Ba thusa ba bangwe kwa ntle ga
go ipona tsapa
YBB e na le badiri ba ba ineetseng mo tirong bao ka gale ba dirang tiro e e fetang e e lebeletsweng mo go bone. Mo tokololong eno, Eish! e simolola motseletsele wa yone wa go thusa ba bangwe kwa ntle ga go ipona tsapa gore e akgole badiri ka rona le go ba rotloetsa gore ba tswelele ka go tlisa pharologano mo matshelong a ba bangwe.
Sabelo Chizwina
Canadia Musi, modiri wa mo laeboraring, o tlhopha Sabelo Chizwina, tlhogo ya mo laeboraring wa Ditirelo tsa tshedimosetso mo Khamphaseng ya Mafikeng. "O dira go fitlha go nna bosigo thata, le ka mafelobeke, a thusa baithuti ba ba nang le bothata jwa go bona tshedimosetso ka dikabelotiro tsa bone. Gape o thusa baithuti ka dikhomphiutha, le fa eo e se tiro ya gagwe. Gape Sabelo o thusa ka ditiro tsa boitapoloso tsa baithuti."
Henriëtte Groenewald
Henriëtte Groenewald, motlhankedimogolo wa tsamaiso kwa Laeboraring ya Ferdinand Postma mo Khamphaseng ya Potchefstroom, o botsalano ka gale e bile o a thusa. Marolay van der Walt, mothusi ka tsa tsamaiso mo laeboraring, a re o rarabolola ka bonako mathata ape a a tlhagang kwa laeboraring ka katlego e bile o ela tlhoko gore maloko a badiri a boloka laeborari e le phepa e bile e le bothakga.
Danie Hefer
Marelize de Lange wa Komiti ya Dikadimomadi o tlhopha Danie Hefer, tlhogo ya ditirelo tsa kemonokeng ka madi mo Khamphaseng ya Potchefstroom. A re o direla baithuti tirelo e ba iseng ba e direlwe. "YBB e dira papatso ya NSFAS ka ene. Baithuti ba le makgolokgolo ba ba dikobo di magetleng ba tla mo ofising eno ngwaga le ngwaga, mme o ba reetsa botlhe fela ka bopelotelele mme o leka ka natla go ba thusa ka madi a mannye a a leng gone." A re go na le dikgang di le dintsi tse di bontshang go atlega tsa baithuti ba Danie a ba thusitseng. "Go rata ga gagwe tiro thata go a iponatsa, mme go nkama pelo nako le nako fa a bua ka gone. O ratwa thata ke baithuti e bile o ba thusa kwa ntle ga go ipona tsapa.
Mandie Jansen van Vuuren
Go ya ka Thea Joubert, mothusimogolo ka tsa tsamaiso kwa tsamaisong ya Dikirii e e kwa Godimo mo Khamphaseng ya Potchefstroom, Mandie Jansen van Vuuren, mothusimogolo ka tsa tsamaiso, o matlhagatlhaga tota. “Ke motho yo o tsapogang bonolo fela e bile o rata go thusa. Badiri ka ene ba ka kgona go supa gore o itiretse leina le le ntle le baithuti le gore ga a ipone tsapa go dira go feta se se lebeletsweng mo go ene go thusa baithuti ba morago ga kalogo.”
Tanya Linde
Tanya Linde, mokokoanya Dituediso tsa Baithuti le Dikoloto mo Khamphaseng ya Potchefstroom, o ne a nna leloko la setlhopha seno mo ngwageng o o fetileng e bile ruri ga a ipone tsapa go thusa badiri ka ene, batsadi kgotsa baithuti. Go ya ka Johan Combrink, Tanya ga a ke a palelwa ke sepe, le fa a tshwaregile tota. "Le fa a tshwanelwa ke go tsaya loeto go tswa kwa Klerksdorp, gantsi ke ene wa ntlha go fitlha mo ofising mo mosong le wa bofelo go tsamaya mo maitseboeng."
Riaan Marx
Riaan Marx, moenjenere wa diporokerama tsa khomphiutha kwa IT mo Ofising ya Setheo, o thusa ka tirelo e e botlhokwa tota. Go dira ga gagwe ka natla le ka boineelo go kgontsha maloko a mangwe a badiri go dira tiro ya bone. “Riaan o mekamekana le ditiro tsotlhe ka tlhagafalo le ka maikutlo a a bontshang gore ‘a ka se palelwe’. O ntsha pegelokarabo le go boloka badiri ba le mo leseding ka kgato epe fela e e tsewang ya go rarabolola bothata jo bo rileng," go bolela jalo Wildrich Fourie, mmenejara kwa Senthareng ya Thekenoloji ya Mokwalo (CText).
Anne-Marie Snyman
Lisl Boshoff, mothusi ka tsa tsamaiso wa Sekolo sa Dithuto tsa Tlhaeletsano, a re Anne-Marie Snyman, motlhankedimogolo wa tsamaiso kwa lefelong la go emisa dikoloi mo Khamphaseng ya Potchefstroom, ga a ipone tsapa go thusa ba bangwe. “Fa leloko la badiri le tlhoka koloi e e rileng e e setseng e beeleditswe, o leka ka natla go swapa dikoloi tseo gore leloko la badiri le dirise yone koloi e le neng le e batla.”
Roald van den Berg
Petro Wessels, mmenejara wa disalari le wa ditšhelete mo Ofising ya Setheo, a re Roald van den Berg, mankge wa diporokerama tsa khomphiutha kwa IT mo Ofising ya Setheo, o tshwanelwa ke go akgolwa. "Gantsi o dira gore a nne le nako ya go rarabolola mathata ka bonako le ka maikutlo a a siameng. Mo makgetlong a le mmalwa o ne a bo a re thusa re le mo malatsing a boikhutso, le morago ga diura tsa tiro. Botho jwa gagwe jo bontle bo dira gore go nne monate go dira le ene."
Susan van Rooyen
Susan van Rooyen, mookamedi wa baithuti ba nako e e fetileng mo Khamphaseng ya Mafikeng, gape ke motsadi wa kago ya bonno yo o dirang gore baithuti ba ikutlwe e le maloko a lelapa. Ngaka Inge Venter, mogakolodi ka tsa akatemi wa Tlhabololo ya go Ruta, a re ruri Susan o tlhokomela baithuti: o tlhomamisa gore ba na le dijo tse di lekaneng go ja, o naya baithuti ba basetsana ba ba dikobodimagetleng dilwana tsa ka fa botlhapelong e bile o abelana botlhale le kgakololo ya gagwe le botlhe. "Gape Susan ke motsamaisa lenaneo yo o nang le bokgoni yo bareetsi ba ratang metlae ya gagwe fela thata. Leina la gagwe la sereto mo Khamphaseng ya Mafikeng ke ‘Ma Susie’.”
Fa e le gore o ka rata go tlhopha modiri-ka-wena yo gantsi a sa iponeng tsapa go thusa ba bangwe, tsweetswee romela imeile kwa go willie.duplessis@nwu.ac.za. Gakologelwa go supa maemo a gago a tiro le leina la lefapha la gago kgotsa sekolo, mmogo le tsa batho ba o ba tlhophang. Gape ntsha mabaka a gore ke eng o akanya gore motho yono ga a ipone tsapa go thusa ba bangwe.