Daar is elke dag sowat 360 Suid-Afrikaners wat ’n beroerte kry. Van hulle sterf ongeveer 110 en 90 word met ’n lewensveranderende gestremdheid gelaat, wat beroertes die vernaamste natuurlike oorsaak van gestremdheid onder volwassenes maak.

Een van die lewensveranderende gestremdhede wat die gevolg van ’n beroerte is, is dat die funksionaliteit van pasiënte se hande aangetas word. Gelukkig sal die NWU se NeuHand-uitvinding vir hierdie pasiënte nuwe hoop bied.

 

Die NeuHand-stelsel, wat spesifiek vir rehabilitasie in Suid-Afrikaanse toestande ontwerp is, is ’n goedkoop, outomatiese megatroniese rehabilitasiestelselkonsep wat die Fakulteit Ingenieurswese ontwikkel het. (Megatronika is ’n interdissiplinêre gebied van ingenieurswese wat meganiese en elektriese ingenieurswese en rekenaarwetenskap kombineer.)

 

Die NeuHand is een van verskeie produkte wat tans in die platform vir die ontwikkeling en kommersialisering van mediese toestelle van die Fakulteit Ingenieurswese en die Tegnologie-oordrag en Innovasiesteun-kantoor ontwikkel word.

 

Hoe die NeuHand kan help

 

’n Beroerte is veral rampspoedig omdat die gevolge op die lang duur aftakelend kan wees en ’n hoë vlak van sorg vereis, wat duur kan wees.

“Rehabilitasie is baie doeltreffend om langtermynaantasting te verminder, en verskaf beduidende verbeterde uitkomste vir pasiënte,” sê Ingenieurswese se prof Leenta Grobler.

 

Die nadeel is egter dat die huidige praktyk gewoonlik meer op sommige aspekte van rehabilitasie as op ander fokus.

 

Gedurende die eerste maand ná ’n beroerte, wanneer die pasiënt die meeste potensiaal het om spierfunksionaliteit terug te kry, is die fokus hoofsaaklik daarop om groot motoriese beweeglikheid en spraak terug te kry. Min of geen aandag word gedurende hierdie tyd aan die rehabilitasie van fyn motoriese beweeglikheid gegee.

 

“Dit beteken dat daar ’n dringende behoefte aan ’n rehabilitasiestelsel vir die hande is wat gebruik kan word in die rehabilitasiegeriewe in die hospitaal terwyl die pasiënt nog onder toesig is, asook tuis nadat die pasiënt ontslaan is,” sê Leenta.

 

Die groot potensiële voordele van rehabilitasie, tesame met robotiese tegnologieë en die internet was die inspirasie agter die ontwikkeling van die NeuHand-stelsel.

 

Aangesien die stelsel geoutomatiseer is, kan aanvanklike rehabilitasie onmiddellik ná ’n beroerte plaasvind, en kan die heropbou van neurale bane tussen die brein en die hand kan aan die gang gesit word.

 

Hoe die NeuHand werk

 

Die NeuHand-stelsel bestaan uit ’n meganiese komponent gekombineer met sensors en ’n mikroverwerker (’n klein rekenaartjie) met spesiale sagteware.

Die meganiese deel van die stelsel gebruik sensors om veranderinge in sy omgewing waar te neem en hierdie inligting na die sagteware van die mikroverwerker te stuur, waar dit verwerk word. (Die meganiese deel van die stelsel lyk baie soos ’n eksterne skelet.)

 

Een van die grootste voordele van die NeuHand-stelsel is dat fisioterapeute via die internet toegang tot die verwerkte data kan kry, wat hulle in staat stel om oefeninge voor te skryf. Hulle kan ook deurlopend die pasiënt se vordering oor ’n afstand moniteer.

 

Dit is uiters nuttig, veral by geriewe waar daar min personeel is, aangesien dit tyd bespaar en die fisioterapeut in staat stel om meer pasiënte te help.

 

“Toestelle soos die NeuHand sal ook veral in landelike gemeenskappe nuttig wees, aangesien dit vir pasiënte gebruik kan word wat dalk nie lang afstande kan aflê om klinici te sien nie.  Dit is hoekom ons hoop om hierdie stelsel spoedig te kan bemark,” sê Leenta.