WAAROM BORD-
SPELETJIES MEER AS BLOOT
PRET EN
PLESIER
IS
Nadat hulle hul kreatiwiteitshoede opgesit het, het die spanne tydens die werkswinkel oor tafel- en elektroniese speletjies aan konsepte vir bordspeletjies gewerk.
Om ’n struktuur met ’n malvalekker, kleefband, tou en spaghetti te bou? Maklik, sê die manne wat die malvalekker-uitdaging tydens die bordspeletjiewerkswinkel gewen het. Hulle is David Risinamhodzi, Isaac Takaidza, Lance Bunt en Japie Greeff.
Personeellede wat die werkswinkel bygewoon het, was (agter) Lance Bunt, Japie Greeff, Monique du Plessis, prof Seugnet Blignaut, Marie Preston en Veruschka Pelser-Carstens. In die middel is dr Carolina Islas Sedano, prof Dawid Jordaan, Tanja Eksteen en Liana Venter. Voor is dr Verona Leendertz, Carin Venter, Marelise van der Westhuizen en Noory Yusuf.
As jy dink bordspeletjies beteken net dat jy tyd goed bestee deur iets saam met familie en vriende te doen, moet jy maar weer dink. Bordspeletjies en die ontwikkeling daarvan speel ’n belangrike rol in hoe die nuwe geslag leerders, die sogenaamde millennium-jeug, leer en nuwe inligting en vaardighede bekom.
In die lig hiervan is ’n baie geslaagde werkswinkel oor tafel- en elektroniese bordspeletjies onlangs by die NWU se kampus in Vanderbijlpark gehou, met die pasgestigte navorsingsnisarea, Tegnologiebevorderende Leer en Innoverende Onderwys en Opleiding in Suid-Afrika (TELIT-SA) as die gasheer.
Prof Seugnet Blignaut, wat die TELIT-SA-span lei, sê die werkswinkel het nie net deelnemers gemotiveer om tafelspeletjies te skep nie, maar ook om bestaande vaardighede ten opsigte van die skepping van innoverende en kreatiewe onderrig-en-leer-strategieë te versterk.
Nuuskierig en spelerig
Die wêreldbekende speletjiekundige en -entoesias, dr Carolina Islas Sedano van die Universiteit van Oos-Finland (UEF), was die fasiliteerder by die werkswinkel. Op haar LinkedIn-profiel beskryf Carolina haarself as ʼn nuuskierige leerder, lief vir “leer-deur-spel”, en in haar hart ’n entrepreneur.
Een van die aktiwiteite op die agenda was die “malvalekker-uitdaging”, wat deelnemers uitgedaag het om die hoogste vrystaande struktuur moontlik uit spaghetti, kleefband, tou en ’n enkele malvalekker te bou. Hierdie spesifieke uitdaging het daarop gefokus om vaardighede soos spanwerk, konseptuele en ruimtelike vaardighede, kreatiwiteit en innovering te ontwikkel.
Carolina se belangrikste navorsingsbelangstellings sluit in die innoverende gebruik van tegnologie om uitkomste of ervarings te bereik wat andersins nie moontlik sou wees nie. Sy ondersoek ook maniere om tegnologie te gebruik om betekenisvolle en lekker speel-leer-ervarings te skep, en neem die omgewing in hierdie speel-leer-toepassings in ag.
Die deelnemers aan die werkswinkel het gevra dat ’n opvolgwerkswinkel gehou word om die doeltreffendheid van die gebruik van bordspeletjies in onderrig en leer te ondersoek.
Gebruik tegnologie om leer te bevorder
Navorsers in die navorsingsnisarea TELIT-SA is hard aan die werk om die trefwydte en impak van die entiteit te versterk en uit te bou. TELIT-SA fokus op die teorie en praktyk van leertegnologieë regoor ’n verskeidenheid dissiplines in hoër onderwys. Kortom: daar is ’n toegewyde fokus op die praktyk van tegnologie-ondersteunde leer.
Die deelnemers aan die onlangse werkswinkel het personeellede van die Institute for Serious Games SA (SGI-SA) en die Apps Factory, albei afdelings binne TELIT-SA, asook personeel van die NWU se kampus in Potchefstroom ingesluit. Uitdagings wat studente by die Apps Factory soms aanpak, sluit in om tafelspeletjies te ontwerp en dit dan in mobiele toepassings (apps) te omskep.
’n Voorbeeld van hoe tegnologie benut word om leer te bevorder, is die toepassing (app) wat SGI-SA ’n paar jaar gelede vir die Skool vir Rekeningkundige Wetenskappe, en spesifiek vir die Finansiële Bestuur-module, ontwikkel het. ’n Ander app stel Graad 12-leerders in staat om hulle akademieseprestasieskaal-telling (APS-telling) te bereken en uit te vind watter kwalifikasies by die kampus in Vanderbijlpark aangebied word.
< KLIK VIR MEER INLIGTING >
x
