelang:

Fa go tlhagile masetlapelo, o ka leletsa nomore ya mahala ya diura di le 24 (0800 213 149).
Mo dikaing tse dingwe, romela leina la gago ka SMS (ka R1, 50 SMS ka nngwe) kwa nomoreng ya 31581 nako nngwe le nngwe, mme Senthara ya Tlhokomelo e tla go leletsa mogala.
Gape o ka romela imeile kwa atereseng ya NWU@lifehealthcare.co.za gore o sidilwe maikutlo ka imeile.
Thuso e nngwe e e fitlhelesegang motlhofo ka inthanete ke app e o ka e laisololelang mo seleng ya gago gore o kgone go dira peelanonako. (Tsena mo Google Play Store kgotsa mo Apple Store, batla Life EHS o bo o latelela ditaelo.)

P: Go dirwang fa kgang e e amang tlhaloganyo le loago e sa kgone go rarabololwa ka founo?

K: Mosidila-maikutlo o tla ikgolaganya le wena go dira peelanonako ya gore o kopane le motho yo o tla go sidilang maikutlo lo lebane difatlhego mo toropong ya gaeno. Ba o ba tlhokomelang le bone ba ka kgona go newa thuso eno. Ka sekai, ngwana wa gago a ka ya go bona motho yo o sidilang ba bangwe maikutlo kwa toropong e motho yoo a nnang kwa go yone.

P: A o tlile go bolelela mmenejara wa me gore ke kopile kgakololo kgotsa ke sidilwa maikutlo?

K: Nnyaa le e seng. Go dirisa lenaneo la rona ga go kitla go tsenya tiro ya gago mo kotsing kgotsa go tlhatlosiwa ga gago maemo mo tirong. Bagakolodi botlhe ba rona ba ikobela melao e e gagametseng ya boitshwaro ya go sa senole motho ope ka leina yo o dirisang tirelo ya rona.

P: Tshwaelo ya gago ya bofelo ke efe?

K: Nako nngwe mo matshelong a rona, rotlhe re lebana le mathata a rona ka borona kgotsa a tiro. Pele o iphitlhela o le mo boemong jo bo sa laolesegeng, batla tshegetso ya seporofešenale. Re fano go go thusa.

MATHATA A A AMANG TLHALOGANYO LE LOAGO

DITŠHELETE

DIKGANG TSA SEMOLAO

DINTLHA TSE DINGWE TSE DI THUSANG

Mathata a a amang
tlhaloganyo le loago

Lenaneo leno le tlamela maloko a badiri le ba malapa a bone ka tshegetso e e kgethegileng ka gonne ba ka nna ba nna le maemo a a latelang:

Mathata a maikutlo le a mmele
Matshwenyego a lelapa le a dikamano le ba bangwe
Bojalwa, diritibatsi kgotsa go betšha go feta selekanyo
Go tshwenyega thata mo tlhaloganyong le diphetogo tsa botshelo
Mathata a tiro ya boitshediso
Tirisodikgoka kgatlhanong le basadi
Tirisodikgoka le manokonoko
HIV/Aids
Matshwenyego ka pholo ka kakaretso
Khutsafalo le go swelwa
Dikgang tse di amanang le tiro

Ditšhelete

O ka kgona go newa kaelo le tshegetso ka dikgang tseno:

Kgakololo ka dikoloto
Go kgona dikoloto
Tekanyetsokabo ya Madi
Go tsenngwa mo lenaaneng le batho ba ba palelwang ke go duela dikoloto
Go rulaganyetsa go rola tiro
Kadimomadi
Dipeeletsomadi

Dikgang tsa semolao

Ditirelo tsa seporofešenale tsa kemonokeng ya semolao di dirwa ka go lelediwa mogala fa o tseelwa dikgato tsa semolao tse di jaaka:

Makwalo a semolao a a batlang tuelo
Dikoloto tse di iseng di duelwe
Tlhalo
Tshwanelo ya semolao ya go tlhokomela bana
Mathata a ditleleimi tse dinnye
Mekgwatsamaiso ya puso
Matshwenyego a mangwe ka tsa semolao

Tirelo eno gape e ka dira gore o nne le dikonteraka tsa semolao, tse di akaretsang:

Wili ya gago ya bofelo le tesetamente
Maatla a ramolao
Khiro ya bonno
Thekiso ya dilo tse di jaaka koloi

Dintlha tse dingwe tse di thusang

(Tobetsa segoke se se fa godimo go buisa go ya pele.)

Palo ya go lediwa ga megala ya go kopa tshidilomaikutlo ga e a lekanyediwa.
Fa o na le bothata bongwe jo bo kgethegileng, o ka kgona go kopana le motho lo lebane difatlhego go ya go fitlha go makgetlo a ka nna robedi, mme a tshwanetse go dirisiwa mo lobakeng lwa dikgwedi di le tharo. Fa o batla go sidilwa maikutlo ka ntlha ya bothata bongwe, o ka newa makgetlo a mangwe gape a le robedi.
Tlhomamisa gore ba o ba tlhokomelang mmogo le maloko a gago a badiri ba na le nomore ya diura di le 24, fa go ka direga gore ba tlhoke thuso. Tirelo eno e ka newa le batho ba ba dirang mo ga gago. Ka sekai, fa go direga gore lo tshwarwe poo kwa gae, motlhokomedi wa ngwana wa gago kgotsa mothusi wa gago wa mo gae/motlhokomedi wa tshingwana ya gago le bone ba ka kopa thuso ya go itshokela manokonoko ano.
YBB e neilwe nomore e e kgethegileng ya mahala ya mogala. Fa baarabi megala eno ba e araba, ba tla itse gore o letsa o le mo yunibesiting.
Boikaelelo jwa ditirelo tsa semolao le tsa ditšhelete ke go ema batho nokeng le go ba naya kgakololo. Ka sekai, o tla newa kgakololo ka tsa ditšhelete kgotsa ka dikgang tsa semolao, mme ga o kitla o newa kadimomadi kgotsa go nna le moemedi kwa kgotlatshekelong.
Ditirelo tseno ke tsa go ithaopa. Mmenejara wa gago o tla go rotloetsa gore o tseye karolo mo go tsone, mme ga a kitla a go pateletsa go dira jalo.
Go na le Phothale ya Wellness e mo go yone o ka buisang diathikele tse di farologaneng ka ga pholo le botsogo jo bo siameng. Di kwadilwe ke baporofešenale e bile di tlhabololwa gangwe le gape.

Fa o ikwadisa mo saeteng eno, o ka itirela porofaele ya gago ya pholo le ya botsogo jo bo siameng, o dirisa tshedimosetso e o e boneng ka nako ya go tlhatlhobiwa pholo le botsogo ka nako ya malatsi a YBB a Wellness.

X

TSEPA

GO

DITENG