Geagte alumni

 

Kan julle glo die meer gematigde Maartmaand is reeds hier? Die skroeiende somer is verby en die herfs klop aan ons deur.

 

Ja, sê ons, tyd vlieg. 2019 is nou iets van die verlede, 2020 is glad nie meer so nuut nie, en die jaar wat nog kom het ’n nuwe naam: 2021.

 

Die meeste mense kyk na tyd vanuit hierdie lineêre perspektief: dat ’n mens met ’n reguit lyn uit die verlede deur die hede in die toekoms inbeweeg.

 

Is tyd ʼn illusie?

 

Die meeste van ons besef egter ook dat dit is hoe ons tyd “organiseer” om dit meer verstaanbaar te maak. Volgens die wetenskap is tyd nielineêr – selfs ’n illusie, sê sommige wetenskaplikes.

 

Nadat die beroemde fisikus Albert Einstein die idee van ruimte-tyd as deel van sy relatiwiteitsteorie help ontwikkel het, het ander wetenskaplikes ná hom nog talle ingewikkelder teorieë oor tyd tot stand gebring.

 

Volgens sommige van daardie teorieë is daar geen verwysingspunte nie, asof alles binne tyd óf aan mekaar verbind is, óf gelyktydig plaasvind. As ek dit vir my probeer voorstel, sien ek myself bokant hierdie lineêre tydlyn sweef terwyl ek terselfdertyd na die verlede, die hede en die toekoms kyk.

 

Tik-tak-tyd

 

In ons alledaagse lewens sien ons tyd egter steeds as iets wat deur ’n horlosie bepaal word – iets wat vanaf die verlede deur die hede na die toekoms toe loop. Hierdie ietwat beperkte perspektief gee ons ten minste die geleentheid om uit die verlede te leer, in die oomblik te leef, en vir die toekoms te beplan.

 

By die NWU sal hierdie jaar sy loop neem: dosente en navorsers sal nuwe inligting ontdek en hul kennis met ons studente deel.

 

Waar jy jou ook al in 2020 bevind, die lewe sal voortgaan – soms soos jy dit verwag, en op ander tye met verstommende onvoorspelbaarheid.

 

Kom ons maak die beste gebruik van hierdie “vlieënde” gebeurtenis met sy vele fasette, wat ons tyd noem. Kom ons gebruik elke oomblik om die beste moontlike keuses te maak sodat ons die beste moontlik toekoms kan skep.

 

 

Groete,

 

Nelia en die

NWU & U-span