Prof Martinette Kruger (regs) en PhD-student Anneke Schoeman het uitgeblink by die Suid-Afrikaanse Vroue in Wetenskap-toekennings (SAWiSA) wat op 15 Augustus plaasgevind het. Met hierdie toekennings erken die Departement Wetenskap en Tegnologie (DWT) die uitnemendheid onder vrouewetenskaplikes en -navorsers.

Prof Martinette Kruger, ’n voltydse navorser en professor by Toerismenavorsing in Ekonomiese Omgewings en Samelewing (TREES) het die SAWiSA- toekenning vir Uitnemende Jong Vrouenavorser vir geesteswetenskappe en sosiale wetenskappe ontvang.

Sy doen onder meer navorsing oor hoe feeste en sportgebeurtenisse in ’n ontwikkelende, multikulturele land toerisme kan fasiliteer. Sy is betrokke by langtermyn-navorsingsprojekte wat verskeie feeste en geleenthede insluit.

 

Sy neem ook deel aan internasionale projekte waarby onder meer die Europese Unie en die Thompson Rivers Universiteit in Kanada betrokke is.

Martinette het ’n PhD in toerismebestuur en is van die Fakulteit Ekonomiese en Bestuurswetenskappe.

 

’n Blink toekoms wag

 

Anneke Schoeman,’n jong navorser in omgewingswetenskappe, het bewys dat daar ’n blink toekoms op haar wag toe sy tydens die SAWiSA-toekeningseremonie ’n DWT-Albertina Sisulu-genootskap ontvang het.

 

Hierdie gesogte genootskap word aan ses meesters- en ses doktorale student toegeken. Die genootskap gee erkenning aan uitstaande vermoëns en potensiaal in navorsing, en is daarop gemik om die ontvangers se navorsingservaring en uitsette te verbeter en nog meer jong vroue aan te moedig om navorsingsgrade te voltooi.