Hierdie woorde is waar van al die NWU-personeellede wat by die Skool vir Verpleegkunde se Starfish-projek betrokke is.

 

Dié projek is vernoem na die legende oor die seuntjie wat op ’n strand vol seesterretjies gestaan het en party van hulle in die water teruggegooi het. Toe iemand vir hom sê dit sal nie regtig ’n verskil maak nie, het hy een opgetel en gesê: “Vir hierdie een sal dit wel ’n verskil maak.”

 

Hierdie vierjaarprojek het in Januarie 2018 begin met die hoofdoel om die versorging van pasgebore en ander babas, en kinders tot op die ouderdom van vyf jaar, te verbeter. Die projek, ’n samewerkingsonderneming tussen die NWU en die provinsiale Departement van Gesondheid, het met 50 deelnemers begin.

 

Bemagtig gesondheidsorgkundiges

 

Die projek se doel is ook om gesondheidsorgkundiges en -werkers te bemagtig deur die personeel se vertroue in die verskillende instellings, soos klinieke en hospitale, te verbeter.

 

Nog ’n doelwit is om sentrums van uitnemendheid vir die verskillende funksies ten opsigte van die versorging van pasgeborenes en kinders in Noordwes te vestig.

 

Gesondheidsorgwerkers ontvang die jongste inligting oor fetale ontwikkeling, die evaluering van die pasgeborenes, kindersiektes, voeding, noodsorg vir kinders en die normale ontwikkeling van kinders. Hulle word ook geleer hoe om die ma ná die geboorte te versorg.

 

Voorkom sterftes onder kinders

 

“Van die vernaamste oorsake van kindersterftes en kindermorbiditeit is faktore soos wanvoeding en swak higiëne. Dit kan maklik voorkom word as mense met die nodige kennis toegerus word,” sê prof Welma Lubbe, die projekleier.

 

“Dit is onmoontlik vir ons om regoor die provinsie te reis om moeders op te voed. Daarom wil ons met hierdie projek die gesondheidsorgkundiges en  werkers bemagtig sodat hulle weer ander kan opvoed.”

 

Uitdagings en suksesse

 

Geen projek is sonder uitdagings nie. “Ons het uitdagings soos vervoerkwessies en personeeltekorte, asook ’n gebrek aan geskikte opleidingsentrums, maar ons werk daaraan om dit te bowe te kom,” sê Welma.

 

Die projek word as baie suksesvol beskou. Volgens die terugvoering van klinieke wat in 2018 aan die Starfish-projek deelgeneem het, het dit ’n baie groot verskil gemaak en ’n meer positiewe en doeltreffende werksomgewing geskep.

 

“Die personeel wat ons opgelei het, het teruggegaan en met verskillende inisiatiewe vorendag gekom oor hoe om hul kliëntediens te verbeter,” sê Welma. “Hulle het plakkate gemaak, en tydens hulle tuisbesoeke aan mense behoorlike inligting oor kwessies soos higiëne en voeding gegee.”

 

Grootouers neem ook deel

 

Daar is ook ’n ondersteuningsgroep begin wat oumas leer hoe om pasgeborenes te versorg. Dit het daartoe gelei dat oupas gevoel het hulle word buite rekening gelaat, en toe is ’n groep vir oupas ook gestig.

 

Mites oor hoe om vir pasgeborenes te sorg, is uit die weg geruim, en grootouers het ook die korrekte inligting ontvang oor hoe om mediese noodtoestande te hanteer.

 

“Ek wil almal bedank wat betrokke was om van hierdie projek ’n sukses te maak,” sê Welma.

 

Die Starfish-projek bewys dat al kan ons nie die hele wêreld verander nie, ons ten minste ʼn klein deeltjie daarvan beter kan maak. Kennis kan lewens red, selfs al is dit net een baba op ’n keer. Vir daardie kinders maak dit die wêreld se verskil.