Mop Rose Hayeshi, moporofesa-mmogo wa Porokeramo ya Go Tlhama Diokobatsi le Go Dira Patlisiso ka Tsone Pele di Lekelediwa, o dira ka motšhini o montšha.
Phitlhelelo e ntšha ya motšhini mo go tsa kalafi
Porokeramo ya Go Tlhama Diokobatsi le Go Dira Patlisiso ka Tsone Pele di Lekelediwa ya YBB (Preclinical Drug Development Platform [PCDDP]) mo Khamphaseng ya Potchefstroom jaanong e dirisa thekenoloji ya maemo a a kwa godimo ya go fokotsa lobaka lwa go fola ga molwetse le go akofisa mokgwa o moša wa go tlhamo ya diokobatsi.
Bošeng jaana PCDDP e ne ya reka motšhini o o kgonang go tlatsa dipilisi tsa dikgapetla tse di thata ka seedi kgotsa ka jele le go di tswala. Seno se fetola thata tsela e PCDDP e dirang ka yone, ka gonne motšhini ono o khutshwafatsa thata thulaganyo ya go tlhama diokobatsi tse diša.
Go ya ka Mop Anne Grobler, mokaedi wa porokeramo eno, phitlhelelo e ntšha eno ya thekenoloji ke ya ntlha mo kontinenteng ya Aforika. "YBB ke nngwe ya diyunibesiti di le mmalwa mo lefatsheng ka bophara e e nang le phitlhelelo ya thekenoloji eno.
Motšhini wa CFS1200 o tlhamilwe ke setlamo sa boditšhabatšhaba sa Capsugel mme o fetotswe gore o kgone go dira mo Aforikaborwa.
Ka fa o dirang ka gone
Anne a re mmele wa motho o monya ka bonako seedi se se tsenngwang mo go one, mme seno se oketsa go atlega ga diokobatsi e bile go akofisa go fola ga molwetse. "Ka go tlhama mekgwa ya go tsenya seedi mo mmeleng, gape se kgona go tsenngwa ka dipilisi tsa dikgapetla.'
A re motšhini o tla ka ditšhono tse dintšha. "Phitlhelelo fano ke gore dimolekhule tse di fodisang motho tse pele di neng di sa kgone go tsenngwa ka katlego ka go nowa e le tekanyetsomolemo jaanong di kgona go newa motho ka sebopego sa dipilisi tsa dikgapetla."
Mop Anne Grobler, mokaedi wa porokeramo, a re motšhini ono wa dimilione-milione tsa diranta jaanong o dira gore banetetshi ba YBB ba dire tiro e pele ba neng ba sa kgone go e dira. Fano o na le Ngaka Philippe Peter, tlhogo ya porojeke ya Capsugel.
Motšhini ono o tswa kae?
Anne a re go ne ga tshwarwa ditherisano dingwaga di le nne tse di fetileng le Capsugel, e leng setlamo sa boditšhabatšhaba se se eteletseng pele mo tirong ya go dira metswako ya ditekanyetsomolemo tsa go bona gore motšhini wa CFS1200 o ne o ka fetolwa jang gore o kgone go tlhama difomula tsa Aforikaborwa tsa diokobatsi.
Thekenoloji e ntšha eno ya go tlhagisa melemo ya kalafi e ne ya tshegediwa ka madi ke dikgwebo le ke puso. Tlhwatlhwa ya motšhini ono ke diranta di le dimilione.
Sa botlhokwa mo go tlhameng diokobatsi – ke gore mmele wa motho o monye seedi ka katlego le go feta. Go naya balwetse diokobatsi tsa diedi go oketsa go atlega ga diokobatsi e bile go akofisa go fola ga molwetse.
Phitlhelelo eno e tlisa katlego
YBB e setse e thusitse kwa dinageng di sele ka go tlhama mokgwa o o tlhomologileng o o nang le tshwanelo ya semolao wa go tsenya seedi sa kalafi mo mmeleng wa motho. Mokgwa ono o bidiwa mokgwa wa Pheroid.
Go dirisa mofuta wa seedi seno, banetetshi ba YBB ba tlhamile difomula tsa ditlhopha di le robedi tsa molemo wa kalafi Mo nakong e e fetileng dipilisi tsa dikgapetla di ne di tladiwa ka seatla, jaanong tiro eno e dirwa ke motšhini, go fokotsa diphoso tse di dirwang ke motho le kgonego ya go kgotlhelesega ga molemo wa kalafi.
"Motšhino ono o tla tokafatsa boleng jwa botshelo jwa batho ba le bantsi," go bolela jalo Anne.
Go bona tshedimosetso go ya pele, etela webosaete ya PCDDP mo atereseng ya www.nwu.ac.za/pcddp le webosaete ya Capsugel mo atereseng ya www.capsugel.com.
Tobetsa ditalama go buisa go feta