YBB
maemo a a kwa godimo ka metlha
A re jeng koma
Mop Dan Kgwadi, motlatsa-mokanseliri le mogokgo wa YBB o ne a gatelela gore le mororo go newa maemo e se mokgele o yunibesiti e o gagamalelang, yunibesiti e ipelela diphitlhelelo tsa yone tsa maemo a e a neilweng.
“A dira gore YBB e nne yunibesiti e e itsegeng kwa dinageng di sele mo Aforika le mo lefatsheng lotlhe, e e tlhomololwang ke mokgwa wa yone wa go ithuta ka natla, e e tsibogelang maemo mo loagong, le boitshwaro jwa yone jwa go amega ka ba bangwe.
“Ga re tlogele diphitlhelelo tseno kwa morago mo leetong la rona la go tswelela ka tiro ya boleng jo bo kwa godimo mo setheong sa thutogodimo.”
Mop Dan Kgwadi, motlatsa-mokanseliri le mogokgo.
Supa mo setshwantshong go buisa go feta.
YBB e itshupile e le setheo sa akatemi se se di gogang kwa pele ka tiro ya maemo a a kwa godimo. Seno se bontshiwa ke diphitlhelelo tsa yone tse di kwa godimo ka gale fa e newa maemo ke ditheo tse di farologaneng tsa boditšhabatšhaba.
Yunibesiti e tsweletse pele go tlhatlogela kwa mankalengkaleng fa e sena go thaya motheo o o siameng mo dingwageng tse di fetileng ka 2018 le 2019. Fa e sa le go simolola ka 2020, yunibesiti e ile ya tlhagelela mo manaaneng a ditheo tse di tlotlegang tsa go naya diyunibesiti maemo.
Maemo ano a akaretsa a e tlhomilweng mo go one ke setheo sa Go Naya Diyunibesiti tsa Lefatshe Lotlhe Maemo Tsa Akatemi ka Phukwi, ke Senthara ya Go Naya Diyunibesiti mo Lefatsheng Lotlhe Maemo (Centre for World University Rankings [CWUR]) ka Seetebosigo, le ke Kgatiso ya Times ya Go Naya Diyunibesiti tsa Lefatshe Lotlhe tsa Thutogodimo Maemo (Times Higher Education [THE]) le ke Diikonomi Tse di Santseng di Fatlhoga Tsa Go Naya Diyunibesiti Maemo ka Tlhakole. Gape e ne e le lekgetlo la ntlha YBB e tlhagelela mo Kgatisong ya THE ya Go Naya Diyunibesiti-Potlana Maemo. Gape re dirile sentle mo maemong a bošeng jaana a re neng re a newa ke THE a go dirilweng kitsiso ka one ka di 20 Lwetse.
Tobetsa bongwe le bongwe jwa boloko jo bo fa tlase go buisa go ya pele ka maemo mangwe le mangwe
Setheo sa maemo a a kwa godimo sa dithuto tsa boleng jo bo kwa godimo
Dithuto tsa boleng jo bo kwa godimo tsa YBB di dirile gore e iponele maemo mo gare ga diyunibesiti tsa ntlha tse 5 tsa mo gae tse di neng tsa newa maemo ke kgatiso ya THE ya Diikonomi Tse di Santseng di Fatlhoga Tsa Go Tlhoma Diyunibesiti Maduo ka Tlhakole.
Ka kakaretso, YBB e ne ya newa maemo a bo 109 mo gare ga diyunibesiti di le 533 mo dinageng di le 47. Kwantle ga YBB, diyunibesiti tse dingwe di le robonngwe le tsone di ile tsa newa maemo.
YBB mo gare ga tsa maemo a a kwa godimo
CWUR e ne ya baya YBB mo go 4,7% e e kwa godimo ya diyunibesiti di le 20 000 lefatshe ka bophara Go ya ka CWUR, YBB ke nngwe ya diyunibesiti di le 922 tse di kwa godimo mo dinageng di le 61.
Gape YBB e a tlhaga mo gare ga tsa ntlha tse 7 mo nageng yotlhe, mme tiro ya yone ya go dira patlisiso e neilwe maemo a bo 877. Seno se naya yunibesiti maduo-kakaretso a 70,8 – e leng phitlhelelo e e gakgamatsang e le tota.
Yunibesiti-potlana ya boleng jo bo kwa godimo
Mo gare ga diyunibesiti di le 350 tsa Kgatiso ya THE ya Go Naya Diyunibesiti-Potlana Maemo, YBB e ne ya newa maemo a go nna nngwe ya tse 101 go ya go tse 150 tse di gaisang tsotlhe. E ne e le lekgetlo la ntlha YBB e akarediwa mo gare ga maemo ano, e leng maemo a a newang diyunibesiti tse di nang le dingwaga di le 50 kgotsa ka fa tlase ga tsone.
Dirutwa tsa boleng jo bo kwa godimo di lekana le thuto ya boleng jo bo kwa godimo
Go ya ka diphitlhelelo tsa setheo sa Go Naya Diyunibesiti tsa Lefatshe Lotlhe Maemo a Tsa Akatemi (ARWU), tse di phasaladitsweng kwa bokhutlong jwa Phukwi, re tsere maemo a ntlha mo serutweng sa mmetshe mo maemong a bosetšhaba/kgaolo mo Aforikaborwa. Tota e bile, YBB ke yone fela yunibesiti ya Aforikaborwa e e tlhagang mo maemong a ntlha bo 500 mo mmetsheng.
YBB e neilwe maemo mo gare ga diyunibesiti tse di kwa godimo mo setlhopheng sa tsa 151 go ya go 200 mo karolong ya disaense tsa lefaufau, melemo ya kalafi, pholo ya setšhaba le kamogelo ya baeng le botsamaisi jwa bojanala. Gape e ne le fa gare ga maemo a bo 301 go ya go 400 mo karolong ya setlhopha sa tsa thuto.
MAEMO a 2021
YBB e itlotlomatsa ka maemo a mangwe a bošeng a e a fitlheletseng a e a neilweng ke THE. Maemo ano a re tsenya mo gare ga diyunibesiti tse di kwa godimo di le 6 mo Aforika Borwa le tse di leng mo gare ga maemo a bo 510 le 600 mo go tse di fetang 1 500 go ralala dinaga le dikgaolo di le 93 tse di neng tsa sekasekelwa maemo a 2021.
Fela jaaka mo ngwageng o o fetileng, re fitlheletse maemo a rona a a kwa godimo mo karolong ya dinopolo – mo karolong eno, re tsentswe mo gare ga diyunibesiti di le 5 tse di kwa godimo mo Aforikaborwa.