NWU ondersteun meertaligheid met gratis speltoetser
Dit is nie aldag dat mens iets verniet kry nie en wanneer dit boonop ’n nuttige hulpmiddel is om suksesvol te kommunikeer is dié geskenk net soveel meer kosbaar. Die NWU se Sentrum vir Tekstegnologie (CTexT®) het onlangs aangekondig dat hul Afrikataal-speltoetspakket voortaan gratis aan personeel en studente vir gebruik regoor die NWU beskikbaar gestel word.
Personeel en studente van die NWU is lank reeds vertroud met CTexT® se uitstekende Afrikaanse speltoetser, Afrikaanse SkryfGoed en nou kan hulle ook die Afrikataal-speltoetspakket wat speltoetsers en woordafbrekers vir nege Afrikatale insluit, gebruik om seker te maak dat die regte taalgebruik en spelling van woorde hul harde werk komplementeer.
“Dis wonderlike nuus, veral in die lig van die taak wat die Departement van Hoër Onderwys en Opleiding aan universiteite opgelê het om Afrikatale as akademiese tale te bevorder. Met die NWU se meertalige taalbeleid voorsien ons dat Setswana op die kampusse in Mahikeng en Potchefstroom en Setsotho op die kampus in Vanderbijlpark meer prominente rolle sal speel. Die speltoetsers gaan vir baie meer mense noodsaaklik word,” sê Johan Blaauw, direkteur van die NWU se Taaldirektoraat.
Hy sê ’n groot voordeel van die gratis speltoetser is dat dit ook sal help om die spelling van woorde oor kampusse heen te standaardiseer en so korrekte taalgebruik sal bevorder.
Johan Zerwick, taalpraktisyn vir Setswana by die Taaldirektoraat, het die bal aan die rol gesit toe hy aanvanklik navraag gedoen het oor hoekom slegs die Afrikaanse SkryfGoed gratis vir personeel en studente beskikbaar was.
“Ek het ’n nuwe rekenaar by die werk gekry en wou graag die Setswana-speltoetser wat ek ’n ruk gelede aangekoop het ook daarop laai. Die kommersiële lisensie was net vir een rekenaar geldig. Dit het beteken dat ek dit weer sou moes aankoop. Ek het gevoel dis onregverdig, omdat ek die speltoetser uitsluitlik vir werk gebruik en Afrikataalsprekende personeel en studente dus nie dieselfde voordeel as die Afrikaanse gebruikers geniet het nie.”
Hy het sy navraag na CTexT®, wat die Afrikataal-speltoetser in samewerking met Microsoft ontwikkel het, se personeel gestuur en hulle het dadelik al die moontlikhede begin ondersoek om die pakket ook gratis aan NWU-personeel en -studente te verskaf.
Dr Martin Puttkamer, hoof van CTexT®, sê personeel en studente kan nou die pakket regoor die NWU aflaai, installeer en gebruik.
Hy sê die langtermyndoelwit is om die Afrikataal-speltoetsers ook gratis aan skole beskikbaar te stel. Dit sal egter eers gedoen kan word sodra hulle die nodige befondsing vir die insetkoste en die ondersteuning wat benodig gaan word, kry.
Die pakket is by die IT-hulplyn beskikbaar en sal voortaan deel wees van die NWU-opstelling wat standaard op alle rekenaars gelaai word.
Gratis speltoetser
Waar die idee vandaan kom
CTexT® is ’n navorsing- en ontwikkelingsentrum op die NWU se kampus in Potchefstroom. Die sentrum doen navorsing in taaltegnologie en ontwikkel taaltegnologieprodukte vir die Suid-Afrikaanse tale. CTexT® fokus op die ontwikkeling van toepassings en hulpbronne vir makliker interaksie tussen mense en rekenaars en innoverende benaderings tot die verwerking van natuurlike taal.
Meer oor CTexT®
KLIK OM MEER TE LEES