Krieket loop dik deur alumnus dr Jacques Faul se are. Sy passie vir die spel, tesame met sy sakevernuf, het daartoe gelei dat hierdie Klerksdorp-boorling en sportadministrateur die hoogste sporte van hierdie “gentleman’s game” in die land bereik het.

Jacques, die voormalige HUB van Noordwes-krieket en die Titans, is in 2019 as die tussentydse HUB van Krieket Suid-Afrika (KSA) benoem – ’n posisie wat sekerlik die ywer van hierdie werkesel gaan toets.

 

“Ek het in 2012 my eerste skof as nasionale HUB aangepak en was geëerd toe ek weer die geleentheid gekry het om die leiding te neem.”

 

Stuur die skip deur onstuimige waters

 

Jacques is aangestel om KSA se skip deur die onstuimigste water te stuur wat dit sedert sy hertoetrede tot die internasionale toneel in 1992 moes trotseer.

 

Uitslae is glad nie na wense nie en die organisasie se finansies is in wanorde gedompel. Boonop is die bestuurstruktuur verander, Faf du Plessis het as kaptein uitgetree, en daar is ’n deurlopende geskil tussen die spelers en KSA.

 

“Ons het inderdaad ’n paar uitdagings en ons moet die geloofwaardigheid van KSA herstel, maar ons sal hopelik dinge kan regruk,” sê Jacques.

 

’n PhD as kompas

 

Dit is nie net Jacques se krieketervaring wat sal help om die KSA-skip na kalmer waters te stuur nie.

 

Hy sê die PhD wat hy in 2017 by die NWU verwerf het en oor belanghebberbestuur en megagebeurtenisse gehandel het, is baie toepaslik vir hierdie werk.

 

“Op ’n strategiese vlak kom die vaardighede wat ek in navorsingsmetodologie en die toepassing van kwantitatiewe metodes opgedoen het, ook baie handig te pas.”

 

Met sy omvattende ervaring in krieketbestuur is dit duidelik dat Jacques nie sal toelaat dat die onstuimige waters hom kelder nie. Sy boodskap vir Suid-Afrika se krieketliefhebbers is dat dinge gaan verbeter.

 

“Dankie dat julle ons ondersteun – ons gaan ons bes doen om julle trots te maak.”