Sentrumbestuurder Mokgethi Vinger by die Emfuleni Shelter for Boys (regs) en die sentrum se assistent is verheug om die rekenaars te ontvang wat geskenk is.

Hulle het nege rekenaars aan Future Forward Hubs in Boipatong, nege rekenaars aan Matsemela en Tsemane by Boitumelo in Sebokeng, en 14 rekenaars aan die Emfuleni Shelter for Boys geskenk.

"Aangesien universiteite strategies binne gemeenskappe geleë is, glo ons dat dit noodsaaklik is om aktief aan die plaaslike behoeftes aandag te skenk en 'n positiewe bydrae te maak. Ons verstaan dat geen organisasie los van sy omgewing kan floreer nie, daarom is ons daartoe verbind om ons gemeenskap op te hef deur noodsaaklike hulpbronne te verskaf wat groei en leer aanmoedig," sê IT-dienstoonbankbestuurder Shamla Naidoo.

Shamla voeg by dat die skenking toegang tot tegnologie sal verskaf, sal help om die digitale kloof te oorbrug en belangrike digitale vaardighede sal bevorder.

"Die ontvangers sal nou die nodige gereedskap hê om opdragte te voltooi, navorsing uit te voer en toegang tot opvoedkundige hulpbronne te hê. Dit sal nie net hulle digitale vaardighede verbeter nie, maar hulle ook in staat stel om aanlyn leerplatforms, opvoedkundige sagteware en 'n reeks ander instrumente te gebruik wat hulle opvoedkundige reis makliker sal maak en vir hulle nuwe vakgebiede en vaardighede leer."

Die IT-departement het vir hulle volledige lessenaarrekenaars in 'n puik toestand geskenk. Daarbenewens verskaf Microsoft – as deel van sy verbintenis tot gemeenskapsbetrokkenheid vir niewinsgewende organisasies – gratis toegang tot Office 365.

Die sentrumbestuurder by die Emfuleni Shelter for Boys, Mokgethi Vinger, sê dat hulle dankbaar is vir die skenking.

"Die skuiling is daar om 'n veilige hawe te skep en voeding en opvoeding vir kwesbare seuns op die ouderdom van nege tot 18 jaar te verskaf. Ons fokus op rehabilitasie en die verbetering van gedrag, en help hierdie jongmense om verantwoordelike burgers te word. Die skuiling huisves op die oomblik 14 skoolgaande seuns wat toegang tot tegnologie vir hulle studies en toekomstige ondernemings nodig het, en hierdie skenking sal beslis goed benut word."

Shamla bedank almal wat hierdie skenking moontlik gemaak het. "'n Groot dankie aan die IT-studente-ondersteuningspan en ons interns vir die opstel van hierdie rekenaars."