“Ek het geskryf oor dit wat ons voel as ons liefhet. Hoe ouer ek word, hoe meer doen ek introspeksie. Om dieper te delf en daaroor te skryf, is nie net terapeuties nie, maar verskaf ook nuwe wysheid om ’n beter lewe te leef,” sê Jako.

 

Sy liefde vir musiek kom van ver af. Jako het in Springs grootgeword en aan die Hoërskool Hugenote gematrikuleer. Hy het musiek geskryf vir al die musiekgroepe waarvan hy in sy hoërskooljare deel was. Hy het ook ’n groot belangstelling in drama getoon.

 

Nadat hy in 2009 sy BA Regte-graad aan die NWU voltooi het, het hy sy nagraadse onderwysdiploma verwerf.

 

Hy het met sy gesamentlike kennis van die reg en onderwys in 2011 strafreg- en handelsregmodules in die Suid-Afrikaanse Nasionale Weermag onderrig.

 

Sy eerste liefde

 

“Die kunste was egter nog altyd my passie en eerste liefde,” sê Jako, en voeg by dat om musiek te skryf sy manier is om sy ware doel te bereik.

Jako woon tans in Pretoria en, getrou aan sy eerste liefde, is hy ’n vryskutter wat oudisies bywoon en musiek skryf.

 

Hy is die hoofsanger in twee musiekgroepe, Moses Metro Man en Die Rottweilers, maar Moses Metro Man vat op die oomblik ’n blaaskans, wat vir Jako meer tyd gee om op Middernag Kantoor te fokus.

 

Hoewel dit nie heeltemal die rock-album is wat sy aanhangers verwag het nie, is daar drie rock-liedjies in, maar dit is rustiger en meer ontspanne as sy vroeëre musiek en gee ’n ander kant van homself weer.

 

’n Veelsydige kunstenaar

 

Musiek is nie Jako se enigste forte nie. Benewens dat hy ’n talentvolle musikant en liedjieskrywer is, is hy is ook ’n gesoute akteur.

 

Hy was in 2005 en 2006 ’n lid van die groep Flip A Coin, en het later opgetree in die teaterproduksie Die Wyndigters, wat oorspronklike musiek en gedigte met ’n wynproe gekombineer het.

 

Toe het die TV-kassie geroep. Hy het in 2018 vir ’n kort rukkie ’n rol in die Suid-Afrikaanse sepie Generations gehad, en ook ’n verskyning in 7de Laan gemaak, waar hy die rol van Barry Loots vertolk het. Daarbenewens was Jako ook deel van die TV-reekse Donkerland en Bloedbroers.

 

Hy sê al het al die mense wat hy tydens sy loopbaan as akteur ontmoet het, het ’n groot invloed op hom gehad, was die hoogtepunt toe hy in 2011 saam met die akteur en toneelskrywer Deon Opperman aan Deon se musiekblyspel Tree Aan gewerk het.

 

Wanneer hy nie toneelspeel of musiek maak nie, geniet Jako dit om tyd saam met sy verloofde, Inge Daneel, en sy twee budgies deur te bring. Hy geniet dit ook om te reis.