Alumni van die kampus in Potchefstroom het die afgelope tyd in Pretoria, Potchefstroom en die verre Swakopmund saamgetrek.

 

Vir die Pretoria-kuier op 20 September het sowat 120 alumni by die Olympus-funksiesentrum byeengekom. Prof Fika Janse van Rensburg, die adjunk-visekanselier op die kampus in Potchefstroom, het met die alumni gesels oor die NWU se unitêre strategie en hoekom dit vir die toekoms van die universiteit belangrik is. Dr Theuns Eloff, die voormalige visekanselier van die NWU, was ook een van die gaste.

 

Farmasie vier 75 jaar

 

Aptekers van oraloor het op 10 en 11 November ʼn draai op die kampus in Potchefstroom kom maak om saam met die Skool vir Farmasie hulle 75 jaar lange bestaan met 'n simposium en 'n gala-ete te herdenk.

 

Tydens die Vrydagmiddag-toer deur die nuwe farmasiegebou het menige alumnus se oë behoorlik geblink toe hulle die moderne geriewe sien.

 

Saterdag was dit simposiumtyd, met ʼn hele aantal gesiene sprekers op die program. Alumni kon luister na prof Sarel Malan, voorsitter van die Aptekersvereniging van Suid-Afrika, dr Joey Gouws, registrateur van die Medisynebeheerraad, Vincent Tlala van die Suid-Afrikaanse Aptekersraad, Joubert Krugel van die ouditeursfirma KPMG, en prof Antoon Goossens, die eerste dekaan van die voormalige Fakulteit Farmasie.

 

Die aand het prof Robert Balfour, die adjunk-visekanselier vir onderrig en leer, die gala-geleentheid geopen. Prof Awie Kotzé, die uitvoerende dekaan vir die Fakulteit Gesondheidswetenskappe, het 'n oorsig oor die fakulteit en die posisie van Farmasie binne die fakulteit gegee.