“My ouma het my na Geronimo vernoem omdat sy wou hê ek moet ’n magtige leier soos hy word,” sê Geronomow, wat die hoof by mensekapitaal vir die kleinhandelverkope-afdeling by Eerste Nasionale Bank en ook die uitvoerende direkteur vir produkstrategie by WealthSpaces is.

 

“Namate my loopbaan begin vorm aanneem het, het ek my ouma se keuse beter begin verstaan. Ek was bevoorreg om ’n paar uitdagende posisies te beklee, en ek het risiko’s geloop en ander aangemoedig om dieselfde te doen. Ek sal myself as ’n dienende leier beskryf,” sê hy.

 

App bied interessante werkruimtes

 

Dit was sy uitgangspunt vroeër hierdie jaar toe hy aangesluit het by WealthSpaces, ’n app vir ’n alternatiewe werkoplossing wat lede in staat stel om onbeperkte werkruimtes regoor Suid-Afrika te bereik.

 

Hy het ’n magdom bedryfskennis, kundigheid en navorsingskennis oor hoe om in ’n virtuele omgewing te werk, met hom saamgebring. Dit het hy opgedoen tydens die meer as 10 jaar as senior bestuurder in mensekapitaal by die bank, en terwyl hy vir multinasionale ondernemings soos Marsh & McLeannen, ’n Fortune 500-maatskappy, gewerk het.

 

Hy sê WealthSpaces is besig om vinnig te groei, en die getal gebruikers neem elke dag toe.

 

Kyk nuut na die wêreld van werk

 

Geronomow glo die werkomgewing kan die manier waarop mense werk en selfs hulle vermoë om aanklank by kliënte te vind, drasties beïnvloed.

 

WealthSpaces het in 2019 ontstaan nadat die ontwikkelaars daarvan ’n geleentheid in die mark raakgesien het in die toenemende fokus op die belangrikheid van ’n balans tussen werk en lewe en die outomatisering van die werkplek.

 

Hulle werk saam met onderbenutte restaurante, kafees, hotelle en privaat kantore wat hulle persele beskikbaar maak vir gaste wat met hulle saamwerk in ruil vir ’n deel van inkomste en vir meer handelstransaksies.

Die maatskappy is in Johannesburg geleë, maar daar is meer as 40 werkplekke regoor Suid-Afrika. Vennote sluit City Lodge-, Sun International-, Legacy- en Radisson Blue-hotelle in.

 

Maak die lewe makliker

 

“Die app is ’n gerieflike opsie vir beginbesighede. Dit verlaag koste, bespaar tyd, verskaf toegang tot goeie liggings regoor die land en bied baie goeie netwerkgeleenthede aan ondernemings,” sê Geronomow.

 

Wanneer hy nie werk nie, geniet hy dit om gim toe te gaan, oor die wêreld heen te reis of om rustige etes saam met sy vriende te geniet. Hy sê hy hou daarvan om ten minste een internasionale reis per jaar te onderneem om tydens sy verloftyd ’n bietjie te ontspan.  Hy was al in talle lande, insluitende die VSA, Frankryk, Israel en Italië.

 

Die WealthSpaces-app kan gratis van die App Store of die Google Play Store afgelaai word.