Sceletium tortuosum of “kougoed” is deur die eeue deur die Khoisan vir geestesgesondheidskwessies gebruik.
KLIK OP DIE ILLUSTRASIE OM MEER TE LEES.
Die maroelavrug is een van Afrika se inheemse vrugte wat vir voedselsekerheid oorweeg behoort te word. Die maroela (Sclerocarya birrea) word in Niger, Burkina Faso, Benin en Suid-Afrika aangetref.
KLIK OP DIE ILLUSTRASIE OM MEER TE LEES.
Trouens, die universiteit – deur middel van ons Sentrum vir Inheemse Kennisstelsels (IKS-sentrum) – word beskou as ’n baanbreker in Suid-Afrika vir inheemse kennisstelsels van Afrika.
Ons inter- en multidissiplinêre IKS-sentrum is onder meer betrokke by gebiede wat strek van astronomie en gesondheidstelsels tot landbou en tegnologie. Die voordele van inheemse plante is een van die vrugbaarste studiegebiede wat daar is.
Dr Abiodun Olusola Omotayo, ’n navorser by die navorsingsnisarea Voedselsekerheid en Veiligheid, ondersoek hoe Afrika se inheemse vrugte gebruik kan word om voedselsekerheid te bevorder.
Die moontlikheid dat ’n sekere inheemse plant gebruik kan word om depressie te behandel, is die navorsingsbelangstelling van ’n ander NWU-kundige, dr Makhotso Lekhooa, ’n senior lektor by die DST/NWU Prekliniese Geneesmiddelontwikkelingsplatform (PKGOP).
Die magdom inheemse kennis wat gehelp het om ons voorgeslagte vir eeue lank te voed en te genees, word deur die NWU as baie waardevol beskou.
Hierdie plant kan depressie in die kiem smoor
Makhotso is besig om die moontlikheid te ondersoek dat ’n inheemse plant, Sceletium tortuosum, gebruik kan word om depressie te behandel.
Sy verduidelik dat dit deur die eeue heen deur die Khoisan gebruik is om stres en angs te verlig, ’n mens se gemoedstemming te verbeter en konsentrasie te bevorder.
Makhotso sê talle plante in Afrika wat vir geestesgesondheidskwessies gebruik kan word – insluitende die Sceletium tortuosum – kort goeie wetenskaplike bewyse om aansprake oor hulle medisinale waarde te ondersteun. Sy is besig om dit te probeer verander. “Ek het in my navorsingstudie ’n generiese rotmodel van depressie gebruik om die verskillende dosisse van Sceletium tortuosum as óf ’n monoterapie en/óf ’n aanvullende terapie by huidige antidepressante te evalueer, en het gedrags- sowel as biologiese merkers ondersoek.”
Die resultate wat uit haar navorsing voortspruit, sal aandui of dit van nut kan wees vir die behandeling van depressie.
Die verskaffing van wetenskaplike bewyse vir die veiligheid en doeltreffendheid van medisinale plante is in ooreenstemming met die Wêreldgesondheidsorganisasie (WGO) se strategie vir tradisionele medisyne vir 2014-2023.
Makhotso se navorsing is ook baie relevant, aangesien die WGO aandui dat 4,4% van die wêreldbevolking aan depressie ly, terwyl hierdie persentasie in Suid-Afrika 4,6% is. (As jy graag die hele artikel oor Makhotso se studie wil lees, klik hier.)
“Die Covid-19-pandemie het ’n baie nadelige uitwerking op die gesondheid en ekonomie van die wêreld, en as sodanig word daar verwag dat die voorkoms van depressie sal toeneem,” sê dr Makhotso Lekhooa. Sy het die moontlikheid ondersoek om Sceletium tortuosum of “kougoed” vir die behandeling van depressie te gebruik.
Navorsing dra vrug
Dr Abiodun Olusola Omotayo, ’n navorser van die navorsingsnisarea Voedselsekerheid en Veiligheid, sê toekomstige voedselsekerheid op die Afrika-vasteland kan van die onontginde potensiaal van inheemse vrugtebome afhang.
Olusola het saam met prof Adeyemi Oladapo Aremu, ook van Voedselsekerheid en Veiligheid, ’n referaat in die hoë-impak-vaktydskrif Food and Energy Security gepubliseer. Die artikel kyk na die voordele van Afrika se inheemse vrugte en waarom dit vir voedselsekerheid oorweeg moet word.
Olusola sê een van die unieke eienskappe van inheemse vrugtebome is hulle vermoë om noodsaaklike voedingstowwe te verskaf wat moontlik skaars kan wees in ander voedselbronne. Hulle is ook natuurlik aangepas by die plaaslike grond en klimaat, en weerstaan dikwels stressors uit die omgewing beter as uitheemse spesies of dié wat ingevoer is.
Die studie het op 10 geselekteerde vrugtebome in verskillende streke van Afrika gefokus. Onder hulle is die Afrika-kremetartboom, die Transvaalse rooimelkhout, die wilde lukwart, keiappel en grysappel, en die maroela.
“Ons het ’n ryk fitochemiese en voedingsryke inhoud regoor die geselekteerde inheemse vrugtebome gevind, asook vesel, minerale, koolhidrate, organiese sure, vette, proteïene, yster, kalsium, magnesium, natrium, sink en vitamines,” sê hy.
“Vrugte van hierdie bome het ook anti-oksidant-, antimikrobiese en anti-inflammatoriese eienskappe getoon.” (Klik hier om meer oor sy navorsing te lees.)