As die storms van die lewe rondom ’n mens woed, is dit waarskynlik veiliger om binnenshuis te bly tot dit verby is, eerder as om die stormsterk winde te trotseer. Dit is egter nie wat die NWU gedoen het toe ons die Covid-19-pandemie in die gesig gestaar het nie.

Te oordeel aan die Universiteitsbestuurskomitee (UBK) se aanbieding aan die Raad tydens ’n werkswinkel op 17 Maart 2021, het die NWU die uitdagings trompop geloop.

Die UBK beskryf in die aanbieding hoe die strategieë wat geïmplementeer is ons aktiwiteite beïnvloed het, en hoe ons intervensies ons in staat gestel het om voordeel te trek uit die nuwe geleenthede in die hoëronderwyssektor.