Ettienne, hoofekonoom van Rand Aksepbank (Rand Merchant Bank), het gesê Suid-Afrika het tans ’n R150 biljoen-begrotingstekort – dit is die bedrag waarmee die regering se uitgawes sy inkomste oorskry.

Van die 55 miljoen Suid-Afrikaners is net sowat 14 miljoen geregistreerde belastingbetalers en van hulle is net 7,4 miljoen belastingpligtig.

Dit beteken dat slegs 14% van die bevolking, saam met maatskappye en trusts, die las dra om die regering se uitgawes te dek.

Nog ʼn interessante feit oor die begroting wat hy genoem het, is dat die marginale belastingkoers van welgestelde individue wat meer as R1,5 miljoen per jaar verdien, van 41% tot 45% verhoog is. Sowat 100 000 Suid-Afrikaners val tans in dié welgestelde groep.

Maar daar is ook ʼn paar interessante feite oor Ettienne self.

ʼn Finansiële foendi in wording

Ettienne het sy loopbaan afgeskop as dosent in ekonomie by die NWU se kampus in Vanderbijlpark. Daarna was hy 'n ekonoom by die Nasionale Tesourie waar hy ook die geleentheid gehad het om sy studies in die VSA voort te sit.

Hy het sy loopbaan in die bankwese by Eerste Nasionale Bank begin, waarna hy by Rand Aksepbank aangesluit en later tot hoofekonoom gevorder het. As 'n kundige op die gebied van valuta en betalingsbalans is sy vernaamste taak om die makro-ekonomiese omgewing te moniteer vir nuwe tendense in ekonomiese veranderlikes en beleid.

ʼn Gesogte produk

Ettienne se kennis van die ekonomie maak hom gesog. In Julie 2013 het mnr Trevor Manuel, toe nog Minister in die Presidensie: Nasionale Beplanningskommissie, hom as lid van die Suid-Afrikaanse Statistiekraad benoem.

Hy is gereeld in die media en het al verskeie meningstukke en navorsingsartikels in nasionale koerante soos Business Day en Financial Mail gepubliseer.

Ettienne handhaaf nog sterk bande met sy alma mater en bied per geleentheid gaslesings in ekonomie by die NWU se kampus in Vanderbijlpark aan. Hy gesels ook soms met alumni oor onderwerpe soos wêreldwye finansiële markte en die toekoms van die Suid-Afrikaanse ekonomie.