Beste NWU-alumni,

 

Ek is geëerd om aan julle te kan skryf en ek vertrou dat dit met julle almal baie goed gaan, en dat die jaar wat voorlê vir julle vol seëninge en belofte sal wees.

 

Dit voel soos ’n leeftyd gelede dat ek as ’n student in die gange en op die wandelpaadjies van die Potchefstroomkampus kon rondstap. Ai, hoe verlang ek na daardie sorgelose dae …

 

Daar het soveel dinge in die jare daarna gebeur. Daar was vele oomblikke om te kon feesvier en selfs nog meer om van te leer terwyl ek op hierdie lewensreis was.

 

TV is my tuiste

 

Ek was geseënd genoeg om amper ’n dekade lank ’n loopbaan in die TV-uitsaaibedryf te hê, en ek groei steeds in hierdie medium, wat ek nou as my tuiste beskou. Ek is seker ’n paar van julle het dalk my baie opgewonde gesig op ’n paar episodes van Suid-Afrika se inspirerende ontbytprogram Expresso op SABC 3 gesien.

 

Julle moes seker ook al – dalk al een keer te veel – my talle onderhoude met ’n klompie ewe opgewonde kliënte van ’n sekere versekeringsmaatskappy gesien het terwyl die uwe vanaf die passasiersitplek toekyk.

 

Moenie bekommerd wees nie, ek het reeds al die grappies gehoor, en ek verseker julle almal dat ek wel ’n geldige Suid-Afrikaanse rybewys het en dat ek my eie motor bestuur!

 

Om weer te vlieg

 

Intussen is ek ook besig om my passie vir musiek weer op te neem, wat op ’n jong ouderdom begin het en vlerke gekry het om mee te vlieg toe ek as student by Flip-a-Coin aangesluit het. (Diegene wat daardie tyd by was toe ons op die ouditorium se verhoog opgetree het, kan dit dalk nog onthou.)

 

Ek het daarin geslaag om die dienste en bystand van goed gevestigde professionele persone in die musiekbedryf te bekom, en nou begin die harde werk: tyd in die ateljee, skryfsessies, oefentyd, die verfyning van die finale produk, ens.

 

Hopelik sal ons eendag ná ’n vertoning mekaar weer op ’n verhoog raakloop. Ek is ewe opgewonde en senuweeagtig oor die reis na hierdie nuwe wêreld as solokunstenaar, en ek hoop dat alles harmonieus sal saamval.

 

Ten slotte hoop ek dat julle almal en julle geliefdes ’n wonderlike 2020 sal hê. Mag julle wildste ambisies en drome vrugte dra, en mag die vrugte van julle arbeid almal wat julle op hulle lewensreis teëkom tot seën wees.

 

Vriendelike groete

 

Katlego Maboe