“Whatever good things we build end up building us.”
Hierdie aanhaling van Jim Rohn, die Amerikaanse entrepreneur, skrywer en motiveringspreker, is waar vir die NWU se bou- en infrastruktuurprojekte wat inderdaad daarop gemik is om die personeel en studente te bemagtig en op te bou.
Ons kyk in hierdie artikel na ’n paar van die bouprojekte op die drie kampusse.
Bou steen vir steen aan die toekoms
“Whatever good things we build end up building us.”
Jim Rohn
Projekte op pad
- Die opgradering in fases van die Base Building, bestaande uit lesinglokale, rekenaarkamers en kantore. (Die eerste fase is byna voltooi.)
- Die opgradering van die Sentrale Lesinggebou in verskillende fases sodat lesings nie onderbreek word nie.
- ’n Bykomende parkeerarea (vir nagraadse behuising, die biblioteek en naburige geboue) teen ’n koste van R2,4 miljoen. Bouwerk sal tydens die wintermaande plaasvind.
- Die hervestiging van die NWU Besigheidskool en die verskaffing van ruimte vir die nuwe Eenheid vir Voortgesette Opleiding. Die beplanning van hierdie R8,5 miljoen-projek het in Maart 2018 begin, en na verwagting sal die ruimte aan die begin van 2019 beskikbaar wees.
- Vergrote studenteraadskantore, waarvoor die begroting
R1,5 miljoen is. Die ondersoek het in Februarie 2018 begin.
- Ontwikkeling van ’n veeldoelige fasiliteit met die oog op studente
se sosiale lewe, teen ’n koste van R3,5 miljoen, en die oprigting van ʼn nuwe ontspanningsfasiliteit vir studente teen ’n koste van
R2,5 miljoen. Beplanning vir die projek begin in Mei 2018.
Dit is die ingang na die nuwe gebou vir die Fakulteit Regte op die NWU se kampus in Mahikeng.
Verbeterings gaan
volstoom voort
Julle het dalk gesien dat nuwe geboue opgerig word en ander opknappings-
en instandhoudingsprojekte regoor die kampus in Mahikeng onderneem word.
Personeel het reeds in hulle splinternuwe kantore in die nuwe gebou van die Fakulteit Regte ingetrek. Personeellede het ook begin om die kantore te betrek in die administrasiegebou, wat opgeknap is nadat dit tydens die studente-onrus van 2016 aan die brand gesteek is. Die opgeknapte gebou spog ook met nuwe lesinglokale.
Ander projekte wat onlangs begin is, is die opgradering van die geplaveide paadjies, nuwe studentebehuising, en die instandhouding van die water- en rioolinfrastruktuur.
Twee projekte, die opgradering van omheinings en die oprig van ’n varkboerdery, word ook op die Molelwane-plaas in die vooruitsig gestel. Beplanning sal begin sodra ’n omgewingsimpakstudie gedoen is en die groen lig gegee word.
Groot instandhoudingsprogramme sluit die opknapping van die Kayalitsha-koshuis in, en geskied in fases. Die derde fase is tans aan die gang.
Mahikeng
Beweeg oor die sirkels hierbo om oor elke kampus se bouprojekte te lees.
Projekte op pad
- Werk aan die Beroepshigiëne-fasiliteit van R9,8 miljoen vorder.
- Konsolidering van die Hoëprestasie-instituut se sentrum en addisionele ruimte vir die Skool vir Biokinetika, Sport en Rekreasie, onderhewig aan die beskikbaarheid van grond. Beplanning begin in Junie 2018.
- By gebou G23 is beplanning aan die gang vir die gedeeltelike opknapping van die tweede vloer teen ’n koste van R4,2 miljoen.
- By die Fakulteit Ingenieurswese is beplanning aan die gang vir nuwe dienste-infrastruktuur en paaie om ’n navorsing- en innovasie-fasiliteit teen ’n koste van R2,6 miljoen te akkommodeer.
- Beplanning begin in April 2018 vir fase 1 van die reservoir en noodwaterverspreidingsprojek van R4 miljoen.
Hierdie kerk wat die universiteit gekoop het – net buite die Presidentstraathek van die kampus in Potchefstroom – is as lesinglokale opgeknap.
Uitbreiding staan voorop
Op die kampus in Potchefstroom het die Oosterhof-koshuis onlangs teen ’n koste van R10,9 miljoen ’n totale nuwe voorkoms gekry.
Verskillende ruimtes is vir die Eenheid vir Oop Afstandsleer (EOAL) verskaf. Net buite die Presidentstraathek is die kerk wat die universiteit onlangs gekoop het, teen ’n koste van R9,8 miljoen opgeknap om vir twee lesinglokale vir die EOAL voorsiening te maak. Die B6-gebou se bestaande ruimtes is ook vir hulle opgeknap nadat die projek op kort kennisgewing geïnisieer en voltooi is.
Twee ander projekte wat beplan word, is die opknapping van die ruimte vir die sentrale toelatingskantoor in gebou F20, en die instandhouding van Cachetpark, hoofsaaklik ten opsigte van omheinings, naamborde en die parkeerarea.
Groot instandhoudings- en opgraderingsprojekte wat tans aan die gang is, sluit werk aan die Oppirif- en Kom en Gaan-koshuis in, asook die Perskor-gebou vir Kommunikasiestudies en die Heimat-gebou.
Ander projekte wat op pad is, is planne om die sintetiese areas by die hokkie-akademie se sportveld en baan te vervang.
Potchefstroom
Beweeg oor die sirkels hierbo om oor elke kampus se bouprojekte te lees.
Projekte op pad
- Kampusvereistes word bevestig vir ’n administrasiegebou van R39,4 miljoen.
- Bykomende ruimte word vir Gesondheidswetenskappe beplan, waaronder die gebruik van onderbenutte ruimtes op die kampus teen ’n koste van R14,5 miljoen. Die projek behoort teen Maart 2019 gereed te wees vir gebruik.
- Beplanning vir fase 1 van die oprigting van ’n nuwe lesinglokaalkompleks teen ’n koste van R18,8 miljoen het in Maart begin, en die konstruksiewerk sal in
Julie 2018 begin.
Na verwagting sal dit agt maande duur om die konstruksie te voltooi as ’n baie streng skedule gevolg word.
Die groot gebou in die voorgrond is die huidige administrasiegebou, wat in ’n saal vir funksies omskep sal word. Die idee is om dit aan die geboue langsaan te verbind, waar spysenieringsdienste, konferensiegeriewe en kleedkamers gehuisves sal word.
’n Groot saal op die walle
van die Vaal?
Daar is ’n groot behoefte op die kampus in Vanderbijlpark aan ’n saal vir gradeplegtighede en ander studenteverwante gebeurtenisse.
Gebou 24, die administrasiesentrum van die kampus, sou ideaal wees vir sulke geleenthede, maar om dit vir hierdie doel te gebruik, sou beteken dat die kollegas van die Student Akademiese Lewensiklus Administrasie, Finansies, en die kantoor van die adjunk-visekanselier sal moet skuif.
Dit kan egter ’n goeie idee wees om die administratiewe funksie na ’n gebou nader aan die hoofhek te verskuif, wat toegang vir voornemende studente sal vergemaklik. Besprekings is aan die gang om ’n splinternuwe administrasiefasiliteit nader aan die hek te bou en gebou 24 as ’n groot saal op die pragtige walle van die Vaalrivier te benut.
Die kampus sien ook uit na die voltooiing van die bouprojek wat deur die Departement van Hoër Onderwys en Opleiding befonds word, en wat die kampus in staat sal stel om ’n bykomende 256 studente te huisves. Die nuwe gebou sluit ’n koshuissaal en toesighouerskwartiere in. Die datum vir die voltooiing van hierdie projek is Junie 2019.
Vanderbijlpark
Beweeg oor die sirkels hierbo om oor elke kampus se bouprojekte te lees.
M
P
V