VOX POP
Pegelokarabo ya bone e ne e simolola ka ditshwaelo tse di jaaka “ke tsielegile fela” le "e a gwetlha” go fitlha ka "ke na le matswela mo tirong" le "ke ithuta dikgono tse di ntšha tsa thekenoloji".
Nako ya totlelelo: go kgonana le yone
Eno ke tsela e maloko mangwe a badiri ba rona ba neng ba araba potso eno ka yone ka nako ya totlelelo ka ga maitemogelo a ba nnileng le one a go direla kwa gae le ka fa totlelelo e amileng botshelo jwa bone lwa lelapa ka gone.
A re lebeng dikarabo tsa bone.
(Supa mo godimo ga dinepe go buisa go feta.)
Ngaka Zimbili Mkhize
Motlhatlheledi: Wa setlhopha sa serutwa sa Khemeseteri, kwa Mahikeng
“Lobaka lwa totlelelo le ntlogetse ke tsielegile fela mme ga ke a nna le matswela mo tirong ka gonne ke ne ke kgaosediwa ke dikgaogo tsa inthanete, ditiro tsa mo gae le go tshwanelwa ke go thusa morwadiake ka tiro ya sekolo e a neng a tshwanelwa ke go e romela letsatsi le letsatsi.
“Le nna ke ne ke tsielegile fela ka gonne go ne ga tswalwa dilaboratori tse di leng botlhokwa thata mo tirong ya khemeseteri.
"Mme se se monate ke gore ke kgonne go tsepa mogopolo mo go ithuteng dithekenoloji le botegeniki jwa e-learning (tsela ya go ithuta ka tiriso ya eleketeroniki). Mo go nna le ba lelapa la me, e nnile nako ya go atamalana fela thata ka gonne e re pateleditse go nna mmogo diura di le 24 ka letsatsi.”
Mop Nnesi Kgabe
Mokaedi: wa Kemonokeng ya Patlisiso, kwa Potchefstroom
“Ke kgonne go dirisa nako e gantsi e tsewang ke dikopano go feleletsa dithulaganyo tse di ntseng di saletse kwa morago, go kwala dipego le dilo tse dingwe tse di amanang le tiro ya me.
"Gape ke kgonne go tsepa mogopolo ka botlalo, ka gonne ga ke tlhole ke tshwenyega ka go laola maemo gore maloko a setlhopha sa me a nne a sireletsegile ka nako ya diura tsa tiro.
"Go ntse go sa kgonege gore ke iphitlhele ke na le maloko a lelapa la me ka ntlha ya mofuta wa tiro ya me (ditirelo tse di botlhokwa). Le fa go ntse jalo, re kgonne go golagana ka go dirisa dithekenoloji tsa tlhaeletsano tse di leng teng.”
Ngaka Manuela Fernandes-Martins
Wa Senthara ya Go Ruta le Go Ithuta, kwa Vanderbijlpark
“Le fa gantsi re tshegetsa batlhatlheledi le baithuti ka go buisana le bone re lebane difatlhego, go direla mo gae go nnile le matswela fela thata mo go nna.
“Nna le badiri-ka-nna re itemogetse boeteledipele jo bo molemo tota jwa bakaedi ba rona; re tshwaragane le go dira thulaganyo, e bile re a rotloetsana mo nakong e e thata eno!
“Mo gae, nna le ba lelapa la me re buisa dikgang fela thata gore re nne le kitso ka COVID-19. Mo nakong eno, re kgonne go bona gore tota batho ba amega ka ba bangwe.”
“Monna wa me ke mongwe wa ba ditirelo tse di kgethegileng mme le ene o ntse a direla mo gae. Ngwana wa rona o kgona go bona ka fa re tshwaregileng ka gone mme re tsaya dinako tsa boikhutso gore re iphe nako le ene. Re itumelela gore re kgona go buisana le ba lelapa ka Skype.”
Ngaka Piet Ntema
Motlhatlheledi, wa Sekolo sa Dipalopalo, Legoro la Disaense tsa Tlhago le Temothuo, kwa Vanderbijlpark
“Tota totlelelo yone e ntse e gwetlha fela thata ka gonne ga go kgonege go ya kwa ofising ya mongwe go ya go kopa thuso fa o e tlhoka. Ka fa letlhakoreng le lengwe, e ruta motho go ikgalemela le go anaanela dilo tse pele a neng a sa di anaanele fa re ne re sa ntse re na le tsone.
“Ga ke nne le maloko otlhe a lelapa la me mme go nna mo totlelelong go dira gore go nne thata go ba etela go ya go nna nakonyana le bone jaaka lelapa.”
Elize van der Westhuizen
Mothusi wa tsa tsamaiso: wa Badirakopo le Ofisi ya Kamogelo ya Baithuti mo Setheong, Vanderbijlpark
“Kwa lefapheng la go amogelwa ga baithuti mo setheong, re thusa badira-kopo ba ba tlang mo diofising tsa rona. Mo lobakeng lwa totlelelo re tshwanelwa ke go ba thusa ka imeile mme ditiro dingwe tsa khomphiutha ga di dire fa o le kwa gae. Seno se raya gore re tlile go dira diura tse di oketsegileng fa totlelelo e fela.
"Gape totlelelo e amile botshelo jwa me jwa lelapa.
"Ke moimana mme ke tshogetse botsogo jwa me le jwa lesea la me. Jaaka moithuti wa ngwaga wa bobedi wa YBB ke tshwenngwa ke dilo tse di tshwanang le go sa ye kwa phaposiborutelong, go dirisa mekgwa ya go ithuta ke le nosi le gore a re tlile go kgona go kwala diteko le ditlhatlhobo. Le fa go ntse jalo, mo nakong eno yotlhe, ke ikanya Modimo le maatla a thapelo.”
Mop Jeanetta du Plessis
Mothusa-modini: wa Patlisiso le tlhamosešwa, Legoro la Disaense tsa Pholo, kwa Potchefstroom
“Ka nako ya totlelelo, go botlhokwa gore ke golagane le badiri-ka-nna, ke ba itsise gore ke iktleeleditse go ba thusa. Gape ke ile ka golagana le badiri-ka-nna kwa moseja ba ke ileng ka “latlhegelwa” ke bone fa re ne re lwela maemo.
“Mosola o mongwe fano ke gore ke ithutile dikgono di le mmalwa tsa thekenoloji tse ke neng ke sa di itse mo nakong e e fetileng …. Rona ba re nang le bana re ne ra tshwanelwa ke go ithuta ka bonako!
“E re ka morwaake e le ene fela a sa ntseng a nna le rona, ke ile ka tlhologelelwa bomorwadiake fela thata le mokgonyane wa me, le go etela maloko a lelapa a a nnileng le “meletlo ya matsalo ka nako ya totlelelo” mo ngwageng ono. Mme ke itumeletse thata go dira ke le fa thoko ga monna wa me, Johann (wa lefapha la Kemonokeng ya Patlisiso) mo phaposing ya rona ya bojelo e re neng re e dirile office@home.”
Vincent Eastes
Mmenejara wa ofisi le wa porojeke mo Ofising ya Mothusa Motlatsa-Mokanseliri: wa Lefapha la Ditiro tsa Khamphase ya Potchefstroom
“Ga go motlhofo go dira diura tsa ka gale tsa ofisi ka nako ya totlelelo, go batla gore motho a ikgalemele, mme gape go monate go nna o phuthologile o dira o le ka kwa ntle ga ntlo.
“Ke itumelela ditirelo tse re nang le tsone tsa IT le kemonokeng ya bone. Ba dira gore go direla kwa gae go nne motlhofo, mme ke lebogela maiteko a magolo le boineelo jwa badiri-ka-nna ba ba direlang mo sephiring.
“Se se gakgamatsang ke gore totlelelo e nnile le tlhotlheletso e e molemo thata mo botshelong jwa lelapa la me. Go nna fa thoko ga batho ba le barataro 24/7 ke kgwetlho e le tota, mme re kgona go tshedisana sentle e bile sekejule sa ditiro tsa lelapa se tlhotlhofaletsa mongwe le mongwe botshelo. E godisitse kamano ya rona fela thata le go re ruta go tlotla dilo tsa ba bangwe le se re se lebeletseng mo go bone!”
Thulani Phakathi
Mothusi ka didirisiwa tsa go ruta le go ithuta, wa Senthara ya Go Ruta le Go Ithuta, kwa Mahikeng
“Go direla mo gae go ne go se monate kwa tshimologong ka ntlha ya go fetoga ga lefelo la tiro le tikologo ya lone. Ke ne ka tshwanelwa ke go dira go ya ka sekejule se se tshwanetseng se se rulagantsweng, se se ntlhofofaleditseng dilo le gore ke dire ka natla.
“Ka dinako tse dingwe ke dira ke sa kgaotse ke bo ke lebale le dijo tsa motshegare le gore go tšhaisiwa nako mang. Ke santse ke leka go boloka tekatekano fa gare ga nako ya tiro le ya lelapa. Ka maswabi, ke nna ke le nosi gone jaanong, ka jalo ke kgona go fetofetoga le maemo ka nako ya maemo a tshoganyetso mo lobakeng lono.”
Reagan Bahetane
Mmenejara wa seteišene sa radio sa khamphase, wa lefapha la Botshelo jwa Baithuti, kwa Mahikeng
“Maitemogelo a totlelelo a intumedisa thata le go nthuta go kgaoganya nako ya me le go e dirisa sentle. Malatsi a ntlha a mararo a ne a se motlhofo go ka tlwaela, mme motho o kgonne go tla go fitlha jaanong.
“Ba lelapa la me ba itumelela thata nako e re kgonang go e dirisa re le mmogo e bile ba utlwana go feta pele.”
Corrie Landsberg
Momaketi, wa Lefapha la go Maketa le go Ngoka Baithuti, kwa Mahikeng
“Jaaka batho ba ba maketang, go botlhokwa go nna re golagane le barutwana ba rona le go ba naya tshedimosetso ka ga se se diregang ka dikopo tsa bone. E re ka bontsi jwa bone ba sena inthanete, gantsi re dirisa thata polatefomo ya WhatsApp.
“Ka dikopano tsa rona tsa Mesupologo tse di tshwarwang ka Vidyo, rona ba ba maketang re mekamekana le mathata a setegeniki le go abalana tshedimosetso. Mme re solofela gore rotlhe re tla kgona go fokotsa kanamo ya mogare le go boela kwa mafelong a rona a a tlwaelegileng a tiro. Go ka nna monate go kopana gape ka namana.
“Ke na le bana ba le bararo ba dingwaga di le thataro go fitlha ka di le 12, se ke neng ke lebane le sone ka nako ya totlelelo se a itlhalosa. Fa banetetshi ba sa bone moento mo bogautshwaneng, o tla bonwa ke batsadi. Ka lesego, ba nna ba tshwaregile ka tiro ya sekolo le ditiro tsa lelapa mo ntlong.”