Nodeloos om te sê, die voortslepende inperking en sosiale distansiëring het ’n beduidende effek op kinders met ADHD, asook op hulle ouers.

 

Esmé sê ADHD plaas oor die algemeen baie druk op ouers, maar dis erger in hierdie tyd van Covid-19.

 

“Dit is moeilik om ’n kind met ADHD te hanteer, omdat hulle nie hulle eie gedrag kan bestuur nie, wat dikwels konflik in die gesin veroorsaak,” sê Esmé.

 

“Hierdie kinders is dikwels sensitief vir onderliggende tekens, en as die ouers dus gespanne raak as gevolg van Covid en onder andere werkstres en finansiële stres ervaar, raak die kinders bewus daarvan en raak hulle  veeleisender.”

 

Roetine is noodsaaklik, veral tydens die pandemie

 

Sy sê kinders met ADHD het streng struktuur en konsekwentheid nodig.

“Met Covid-19 en werk van die huis af, is al ons skedules op hulle kop gekeer.  Die huis is selfs nog meer gedisorganiseer omdat die eetkamer nou skielik in ’n ‘kantoor’ omskep is,” sê sy.

 

Gevolge van hierdie strestoestand sluit huweliksprobleme en leerprobleme in wat ekstra emosionele en finansiële stres op ouers plaas, en konflik tussen sibbe en maats laat ontstaan.

 

“Ek kan nie die belangrikheid van roetine genoeg beklemtoon nie. Ek weet dit is moeiliker en meer uitdagend gedurende hierdie stresvolle tyd, maar ons het nou selfs meer struktuur en roetine nodig.  Dit is belangrik vir kinders se geestesgesondheid en sielkundige welstand om byvoorbeeld spesifieke bad- en slaaptye te hê, en dit is selfs nog belangriker vir kinders met ADHD.”

 

Hoe om kinders besig te hou

 

Esmé sê die grootste fout wat ouers kan maak, is om die TV of ander elektroniese toestel as babasitter of vir vermaak te gebruik. Dit geld weer eens vir alle kinders, en veral vir kinders met ADHD.

 

“Ouers het al vir my gesê as hulle weier om die televisie aan te skakel, die kinders vir ’n dag of twee of drie ongelukkig is, en dan verveeld raak. Dan begin hulle om hulleself te vermaak deur te speel of te lees.”

 

Sy sê dat ouers glo dat hulle goeie ouers is wanneer hulle hul kinders vermaak. “Dit is nie so nie.  Kinders moet hulleself ook kan vermaak.”

 

Daar moet wel onthou word dat dit noodsaaklik is vir gesinne om vir ten minste ’n halfuur elke dag tyd saam met mekaar deur te bring, of dit is om te gaan stap, fiets te ry, te verf of handwerk te doen, of met Lego of blokkies te speel. “Spel – selfs met groter kinders – is die grootste teenvoeter vir stres,” sê sy.

 

• ADHD is die meer bekende afkorting wat gebruik word vir “attention deficit hyperactivity disorder”. Afrikaans: AGHS.