Focus on

FOKUS

OP

Die NWU is 'n goed geoliede masjien waar personeellede toegang het tot al die hulpbronne wat hulle nodig het om hul werk so goed moontlik te doen. Hierdie hulpbronne, in die vorm van skryfbehoeftes, meubels, hardeware, elektroniese komponente en kositems, kan alles by die universiteit se ten volle funksionerende store bestel word.

In hierdie uitgawe gesels Eish! met die verteenwoordigers van die store op die drie kampusse en ontdek 'n paar interessante feite.

BEWEEG AF

KLIK OP ELKE OBJEK OM MEER TE LEES

KLIK OM TERUG NA BO TE GAAN

V - Wat is die interessantste items wat mense van die store af bestel? A - Op die Potchefstroomkampus is die interessantste items onder andere koekies vir vergaderings en sop. Die mees gesogte item op die Vaaldriehoekkampus is die Stapler Paper Pro, wat met 'n ligte afwaartse drukking tot 20 bladsye kan vaskram. Die elektriesekomponente-stoor op die Potchefstroomkampus is die grootste verskaffer van elektriese komponente in Potchefstroom. Dit is 'n diensverskaffer aan personeel, studente en die gemeenskap. Daar word van tyd tot tyd versoeke vir spesifieke elektroniese komponente ontvang wanneer ingenieurstudente aan projekte werk. “Dis dikwels ongewone komponente wat studente nodig het om van hul droomprojekte 'n realiteit te maak,” sê Sandra Parkin, stoorbestuurder. David Visser van die skryfbehoefte-, hardeware- en meubelstoor op die Potchefstroomkampus sê dat hulle gereeld interessante versoeke kry nadat mense nuwe items in skryfbehoeftewinkels soos CNA gesien het.

V - Wat is die gewildste items in die skryfbehoeftestore? A - Papier word die gereeldste bestel op al drie kampusse. Colleen O’Grady, senior administratiewe assistent vir tegniese dienste op die Vaaldriehoekkampus, sê die meeste bestellings is vir A4-papier. David Visser van die Potchefstroomkampus sê hy en Alfred Plaatjie van die Mafikengkampus ontvang baie versoeke vir fotostaatpapier. “Vir Potchefstroom reik ons elke tweede week gemiddeld 1 660 rieme (500 velle per riem) papier uit.”

V - Vir watter ander voorraad word daar gereeld bestellings geplaas? A - Langlewemelk is 'n buitengewoon gewilde item. Emmerentia Aucamp, bestuurder van die stoor vir kruideniersware en skoonmaakmiddels op die Potchefstroomkampus, sê die stoor verskaf tydens die wintermaande 300 kiste melk per week. Dit is gelykstaande aan 1 800 liter, waarvan die helfte volroom- en die ander helfte laevetmelk is. Die Vaaldriehoekkampus bestel gereeld verversings. Die stoor op hierdie kampus is die enigste een op die NWU wat skryfbehoeftes én verversings aanhou. Batterye is nog 'n populêre item by die stoor vir elektroniese komponente op die Potchefstroomkampus.

V - Is daar enigiets waarvan daar op 'n stadium baie bestel is, maar wat dalk nie meer gebruik word nie? A - David sê dat sommige drukkerpatrone eens op 'n tyd in grootmaat bestel is, omdat daar so baie bestellings voor was. Die ouer drukkers is egter onverwags deur nuwes vervang wat 'n ander soort patroon gebruik. Volgens Emmerentia was vloeibare politoer ook 'n baie gewilde item waarvan hulle genoeg voorraad moes aanhou. Die nuutjie het egter gou alledaags geword en personeel het bloot opgehou om so gereeld daarvan te gebruik.

V - Wat moet personeel in gedagte hou wanneer hulle voorraad bestel? A - Die stoorbestuurders stem saam dat personeel seker moet maak dat hulle hul bestellings by die regte store op die onderskeie kampusse plaas. Dit is ook belangrik om in gedagte te hou dat die store nie die kapasiteit het om items by departemente of fakulteite af te lewer nie. Emmerentia sê personeel is self verantwoordelik vir die afhaal van bestellings. “Die posafdelings op die onderskeie kampusse kan genader word om items te gaan haal indien mense dit nie self kan gaan doen nie. Dit is ook belangrik dat die regte dokumentasie ingevul word voordat bestellings uitgereik kan word.” Die stoorbestuurders vra dat personeel vroegtydig moet bestel as hulle groot hoeveelhede voorraad nodig het. “Kommunikasie is noodsaaklik. As jy weet dat jy 'n bepaalde item oor drie maande gaan nodig hê, is dit wys om die stoorbestuurder te kontak om seker te maak dat dit wel beskikbaar gaan wees.” Hoewel hulle altyd hul bes probeer om te verseker dat daar genoeg van alles is, gebeur dit soms dat daar onverwagse groot bestellings geplaas word en die voorraad opraak. Dit gebeur veral teen die einde van die jaar wanneer departemente die oorblywende geld in hul begrotings wil gebruik om solank goedere vir die volgende jaar aan te koop.

V - Waar kan personeel en studente aanklop indien hulle meer oor die store wil uitvind of bestellings wil plaas? A - Mafikengkampus: Alfred Plaatjie X89 2048 (skryfbehoeftes, kruideniersware, skoonmaakmiddels en hardeware) Potchefstroomkampus: Emmerentia Aucamp X99 1129 (kruideniersware en skoonmaakmiddels) Sandra Parkin X99 4109 (elektroniese komponente) David Visser X99 2653 (skryfbehoeftes, oudiovisuele toebehore, hardeware en meubels) Vaaldriehoekkampus: Colleen O’Grady X10 3140

>

>