Waarom buitestanders nie
die NWU se handelsmerke mag gebruik nie
Eish! het met ʼn senior regsadviseur van Regsdienste by die Institusionele Kantoor gesels oor die implikasies van hierdie hofbeslissing.
V: Hoekom kan ʼn persoon of groep buite die NWU nie ons geregistreerde handelsmerke – in hierdie geval PUK – gebruik nie?
A: Kragtens die gemenereg besit die NWU reeds vir dekades, selfs voor die samesmelting toe die universiteit nog die PU vir CHO was, ʼn alleen- en gevestigde reg op die gebruik van die naam PUK of PUKKE. Dit is bo en behalwe die statutêre beskerming wat ons kragtens die NWU se registrasies ingevolge die Wet op Handelsmerke geniet.
Die woorde en handelsmerke soos PUK, PUKKE, PUKKIE, PUKKI is belangrike bates van die NWU wat beskerm moet word teen ongemagtigde gebruik wat kan lei tot verwarring, misleiding en/of verwatering.
V: Geld dit vir al ons geregistreerde handelsmerke?
A: Ja. Die NWU het meer as 72 geregistreerde, beskermde handelsmerke in ten minste 140 klasse, en buite-partye en -persone word nie toegelaat om enige van hulle te gebruik sonder voorafmagtiging deur die universiteit nie.
As die NWU ʼn maatskappy was, sou niemand sy reg om sy bates te beskerm, bevraagteken het nie. As ons ʼn persoon of organisasie verbied om die name PUK of PUKKE of enige van ons ander geregistreerde handelsmerke sonder toestemming te gebruik, doen ons dit nie omdat ons verskuilde agendas of bybedoelings het nie – ons doen dit net omdat dit onwettig is.
V: Hoe kan die NWU skade ly wanneer ʼn persoon of groep buite die universiteit ons handelsmerke gebruik?
A: As buitepartye ons handelsmerke gebruik kan hulle die indruk wek dat die party, instansie of groep verbonde is aan en/of gemagtig is deur die universiteit, en dit kan tot verwarring en/of misleiding aanleiding gee.
Dit is ook nie aanvaarbaar as mense, instansies of groepe ons handelsmerke vir hul eie kommersiële gewin gebruik nie – deur byvoorbeeld voor te gee dat hulle deel is van die NWU en dan kortkursusse aan te bied nie.
Ander partye se gebruik van ons handelsmerke mag ons ook nie verhinder om die handelsmerke self te gebruik nie. (Deur die registrasie van die internetdomeinnaam www.propuk.co.za
en www.eks-n-puk.co.za het die buiteparty ons van die
reg ontneem om daardie spesifieke naam te gebruik.)
Wanneer mense of groepe ons handelsmerke te kwader trou gebruik – met ander woorde op ʼn manier wat die NWU in ʼn slegte lig stel – kan dit die waarde van die oorhoofse NWU-handelsmerk laat daal of ons goeie naam skade aandoen. Dit kan selfs tot die ontwrigting van ons besigheidsaktiwiteite lei of maak dat ons nie ons doelwitte kan bereik nie.
V: Is daar nóg organisasies wat "PUK" en/of ander NWU-handelsmerke as deel van hul name gebruik?
A: Ja, inderdaad. Mense misbruik deurlopend die NWU se belangrike bates, en die universiteit neem gereeld regstappe teen hierdie onwettige gebruik.
V: Onder watter omstandighede word persone, groepe of instansies buite die NWU wél toegelaat om ons handelsmerke te gebruik, byvoorbeeld ons logo of afkortings?
A: Hulle mag dit doen as die NWU byvoorbeeld ʼn geleentheid borg of deel is daarvan, as die NWU saam met hulle aan ʼn projek deelneem of as daar ʼn spesifieke samewerkings- en/of lisensiëringsooreenkoms, soos ʼn Memorandum van Verstandhouding, tussen hulle en die universiteit bestaan.
Die beginsels wat in die antwoorde hierbo genoem is geld steeds: daar mag geen verwarring wees oor die buiteparty se verbintenis met die NWU nie, die handelsmerk moenie te kwader trou of vir eie kommersiële gewin gebruik word nie (sonder ʼn definitiewe ooreenkoms met die NWU) en dit moenie enige van ons besigheidsbedrywighede ontwrig of inbreuk maak op ons regte om die spesifieke handelsmerk te gebruik of te registreer nie.
