Soos al ons alumni weet (sommige as gevolg van ’n eie bittersoet ervaring in die verlede), is studente berug vir hul vermoë om bier te drink … sommer báie bier. Hulle is egter minder bekend vir die brou daarvan.

Dit is presies wat die finalejaarstudente van die Skool vir Chemiese en Mineraalingenieurswese onlangs gedoen het – hulle het die geriewe van ’n brouery in Potchefstroom, Route 96, gebruik om bier te brou.

Hierdie ambisieuse ingenieurs het teen mekaar meegeding om te sien wie nie net die beste bier nie, maar ook die beste kaas en sjokolade kan produseer.