Ditsala tsa rona tse di maotomane di rata totlelelo
Re di bitsa ditsala tsa rona tse dikgolo, bana ba rona ba ba maotomane le ditsala tse di ikhutaganyang mo go rona. Ke lone lebaka la go bo re ba itshwarela fa ba bogola ka nako ya kopano ya Zoom kgotsa fa katse e batla go robala mo godimo ga khiiboto ya rona fa re batla go dira.
Supa mo ditshwantshong go buisa go feta.
Ee, ke diphologotswana tsa rona tsa mo gae tse di rategang – dikatse le dintša tseo mmogo le mefuta ya diphologolo tse dingwe tse di ipolelelang gore re mo gae gore re di tlose bodutu le go fetsa nako e ntsi re na le tsone.
Nngwe ya diphologolo tse di ntseng jalo ke Irish Wolfhound e e bidiwang Luna, wa ga Veruschka Pelser-Carstens wa Sekolo sa Disaense tsa Bobalamatlotlo kwa Khamphaseng ya Vanderbijlpark.
Luna o rata totlelelo
Ga go a lekana go bua fela re re Luna o itumelela go newa tlhokomelo go ya pele mo nakong eno ya totlelelo. O e rata go feta selekanyo!” Veruschka o bolela jalo.
Luna o simolola letsatsi ka go tsosa beng ba gagwe ka go ba tlisetsa “mpho", go simolola ka ya setlepetlepe go fitlha ka setshamekisabana se se boruma sa morwadiabone, e leng Alenka. “Seo ke sesupo sa gore re tsoge re ipaakanye. Ka 08:00 mo godimo ga tlhogo, o tla ka thapo ya gagwe ya mo thamong gore e gokelelwe mo molaleng wa gagwe mme a ye go fokisiwa phefo kwa ntle, e leng selo se re ratang thata go se dira.
“Kwantle ga mosepele wa gagwe wa mo mosong le go ikhutaganya ka dinako fa gare ga ditiro tsa rona tsa letsatsi le letsatsi, le rona re rulaganya nako ya rona sentle go tlhomamisa gore re nna le matlha a go tshameka le ene le bonnakaagwe, e leng Emma le Fleur, ba ba santseng ba na le motsadisi wa bone.”
Go a tlhaloganyesega gore o tshwanetse go rulaganya matlha a go tshameka le ngwana wa gago yo o esi fela e leng ntšanyana ya gago, mme fa di le 10, di dintsi ka mo go lekaneng go tshameka mmogo.
Palo ya dintša (e e gaufi le) di le lesomepedi
Ee, modiri-ka-rona yo mongwe wa kwa Vanderbijlpark, e leng Alma Joubert wa Matlotlo le Dikago, le monna wa gagwe e leng Andre, ba kopanetse ntlo ya bone le “bana ba bone ba ba rategang ba ba maotomane” ba ba seng ka fa tlase ga 10 ka palo.
Alma o a dumela gore go di naya tlhokomelo e e oketsegileng ka nako ya totlelelo go dira gore di se ka tsa fetsa go penapena megatla ka boitumelo. “Fa Andre a tswa a ya tirong ka 06:00 mo mosong, dintša tse di neng di sa kgone go bona phatlha ya go robala mo bolaong bosigo di dirisa tšhono eno go tla go robala le nna go sekae,” o bolela jalo.
“Fa alamo e lela ka 07:15, ke nako ya gore botlhe ba nwe kopi ya kofi e e se nang khafeine e e sa tswang go titielwa. A re bueng boammaaruri: ga go ope yo o kgonang go simolola letsatsi ntle le go nwa kofi!”
Morago ga mo Alma le setlhopha seno sotlhe ba a tswa ba ya kwa kantorong. Ba tswa otlhe fela kwantle ga ga Heidi, Labrador, yo ene a robalang go fitlha ka 10:00.
Mo kantorong, nngwe le nngwe ya tsone e na le lefelo la yone, Cheeky o nna mo seropeng sa ga Alma, Gizmo mo setulong se se fa thoko ga ga Alma mme Chopper ene o nna fa dinaong tsa gagwe ka fa tlase ga tafole. Tse dingwe tsotlhe di nna mo teng ga diroto tsa tsone.
Mme a go a tle go nne le kopano ya Zoom go se dipe tsa tsone tse di bogolang? Ka nako ya dikopano tseno, Cheeky o nna a tlhamaletse mo seropeng sa ga Alma mme o leba khamera. “Ga go gakgamatse go bo Mop Lloyd Conely a amogela Cheeky semmuso jaanong fa re na le kopano ya Zoom mmogo!” go bolela jalo Alma.
1
2
3
4
Diponkaponka tse di weleng go tswa kwa borulelong
Rusty ke “modiri-mmogo” yo o ikanyegang wa ga Mop Dané Coetzee
Dané a re Rusty o tsosolosa mowa wa gagwe ka nako ya totlelelo.
<
>
“Oh diponkaponka tsa me bathong!” go bolela jalo Mop Dané Coetzee wa Sekolo sa Thuto ya Tsamaiso ya Dikarolo-Mmele, Boitlosobodutu le Saense ya Metshameko mo Khamphaseng ya Potchefstroom. Diponkaponka tse di go buiwang ka tsone fano ke Rusty, tsala ya gagwe e e ikanyegang ka nako ya totlelelo.
“O ntse a itumedisiwa thata ke Rusty. O na le nna ka dinako tsotlhe mo kantorong ya me, ga a ke a kgaogana le nna.”
Kwa tshimologong, o ne a kopiwa gore a mo tlhokomele ka gonne o ne a wele go tswa kwa borulelong jwa tsala nngwe ya gagwe mme, fa nako e ntse e tsamaya, ba ne ba mmotsa gore a o ne a ka rata go mo itseela.
O ne a okaoka go sekae gonne o ne a swetswe ke katse setlhogo thata bosheng fela jaana mme o ne a ise a itse gore a o ne a siametse go ka nna le phologotswana e nngwe gape ya fa gae. Mme a utlwa a rata bontle jwa gagwe. “Leba sefatlhegonyana sa gagwe, nka mo gana jang tota?”
O tlhwatswegile pelo gore o dirile tshwetso e e siameng. “Fa ke ikutlwa ke kotlomane pelo ka dinako tse dingwe, o tsosolosa mowa wa me. Ke mo leba gangwe fela ke bo ke nyenya.”
Rolo ke tsala e a tabogang le yone
Nnyaa, Rolo ga se setshwakga e bile ga a bobodu – ke motabogi-mmogo le moithuti e leng Bophelo Seleke.
Rolo can't wait to join Bophelo on his morning jog.
Moithuti e leng Bophelo Seleke o rata tsala ya gagwe ya totlelelo, e leng Rolo.
Jaanong Bophelo Seleke, yo e leng moithuti wa ngwaga wa bofelo wa LLB mo Khamphaseng ya Mahikeng, o direla kwa gae le go ithutela teng, o fetsa nako e ntsi a na le Rolo, ntša ya gagwe ya dikgwedi di le robonngwe e e tsetsweng ke dintša tsa mefuta e mebedi e e sa tshwaneng e leng Labrador-Chow.
“Ke ile ka lemoga gore go tlhakanela ntlo ya me le Rolo ke tsela e e molemo tota ya go itshidila mmele,” o bolela jalo.
Go botlhokwa thata mo go ene go nna a itekanetse. “Go itshidila mmele go diga boima jwa mmele, go tokafatsa maikutlo a gago e bile go felela ka go leba dilo ka tsela e e siameng, e leng maikutlo a rotlhe re tshwanetseng go nna le one jaaka fa re kgabaganya nako ya leroborobo.”
E re ka Bophelo a ne a sa tlhole a kgona go ya kwa jiming, o ne a katisetsa Rolo go tsamaya le ene fa a ya go tshematshema mo mosong. “Jaaka fa motabogi ope a kgona go bontsha, go bodutu ka dinako tse dingwe go tshematshema o le nosi, ka jalo ke itumelela go bo ke na le tsala e ke tshematshemang le yone e leng Rolo.”
Bertie ke moeteledipele wa setlhopha
Dintša tse pedi tsa tlhakantsuke ya ga Bertie Jacobs di lwela go bona tlhokomelo ya gagwe
Tlhakantsuke. Eno ke tsela e Bertie Jacobs wa Lefapha la Dikamano le Dikgwebo le Go Maketa a tlhalosang setlhopha sa dintša tsa gagwe ka yone.
“A o gopola nopolo e e tumileng ele ya mofisika e leng Robert Oppenheimer? Ka 1945, fa a ne a lebile go thunya ga sebetsa sa nyutlelia se a thusitseng go se tlhama jaaka nngwe ya diporojeke tsa kwa Manhattan, o ne a nopola temana ya Sehindu, a re ‘Ke fetogile Loso jaanong, mosenyi wa mafatshe’.
“Eno ke tsela e ke batlang go tlhalosa ka yone Bloekom, Kongo, Ragel le – utlwa gore di kae – dintšanyana tse dingwe tse supa tse ke neng ka tshwanelwa ke go di godisa ka nako ya totlelelo. Ee, Bloekom o tsetse bana ba le supa ba ga Kongo – kgwetlho e e seng kana ka sepe.”
Bertie a re dintša tse ditona di mmereko ka dinako tsotlhe. “Di bogola mongwe le mongwe yo o fetang, di senya sengwe le sengwe se di tlang fa go sone, mme gape go monate go faposetsa mogopolo mo go sengwe se di se dirang…. ee, ka dinako dingwe.
“Fa ke ne ke bua le mokaedi-mogolo wa rona wa lefapha la dikamano le dikgwebo le go maketa, e leng Clement Manoko, ke ne ka mo raya ka re nna ke batla go boela tirong gore ke kgone go ikhutsetsa dintša tsa me. Le fa go ntse jalo katse ya me, Goebs, yone go ntse go le monate tota go nna le yone,” o oketsa jalo.
“Go bua boammaaruri, ke tlile go di gopola tota fa maemo a boela meriting … mme e seng mo tshokologong fa go feta batho ba ba tshematshemang le ba ba iphokisang phefo le dintša tsa bone gaufi le ntlo ya me ka gonne go tla batla gore o ithibe ditsebe.”
Go tlhokomela setlhopha sotlhe sa dikatse
Dikatse tseno ke dingwe tse go dirilweng letsholo la go di tlhokomela kwa khamphaseng ya Mahikeng.
Dikatse tseno ke dingwe tse go dirilweng letsholo la go di tlhokomela kwa khamphaseng ya Mahikeng.
Dikatse tseno ke dingwe tse go dirilweng letsholo la go di tlhokomela kwa khamphaseng ya Mahikeng.
Dikatse tseno ke dingwe tse go dirilweng letsholo la go di tlhokomela kwa khamphaseng ya Mahikeng.
Ngaka Madeleen Struwig ke motlhokomedi yo mogolo wa dikatse tse di tsayang Khamphase ya Mahikeng jaaka legae la tsone.
Ga se ditsala tsotlhe tsa rona tse di maotomane tse di nnileng le lesego la go nna le malapa a batho ka nako ya totlelelo. Ka lesego, dikatse di ka nna 100 tse go dirilweng letsholo la go di tlhokomela mo Khamphaseng ya Mahikeng di na le moengele wa tsone yo o bidiwang Ngaka Madeleen Struwig yo e leng motlhokomedi yo mogolo wa tsone.
Madeleen, wa Disaense tsa Thutatshelo, a re o tshwanelwa ke go reka dijo tse di oketsegileng gore a fepe dikatse ka nako ya totlelelo, ka gonne ga di kgone go ja matlhotlhora a a tlogetsweng ke baithuti, bao gone jaanong jaana ba nang le nako e telele ba seyo.
O tshwenngwa ke gore dikatse tseno di tlile go utlwalelwa ke mariga. “Ke tshwaragane le go di direla maitshubelo a mannye mo khamphaseng moo di tla kgonang go thuthafala gone,” o bolela jalo.
Go tlhokomela setlhopha sa dikatse ke tiro e e jang nako. “Megopo ya metsi le ya dijo e e kwa mafelong a a farologaneng a di fepelwang kwa go one e tshwanetse go tlhatswiwa, dikobo mo teng ga maitshubelo a tsone di tshwanetse go tlhatswiwa le tsone, mme mongwe o tshwanetse go reka dijo le go di isa kwa go tsone.”
Madeleen o itumelela thata thuso e e tswang kwa go ba Tirelo ya Tshireletsego. “Batlhankedi ba tsa tshireletsego ba mafelobonno a marataro ba thusa go tlatsa megopo eno ka dijo le ka metsi mo mafelong ao a di fepelwang mo go, mme seo se mpolokela nako.”
A re mothusa motlatsa-mokanseliri e leng Mop Marilyn Setlalentoa o ne a thusa ka madi a go fagola dikatse gore di se ka tsa ata thata. “Seno se tlile go dirwa ka bonako fela fa badiri ba kwa tliliniking ya diphologolo ba sena go boela tirong ka botlalo.”
Tobetsa mo leotong le lengwe le le lengwe go buisa ka ditsala tsa maotomane tsa maloko a badirammogo.
