Eno e ne e le nako e ka yone Marius Stander a neng a nna leloko la setheo se ka nako eo se neng se bidiwa Yunibesiti ya Potchefstroom ya Thutogodimo ya Sekeresete (Potchefstroom University for Christian Higher Education (PU for CHE)), a simolola mokgele o o kgatlhang thata wa tiro o o neng o tlile go tsaya dingwaga tse di fetang masomaamarataro.

 

Gompieno jaana, morago ga dingwaga di le 36, Marius o lejwa e le molaodi yo o di gogang kwa pele mo tirong ya go ithuta boikutlo jwa badiri mo tirong le botsamaisi jwa ditalente. O rutile baithuti ba gagwe bokgoni jono a bo a thusa yunibesiti ka jone, segolobogolo khamphase ya Vanderbijlpark, a thusa go tlhama lefelo la boleng jo bo kwa godimo le le tla amang ka tsela e e molemo dikokomana tse di tlang.

 

O nnile le bontsi jwa dilo tsa lekgetlo la ntlha (Bontsi jwa dilo e ne e le tsa ntlha mo go ene)

 

Bontsi jwa dilo tsa lekgetlo la ntlha di fetola matshelo a rona, seno se ntse jalo bogolo jang fa re leba botshelo jwa ga Marius.

 

Fa a ne a le moithuti kwa khamphaseng ya PU ya CHE ya Vanderbijlpark go ela kwa bofelong jwa dingwaga tsa bo1970, o ne a le mongwe wa badulasetulo ba ntlha-ntlha ba Lekgotla la Baithuti la Khamphase.

 

Morago ga moo, Marius a nna moemedi wa ntlha mo khamphaseng eo go nna leloko la Afrikaanse Studentebond a bo a nna moithuti wa nako e e tletseng wa go ithuta boikutlo jwa badiri mo tirong gore a ithutele dithuto tsa morago ga kalogo kwa khamphaseng ya Potchefstroom.

 

Morago ga go aloga, o ne a nna moemedi wa ntlha wa baithuti ba nako e e fetileng ba khamphase go direla mo Setlhopheng sa Lekgotla la Yunibesiti.

 

O rata thata batho ba ba tsaletsweng motshameko wa rakabii

 

Jaaka mongwe wa leloko la ba ba tlhamileng tlelapa ya Rakabii ya WATUNI kwa Vanderbijlpark,  Marius a re go rata ga gagwe ditlhopha tsa batho ba ba farologaneng go bakile gore a tlhabolole motshameko wa rakabii.

 

“Metshameko yotlhe e na le dithuto tse di ka ithutwang go tswa mo lebaleng le go dirisiwa mo botshelong, mme rakabii yone e na le dithuto tse di ka se kang tsa bonwa mo metshamekong epe e mongwe – e bile ga ke bue ka tirisanommogo ka kakaretso ya setlhopha sa batshameki le go ntsha ga tshwene fa go tshamekiwa,” Marius o tlhalosa jalo.

 

Dingwe tsa dithuto tseno ke: katlego e tlisiwa ke go ntsha ga tshwene fa motho a tshameka, kgotsofalo e tlisiwa ke go dira ka natla, lefatshe le re tshelang mo go lone ga le mpampetse ope, ga go a lekana go fitlhelela mokgele wa gago – o tshwanetse go dira go fetsa mokgele oo, e bile katlego ya gago e laolwa ke tshwetso ya gago ya motsotswana wa bofelo.

 

Dintlhakgolo tsa tiro ya gagwe

 

Marius o simolotse mokgele wa gagwe wa akatemi e le motlhatlheledipotlana wa go Ithuta boikutlo jwa badiri mo tirong kwa khamphaseng ya Potchefstroom mme ka 1985 a fudugela kwa khamphaseng ya Vanderbijlpark. Ene le modiri ka ene wa nako e telele, motlhababotlhale le tsala ya gagwe, e leng Mop Joppie van Graan, ba ne ba tlhoma Lefapha la Go Ithuta Boikutlo jwa Badiri mo Tirong la khamphase e bile ga go na ope yo o sa itseng ka gone.

 

“Ke itumelela ditšhono tsotlhe tse ke ileng ka di newa, e bile ke ikutlwa ke le lesego gore ke ile ka nna moemedi wa tiro ya me e ke e kgatlhegelang mo dikontinenteng di le thataro.”

 

Marius ke mmatlisisi yo o neilweng maduo wa Mokgatlho wa Bosetšhaba wa Patlisiso, modirimogolo wa lefapha la tsa badiri, mokatisimogolo, motlhababotlhale ka Ditiro tsa Batho tsa Boto ya Aforikaborwa, e bile gape ke Moakatemimogolo yo o tlotlegang wa Intaseteri le Mokgatlho wa Baithutatlhaloganyo wa Aforikaborwa. Ee, e bile ke moporofesa ka botlalo wa intaseteri ya boithutatlhaloganyo.

 

Go tla go fitlha gompieno, Marius o neetse dipuo tsa akatemi kwa dikhonferenseng tsa boditšhabatšhaba kwa dinageng di le 18, o ile a nna mookamedi wa baithutatlhaloganyo ba ba fetang 60 ba ba neng ba katisiwa ba le mo tirong, a bo a nna moakatemi wa thuto wa baithuti ba ba fetang 50 ba masetase le ba PhD.

 

DNA ya me e ka tswa e gatisitswe ditlhaka tsa YBB

 

Fa Marius a bodiwa ka YBB a re o belaela gore YBB e ka tswa e le mo teng ga dijini tsa gagwe.

 

“Kgang yotlhe ya botshelo jwa me e golagane le YBB, batho ba yone le ditšhono tse ke neng ka di newa, tsa go nna moithuti, leloko la badiri, moakatemi kgotsa moithuti wa nako e e fetileng yo o motlotlo,” o bolela jalo.

 

O kopane le mosadi wa gagwe, e leng Annatjie, kwa khamphaseng ya Vanderbijlpark. Banyalani bano ba segofaditswe ka bana ba babedi, Ederick le Elizma le ngwetsi ya bone e leng, Tasmin. Mo gare ga bone ba le batlhano ba na le di dikirii tse di fetang 19 tse ba di ithutetseng kwa YBB!

 

Ke isagwe efe e a e eleletsang YBB? “Ke solofela ka pelo ya me yotlhe gore YBB e tla tswelela e le setheo se se fitlhelelang mekgele ya sone, mme go feta tsotlhe, e tla nna le diphelelo tse di siameng mo go botlhe.”