Die NWU het tydens hierdie jaar se NWU Excellence Awards op 21 November 2024 met trots gemeenskapsbetrokkenheid en die uitnemende individue en hul inisiatiewe vereer.

Elkeen van hierdie projekte toon die NWU se verbintenis tot betekenisvolle, volhoubare verandering. Ons vier hierdie baanbrekers vir hulle toewyding om 'n blywende impak binne en buite ons universiteitsgemeenskap te maak.

Lemogang Masethe saam met prof Sonia Swanepoel, adjunk-visekanselier vir gemeenskapsbetrokkenheid en Mahikengkampusbedrywighede.

Engaged Teaching and Learning Award: Lemogang Masethe

Lemogang Masethe het buitengewone vaardighede getoon in die bemagtiging van studente deur 'n innoverende benadering wat bemarking en studentewerwing met onderrig integreer. Haar toewyding aan die Ikateleng-projek – 'n inisiatief wat leerders bemagtig met lewenslange vaardighede wat verder as die klaskamer strek – was instrumenteel in die toename van die slaagkoers vir B-graadstudente vanaf 58% tot 78% sedert 2019.

Ikateleng bevorder leerders se gereedheid vir die werklike wêreld, en bemagtig hulle om 'n betekenisvolle bydrae tot die samelewing te maak terwyl die NWU se strategiese doelwitte terselfdertyd ondersteun word. Onder haar leiding het Ikateleng-leerders konsekwent die nasionale gemiddeldes in individuele vakke oorskry, en talle alumni het met nagraadse studies voortgegaan.

Dr Benita Taylor saam met prof Sonia Swanepoel.

Engaged Research and Innovation Award: dr Benita Taylor

Dr Benita Taylor se Bafenyi Projek het 'n groot verskil in versorging en opvoeding in die vroeë kinderjare gemaak.

Sy werk nou saam met praktisyns in gemeenskappe met min hulpbronne en is die medeskepper van oplossings wat jong kinders se holistiese ontwikkeling bevorder.

Haar deelnemende benadering bou vertroue en bevorder volhoubare verbeterings aan die kurrikulum, vorm nasionale beleid en koester 'n meer inklusiewe opvoedkundige toekoms.

Jéan-Pierre van Deventer saam met
prof Sonia Swanepoel.

Novice Award for Engaged Research and Innovation: Jéan-Pierre van Deventer

Jéan-Pierre van Deventer se STRIDE inisiatief ontwikkel bekostigbare hulpmiddels vir individue met gestremdhede en kombineer tegnologie en uitreike om mobiliteit en onafhanklikheid te bevorder.

Sy span het IoT-ondersteunde osoonopwekkers gekommersialiseer en ontwerp innoverende toestelle soos Muscle Memory, wat help om oefenbeserings te voorkom.

Sy werk stel 'n hoë standaard vir gemeenskapsbetrokkenheids-navorsing wat bewys dat innovasie 'n werklike impak het.

Prof Janelize Morelli saam met prof Sonia Swanepoel.

Scholarship of Engagement Award:
prof Janelize Morelli

Prof Janelize Morelli bring deur die Musikhane Community Music Engagement Programme transformatiewe musiekopvoeding na minderbevoorregte gemeenskappe. Leerders verkry waardevolle fasiliteringsvaardighede, terwyl die program 'n bydrae tot sosiale kohesie en kultuuruitruiling lewer.

Die program bevorder die belangrike Volhoubare Ontwikkelingsdoelwitte van die Verenigde Nasies, insluitende die van Gehalte-onderwys en Geslagsgelykheid, deur vroulike leerders te bemagtig en ongelykheid ten opsigte van toegang tot die kunste te verminder.

Bathandekile Myeni saam met prof Sonia Swanepoel.

Discipline-Based Outreach Award: Bathandekile Myeni

Bathandekile Myeni lei die voedselbank van die NWU se Skool vir Musiek en pak voedselonsekerheid by studente by die horings.

Sy werk saam met organisasies soos Shoprite en die Mookodi-stigting en verseker dat studente die voeding het wat hulle nodig het om akademies en musikaal te presteer.

Haar pogings het die gemeenskap verenig en 'n rimpeleffek van positiewe verandering geskep.