Dit is hierdie jaar die agtste keer dat hierdie program met sy groot impak deur die NWU se Ondernemingsontwikkelingsentrum (bhive EDC) aangebied en vroue-entrepreneurs – ook bekend as fempreneurs – regoor die universiteit se geografiese voetspoor bemagtig word.

 

Een van die program se alumna, Kekeletso Tsiloane, het onlangs die nasionale hoofopskrifte gehaal toe sy tweede was in die SAB Stigting se jaarlikse maatskaplike innovasietoekennings.

 

Bou ’n skoner toekoms

 

Haar maatskappy, Ramtsilo Manufacturing and Construction, het ’n kontantinspuiting van R900 000 vir hulle PlastiBrick-uitvinding gekry.

 

PlastiBrick gebruik herwonne plastiek – wat van stortingsterreine, huishoudings en vullissmouse kom – om pleister- en maksistene te vervaardig wat sterk, duursaam, brandbestand en omgewingsvriendelik is. Geen water word in die vervaardiging van die stene gebruik nie, dus spaar hulle boonop water.

 

Kekeletso, wat van Sasolburg in die Vrystaat kom, het aan die 2017 EWP deelgeneem. Saam met haar suster, Kedibone, baan hulle nou die weg vir jong fempreneurs binne ’n tradisioneel mansgeoriënteerde werksomgewing.

 

Bou ’n netwerk

 

Die twee susters, wat hulle uitvinding met R5 000 begin het, het aan so veel as moontlik ontwikkelingskompetisies deelgeneem om hulle in staat te stel om hulle netwerk van enersdenkende entrepreneurs en ondernemingsbemagtigers uit te brei.

 

Hulle plan het vrugte afgewerp, aangesien hulle daarin geslaag het om befondsing van die F2019 Standard Bank Top Women se voorleggingskonferensie, die Engen Pitch and Polish-kompetisie, en nou ook die SAB Stigting se maatskaplike innovasietoekennings te kry.

 

Meer oor die EWP-program

 

Die program bemagtig beginner-entrepreneurs om nie slegs hul besigheidsdrome waar te maak nie, maar ook om aktief tot die plaaslike en nasionale ekonomie by te dra.

 

Volgens EWP-koördineerder Leonie Greyling lê die sukses van die program daarin dat dit sake-ondersteuningsdienste aan vroue lewer.

 

’n Omvattende kurrikulum help hulle om besigheidsidees en markte te identifiseer, ’n goeie besigheidsmodel te ontwikkel, en uiteindelik hulle eie beginnerondernemings suksesvol te inisieer.

 

Tydens die proses word vroue deel van ’n dinamiese portuurnetwerk, en ontvang hulle ook mentorskap van ervare entrepreneurs en NWU-akademici.

 

Vir meer inligting, stuur ’n e-pos aan incubation@nwu.ac.za, of kontak die bhive EDC by 016 910 3393.