Re ile ra botsa badiri-ka-rona ba le mmalwa gore leroborobo leno le amile jang dithulaganyo tsa bone tsa go tsaya malatsi a khunologo gore ba ye malatsing a boikhutso.
Vuyo Sambo
wa Setheo sa Kgwele ya Dinao sa YBB, kwa Khamphaseng ya Mahikeng
1. A go tla kgonega go tsaya malatsi a khunologo, e re ka lefelo la tiro le fetogile e bile go na le sekejule se se ntšha sa ngwaga wa dithuto?
Ee, go a kgonega go tsaya malatsi a khunologo. Motho o tshwanetse go ikhutsetsa tiro (tota le fa o direla mo gae) ka ntlha ya mabaka a pholo le go itapolosetsa tiro ya ka natla e motho a saleng a e dira go tloga kwa tshimologong ya ngwaga.
2. O dirile dithulaganyo dife di sele tsa go ya malatsing a boikhutso monongwaga?
Ka 2020, fela jaaka ka dingwaga tse dingwe, ke ne ke rulaganyeditse go tsaya loeto go ya go hukutsa mafelo a mangwe a mantsi a naga ya rona e ntle. Le fa go ntse jalo, e re ka jaanong re tlhasetswe ke Covid-19, ga ke kitla ke tlhola ke tsaya loeto. Ke dira tshwetso ya gore ke tla fetsa nako yotlhe ke na le ba lelapa la me. Mama o a gola jaanong, ka jalo go tla nna molemo go fetsa nako e ntsinyana ke na le ene monongwaga.
Karen Visser
wa Dithuto tsa Ikonomi tsa dipalangwa le botsamaisi jwa dithulaganyo-kakaretso, wa Khamphase ya Mahikeng
1. A go tla kgonega go tsaya malatsi a khunologo, e re ka lefelo la tiro le fetogile e bile go na le sekejule se se ntšha sa ngwaga wa dithuto?
Ga ke bone. Ke na le bothata fela jwa go iphitlhela ke le mo tseleng e bile dikgwedi di le mmalwa tse di fetileng di dirile gore go nna mo gae e nne lefelo le ke eletsang gore ke bo ke le mo go lone.
2. O dirile dithulaganyo dife di sele tsa go ya malatsing a boikhutso monongwaga?
Dipe. Ke mo malatsing a khunologo a go ithuta mme ke palelwa ke go tlhoma mogopolo mo dithutong tsa me ka ntlha ya gore go sena diura tse di tlhomameng tsa tiro. Ke tlile go tlhoka nako yotlhe e ke e batlang ya go ithuta. Ke tla iteboga fa ke fetsa, fa e le gore ke ka kgona go tshepa lefelo le ke tla bong ke ya kwa go lone!
Relegogile Sekati
Sekolo sa Go Ithuta Boikutlo jwa Badiri mo Tirong le Botsamaisi jwa Lefapha la Badiri , wa Khamphase ya Vanderbijlpark
1. A go tla kgonega go tsaya malatsi a khunologo, e re ka lefelo la tiro le fetogile e bile go na le sekejule se se ntšha sa ngwaga wa dithuto?
Ga ke ise ke tseye malatsi a khunologo fa e sa le totlelelo e simolola. Ke ile ka ba ka tlwaela go direla mo gae le fa go na le dikgwetlho tsa teng tse dintsi.
2. O dirile dithulaganyo dife di sele tsa go ya malatsing a boikhutso monongwaga?
Ga jaanong jaana ke emisitse go sekae ka dithulaganyo tsa malatsi a boikhutso. Ke boifa go rulaganyetsa malatsi a khunologo ka ntlha ya sotlhe se se ntseng se direga. Mme seo se nkhutsafatsa tota. Gantsi mo nakong eno, ke a bo ke setse ke itse gore ke ya kae fa yunibesiti e tswalela go ya malatsing a boikhutso ka Sedimonthole.
Ngaka Re-an Müller
wa Go Maketa le Botsamaisi, wa Khamphase ya Vanderbijlpark
1. A go tla kgonega go tsaya malatsi a khunologo, e re ka lefelo la tiro le fetogile e bile go na le sekejule se se ntšha sa ngwaga wa dithuto?
Ga go kgonege gotlhelele go ya malatsing a boikhutso, mme ke selo se motho a se tlhokang mo nakong eno. Motho o tlhoka go ikhutsetsa tiro jaanong go fodisa tlhogo. Kgwetlho e re nang le yone fa re le mo malatsing a khunologo gone jaanong ke go tila go buisa diimeile le melaetsa ya di WhatsApp.
2. O dirile dithulaganyo dife di sele tsa go ya malatsing a boikhutso monongwaga?
Go tswela kwa ntle go ya go boga tlhago, go palama dithaba ka baesekele, go tsaya maeto a letsatsi go ya kwa toropong – go ikhutsetsa dilo tsa thekenoloji.
Mop Mark Maboeta
wa Setlhopha sa Serutwa sa Boithuta-Diphologolo, wa Yuniti ya Disaense tsa Tikologo le Botsamaisi, wa Khamphase ya Potchefstroom
1. A go tla kgonega go tsaya malatsi a khunologo, e re ka lefelo la tiro le fetogile e bile go na le sekejule se se ntšha sa ngwaga wa dithuto?
Monongwaga, ga re ise re nne le dithulaganyo dipe tsa go ya malatsing a boikhutso mme re tla bona gore maemo a tlile go nna jang malebana le leroborobo go ela kwa bokhutlong jwa ngwaga. Le fa go ntse jalo, re tla dirisetsa nako eo go ikhutsetsa dikgwedi di le mmalwa tse re neng re tshwaregile thata ka tsone (tse di neng di utlwala mo go rona rotlhe e kete ke dingwagangwaga).
2. O dirile dithulaganyo dife di sele tsa go ya malatsing a boikhutso monongwaga?
Gantsi re etela ba losika lwa rona kwa Kapa Bophirima le kwa Kapa Botlhaba ka nako ya malatsi a boikhutso a Sedimonthole. Fa maeto a maleele ano a sa kgonege monongwaga, ditiro tsa rona tsa malatsi a boikhutso di tla akaretsa go dira mo tshingwaneng, go fokotsa lenaane "la ditiro tsa mo teng ga ntlo” le ditiro tsa bojanala kwa Porofenseng ya Bokone Bophirima.
Le fa re ka nna ra se ka ra kgona go tsaya maeto go ya malatsing a boikhutso, re santse re tlile go dirisetsa nako eo go itlhagafatsa gape gore re siamele dikgwetlho tse di larileng kwa pele tsa ngwaga wa 2021 re bo re leba morago kwa ngwageng o bannye le bagolo ba tlileng go o gopola le go fetsa masome a a tlang a dingwaga ba bua ka one.
Ngaka Corrie Rheeder
Mokaedi: wa Botshelo jwa Baithuti, wa Khamphase ya Potchefstroom
1. A go tla kgonega go tsaya malatsi a khunologo, e re ka lefelo la tiro le fetogile e bile go na le sekejule se se ntšha sa ngwaga wa dithuto?
Gantsi ke tsaya malatsi a me a khunologo kwa bokhutlong jwa kgwedi ya Ngwanaitseele go fitlha ka Ferikgong, e leng nako e ka gale re e fetsang re le mo malatsing a khunologo kwa Cape Town.
Ga ke tlhomamise gore a seo se tlile go kgonega mo ngwageng ono, ka gonne morwaake, yo o dirang materiki, o tlile go konela sekolo sa ngwaga ono ka 15 Sedimonthole. Le nna ke tlile go nna mo khamphaseng fa fela go tla bo go santse go na le baithuti – go ka direga gore ba tla bo ba le teng go fitlha kwa bogareng jwa Sedimonthole.
2. O dirile dithulaganyo dife di sele tsa go ya malatsing a boikhutso monongwaga?
Ke akanya gore bogolo re tla tsaya mafelobeke a maleele mme – ka ntlha ya dithibelo tsa go tsaya maeto – bogolo motho a nne kwa gae. Re setse re rulagantse matshelo a rona gore re tseye mesepele e meleele le go tshameka merabaraba ka mafelobeke, fela jaaka e kete re mo malatsing a boikhutso. Gape re dirile tshwetso ya gore re tlile go bogela difilimi tse di monate mmogo mo Netflix.
A re utlweng gore ba rileng.
(Supa mo setshwantshong se sengwe le se sengwe go buisa go feta).
“Rotlhe re ya malatsing a boikhutso, re kgaotsa tiro sebaka sa beke e le nngwe kgotsa tse pedi...”
Kwa tshimologong ya ngwaga, o ka tswa gongwe o ne o opela mmogo le pina eno ya ga Cliff Richards, mme go ise go ye kae, ke fa re dikaganyediwa ke mmaba yo monnye yo o bidiwang Mogare wa korona - ka tsela ya mmatota le ya tshwantshetso.
MALATSING A BOIKHUTSO?
A o sa ntse o tlile go ya
VOX POP