Ka go rutiwa le go ithuta mo inthaneteng e le “tlwaelo e e ntshwa”mo YBB, eish! e boditse palo ya baithuti gore maitemogelo a bone a ntse jang ka maemo a.
VOX POP
A re utlweng gore ba reng.
Maitemogelo a baithuti a go ithutela mo inthaneteng
Alfonso Nqunjana
Moithuti wa tsa Tlhaeletsano wa BA, wa Khamphase ya Vanderbijlpark
1. O ka tlhalosa jang maitemogelo a gago ka kakaretso a go ithutela mo inthaneteng ka nako ya totlelelo?
Ga go thata go ithutela mo inthaneteng, mme ke santse ke fitlhela go le thata go tlwaela seo. Ka dinako tse dingwe, seno se ntlogela ke tsielegile ka gonne ke tlhologelelwa go rutwa ke batlhatlheledi ba me ba le fa pele ga me, segolobogolo fa ke sa tlhomamisege ka tiro kgotsa fa ke tlhoka didirisiwa tse di oketsegileng gore ke wetse tiro. Selo sengwe se ke tshwenyegang ka sone ke go sa kgone go lekeletsa tiro e ke e ithutelang go bona gore a ke kgona go e dira.
2. Kgwetlho e kgolo go di feta mo go wena ya go ithutela mo inthaneteng ke efe?
Kgwetlho ya me e kgolo go di feta ke go sa kgone go romela tiro ya me ka nako ka ntlha ya mathata a motlakase kwa gae. Magala a lepothopo ya me le one ga a kgone go tshwarelela lobaka lwa metsotso e le 20, mme seno se dira gore go nne thata go tlanya ditlhamo le dikabelotiro.
3. Ke eng se o se itumelelang thata ka go ithutela kwa gae?
Se ke se itumelelang? Ga go sepe se ke se itumelelang ka go ithutela kwa gae.
Charné Strydom
Moithuti wa Mophato wa Motheo wa BEd, wa Khamphase ya Vanderbijlpark
1. O ka tlhalosa jang maitemogelo a gago ka kakaretso a go ithutela mo inthaneteng ka nako ya totlelelo?
Go monate Go mpolokela nako.
2. Kgwetlho e kgolo go di feta mo go wena ya go ithutela mo inthaneteng ke efe?
Ka dinako tse dingwe batlhatlheledi ba tsenya kabelotiro go setse beke fela re bo re tshwanelwa ke go romela dikabelotiro tse di fetang e le nngwe ka letsatsi le le lengwe. Gape, ke nna le mathata ka dinako tse dingwe ka gonne ga ke na sedirisiwa se se kgonang go tshola tiro e ntsi ka jalo batlhatlheledi ga ba kgone go laisa ditokomane tse di oketsegileng.
3. Ke eng se o se itumelelang thata ka go ithutela kwa gae?
Go bo ke le mo gae! Go dira ka nako ya me ke sa tshwenyege ka ga gore ke tshwanetse go ya tlelaseng. Ka dinako tse dingwe, ke kgona go berekela kwa pele ke sa tlhoke go laelwa pele ke batlhatlheledi gore ke dire jalo.
Esther Koketso Kgaje
Moithuti wa tsa Tlhaeletsano wa BA, wa Khamphase ya Mahikeng
1. O ka tlhalosa jang maitemogelo a gago ka kakaretso a go ithutela mo inthaneteng ka nako ya totlelelo?
Batlhatlheledi ba re naya tiro e ntsi tota e e batlegang ka bonako, ka jalo go bona nako ke kgwetlho. O feleletsa o sena nako ya go ithuta, ka ntlha ya go tsenwa ke letsapa la mogopolo le la mmele.
2. Kgwetlho e kgolo go di feta mo go wena ya go ithutela mo inthaneteng ke efe?
Tiro ya me e thulana le maikarabelo a me a lelapa. Ga ke kgone go ikhutsa ka mo go lekaneng mme ka dinako tse dingwe ga ke kgone go fitlhelela matlha a a beilweng ka ntlha ya letsapa la mogopolo.
3. Ke eng se o se itumelelang thata ka go ithutela kwa gae?
Ke itumelela go nna kgakala le modumo wa baithuti ba ba ntikologileng. Ke kgona go akanya sentle le go ipelela tšhono ya go dira kgatelopele ke le nosi. Gape ga ke tlhologelelwe kabelo ya go dira le setlhopha. Le fa go dira le sone go ka nna ga fokotsa tiro, go ntima tšhono ya go fenya mathata le go ikakanyetsa.
Masego Seleke
Moithuti wa BSc ya Saense ya Ditshedinnye le Thutatshelo ya Khemeseteri, wa Khamphase ya Mahikeng
1. O ka tlhalosa jang maitemogelo a gago ka kakaretso a go ithutela mo inthaneteng ka nako ya totlelelo?
Ke ne ke sa tlhomamisege kwa tshimologong gore ke ne ke ikutlwa jang. E re ka ke tllwaetse nako ya fa baithuti ba kopane le motlhatlheledi, ke ne ke ipotsa gore a ke ne ke tlile go tlhaloganya dikgopolo ka tsela e e tshwanang e bile ke tshwenyega ka go romela dikabelotiro tsa me, ka gonne gotlhe go ne go tla direlwa mo inthaneteng. E re ka jaanong go fetile nako e ntsi ka mo go lekaneng, ke ritibetse jaanong. Ka ntlha ya go bo yunibesiti e re neile deitha, ke ntse ke kgona go dira tiro ya me ya khoso ka nako le go romela dikabelotiro tsa me ka nako.
2. Kgwetlho e kgolo go di feta mo go wena ya go ithutela mo inthaneteng ke efe?
Ga ke a nna le dikgwetlho ka gonne ke nna le deitha (e yunibesiti e re nayang yone) le sedirisiwa sa mmobaele se se nthusang gore ke se ka ka salela kwa morago ka dikitsitso tse di amanang le diteng-thutole ditekolo.
3. Ke eng se o se itumelelang thata ka go ithutela kwa gae?
Go sa tlhoke gore ke tsoge ke tswe mo gae ke ye go tlhatlhelelwa. Ke kgona go ithuta le go romela dikabelotiro ke ntse ke le mo bothithong jwa dipejama tsa me.
Sinéad Eastes
Moithuti wa BCom ya Go Maketa le Botsamaisi, wa Khamphase ya Potchefstroom
1. O ka tlhalosa jang maitemogelo a gago ka kakaretso a go ithutela mo inthaneteng ka nako ya totlelelo?
Go na le melemo le masula a gone. Go nnile le dikgwetlho tsa gone, mme le gale ga se tse di maswe go le kalo. Ka kakaretso fela, ke itumelela go dira jalo!
2. Kgwetlho e kgolo go di feta mo go wena ya go ithutela mo inthaneteng ke efe?
Kwa tshimologong, ke ne ke tsielegile fela thata go se sepe se ke tlhomamisegang ka sone ka gonne ke ne ke sa itse gore ke ne ke tlile go fetsa semesetara sa me jang. Go sa tlhomamisege ka dilo dingwe go ne go dira gore go ithutela mo inthaneteng go se nne monate le eseng e bile go ne go ntshwenya thata mo mogopolong. Gantsi go ne go lebega go sa kgonege go nna ke rotloetsegile le go tlhotlheletsega go dira ka natla.
Fa nako e ntse e tsamaya, ke ne ka swetsa ka gore ke se ka ka leba seno jaaka kgwetlho, mme jaaka tšhono. Ka jalo, gone jaanong ke ka bolela gore ga ke na dikgwetlho tse dikgolo – ke ditšhono tse di dirang gore ke dire ka natla thata mme ke lebane le sekgoreletsi sengwe le sengwe ka maikutlo a a siameng.
3. Ke eng se o se itumelelang thata ka go ithutela kwa gae?
Mariga a gorogile mme se mongwe le mongwe a se itumelelang gone jaanong ke go sa tswe mo dikobong go sa le gale mo mosong go ya tlelaseng. Gape ke rata go dira ka lebelo la me, le go itlhomela thulaganyo ya me ya tiro e e tla tsamaisanang le maikarabelo a me a letsatsi. Ke na le nako e e lekaneng ya go ipaakanyetsa ditlhatlhobo le dikabelotiro, e leng sengwe se ke neng ke na le bothata ka sone pele ga ke ithutela mo inthaneteng.
Molebo Mose
Moithuti wa BEd, wa Khamphase ya Potchefstroom
1. O ka tlhalosa jang maitemogelo a gago ka kakaretso a go ithutela mo inthaneteng ka nako ya totlelelo?
Go ntsere nako gore ke tlwaele go ithutela mo inthaneteng. Fa o ipaakanyetsa tlelase, o reetsa motlhatlheledi o tla o ntse o kwala dintlha fa baithuti ba kopane le motlhatlheledi, go ithutela mo inthaneteng go go batla se se fetang seo. Mme, go sa kgathalesege gore kgwetlho ke e e kana kang, ke ne ka tshwanelwa ke go amogela maemo a ma ntšha ka mogopolo o o bulegileng le go dira se se tlhokang go dirwa gore ke falole dimmojule tsa me.
2. Kgwetlho e kgolo go di feta mo go wena ya go ithutela mo inthaneteng ke efe?
Dikgwetlho tsa me tse dikgolo go feta tsotlhe e ne e le go bona nako le ditshenyegelo tsa deitha. E re ka go ithutela mo inthaneteng go batla patlisiso e e tseneletseng, ke ne ke tlhoka deitha gore ke tsene mo dipolatefomong tse dingwe tsa thuto gore ke dire patlisiso ya dikabelotiro tsa me. Go bona nako le gone go ne go se motlhofo. Ke tshwanetse go boloka tekatekano fa gare ga ditiro tsa legae, go ipha nako le ba lelapa la me, go ithuta le go wetsa dikabelotiro.
3. Ke eng se o se itumelelang thata ka go ithutela kwa gae?
Se ke se itumelelang thata ke go kgona go fetofetoga le maemo. Go ithutela mo inthaneteng go ntetla go itlhomela lebelo le ke tla dirang dilo ka lone fa ke ithuta. Gape ke rata gore go ithutela mo inthaneteng ga go na matsapa – ke kgona go tswelela ke ithuta fa fela ke na le sedirisiwa sa mmobaele.
(Supa mo setshwantshong se sengwe le se sengwe go buisa go feta).