“Die nuwe gebou is 'n baken vir die opleiding van aptekers in Suid-Afrika en, aangesien ons van die beste farmasiedosente in die land het, is dit die plek waar studente in aptekerswese hul drome kan verwesenlik deur gehalte-onderrig te ontvang.”
So het die dekaan van die Fakulteit Gesondheidswetenskappe, prof Awie Kotzé, gesê tydens die opening van Farmasie en Biologiese Wetenskappe se nuwe gebou (G23) op die Potchefstroomkampus.
Die een vleuel van die gebou huisves tans die Skool vir Farmasie, wat vier vloere in beslag neem. Die kantoor van die direkteur, prof Sandra van Dyk, en die kantoor van die voorgraadse programbestuurder, die nagraadse kantoor (MUSA), en 'n konferensielokaal is op die grondvloer.
'n Kliniese Farmasie-groep en ʼn simulasielaboratorium neem die eerste vloer in beslag. Op die tweede vloer is Farmasiepraktyk en vier kleiner lesinglokale, en op die derde vloer Farmakologie en nog 'n laboratorium.
Die vleuel waarin Biologiese Wetenskappe (Fakulteit Natuurwetenskappe) gehuisves gaan word, is nog nie voltooi nie. Tenders vir die installering van kantore en laboratoriums is eers onlangs aangevra. Hierdie installeringskoste sal ongeveer R50 miljoen beloop.
Die visekanselier van die NWU, prof Dan Kgwadi, knip die seremoniële lint van die nuwe G23-gebou op die Potchefstroomkampus terwyl die hoofdirekteur vir fisiese infrastruktuur en beplanning, mnr Joep Joubert (links), en die dekaan van die Fakulteit Gesondheidswetenskappe, prof Awie Kotzé, toekyk.
KLIK OM AF TE BEWEEG
Die nuwe gebou verskaf moderne fasiliteite en 'n verbeterde leeromgewing waar die toekoms en loopbane van farmasiestudente geslyp kan word.
KLIK OM MEER TE LEES
TERUG
Daar is al in 2011 met die beplanning van die gebou begin, en na afloop van onderhandelinge om 10 erwe op kampus te konsolideer om sodoende 9 400 m² beskikbaar te maak, is daar in 2013 met die sloping van huise begin.
Mnr Fanie Fourie, projekkoördineerder, sê daar is 1,2 miljoen stene (genoeg vir 26 mediumgrootte huise) en 670 ton staalwapening in die beton gebruik in die oprigting van die gebou. “In die eerste vier maande van die bouproses het daar sowat 390 mm reën geval.”
Mnr Joep Joubert, hoofdirekteur vir fisiese infrastruktuur en beplanning, sê hulle het 30 maande gelede aan 225 projekte ter waarde van ongeveer R663 miljoen op die NWU se kampusse gewerk, waarvan 10 groot projekte soos G23 was.
<
>
