Moenie vrees nie – die kampus bied aan haar ’n tweede kans deur die Bridging the Mathematical Gap-program.

​

“Hierdie program is daarop gemik om studente te help om hul wiskundeprestasie te verbeter en gee hulle toegang tot graadprogramme wat ’n goeie wiskundige onderbou vereis, soos BCom en BScIT,” verduidelik prof Herman van der Merwe, uitvoerende dekaan van die Fakulteit Ekonomiese Wetenskappe en Inligtingstegnologie.

Stapel genoeg punte op

Soos wat by alle Suid-Afrikaanse universiteite die geval is, moet voornemende NWU-studente ook aan die vereiste Akademiese Prestasieskaal (APS) vir ’n bepaalde graad voldoen.

“Indien ’n voornemende student se APS-telling één punt te min is, of as dit slegs die laer as vereiste punt vir wiskunde is wat toelating verhinder, kan so ’n student voorlopig toegelaat word,” sê me Daleen Gerber, direkteur van die Skool vir Inligtingstegnologie. (Klik hier vir verdere inligting oor die APS.)

Sodra studente die Bridging the Mathematical Gap-program aan die begin van die akademiese jaar geslaag het, kan hulle vir die gewone programme binne die BCom-rigting en BScIT inskryf.

As studente nie die oorbruggingsprogram slaag nie, maar ’n finale punt van tussen 40% en 49% behaal, kan hulle vir een van die uitgebreide programme inskryf wat op kampus aangebied word. (In ’n uitgebreide program versprei studente hulle kursusse oor vier in plaas van drie jaar.)

Al die basiese konsepte

Die oorbruggingsprogram se sillabus dek die basiese wiskundige konsepte wat vanaf Graad 8 onderrig word, en die toepassing van hierdie konsepte in ooreenstemming met die uitkomstes soos uiteengesit in die Graad 12-kurrikulum. In kort: die intensiewe fokus op die hele wiskundige spektrum dien as voorkennis vir die wiskundige modules in die BScIT- en BCom-kurrikulums.

In die geval van ’n graadprogram soos BScIT is wiskunde die hoeksteen van alle natuurwetenskaplike vakke, en in BCom-programme word wiskunde gebruik om logaritmes en eksponensiële funksies te bereken.