Mop Petra Bester, mokaedi wa Yuniti ya Aforika ya Dirutwa tse di Farologaneng ya Patlisiso ka Pholo (Africa Unit for Transdisciplinary Health Research [AUTHeR]) mo Khamphaseng ya Potchefstroom, a re totlelelo ya naga yotlhe e tliseditse porofense nako ya go ipaakanyetsa go runya ga mogare ono.

 

“Re dirisa nako e e botlhokwa thata eno ka katlego go dira gore porofense e nne mo boemong jo bo siameng,” a rialo, e bile o oketsa ka gore YBB e motlotlo go bo puso ya porofense e tsaya malebela mo bokgoning jo YBB e nang le jone.

 

Mo masimologong a kgwedi ya Moranang, NWDoH e ne ya kopa thuso mo setlhopheng seno.

 

Tiro ya ntlha ya setlhopha seno ke go lebela pele gore mogare o tlile go anama ka selekanyo se se kae mo porofenseng (ditebelelo pele tsa go anama ga leroborobo leno) gore puso ya porofense e kgone go romela didirisiwa gotlhe kwa di tla tlhokegang gone. Sa bobedi, ba tlhama sefalana-tshedimosetso se se dirisiwang ke botlhe go bona mafelo a matshwao a bolwetse a bonalang kwa go one gore go dirwe diteko kwa go one.

 

Maitemogelo a a jaaka go thubega ga Titanic

 

Porojeke eno e amile Petra fela thata. A re ditlamorago tse go bonalang di tlile go nna gone tsa leroborobo leno di ne di tshosa fela thata fa setlhopha se sena go dira diphopholetso tsa ntlha dibeke di le pedi morago ga totlelelo.

 

“Di ne di tsitsibanya mmele. Fa batho mo teng ga mmedia wa botsalano ba ne ba sa tseye mogare ono masisi, re ne re itse gore go bona ditshwantsho mo thelebišeneng tsa go fitlhwa ga baswi ka bontsi kwa dinageng tse dingwe go ne go ka nna ga direga le mo porofenseng ya rona.”

 

O a bitsa maitemogelo a a jaaka go thubega ga Titanic. “Sekepe se thubegile bokafatlase jwa sone mme se tsena metsi. Setlhopha sa rona sa namolo se dira se sa kgaotse go ntshetsa metsi kwa ntle, okhesetera e ntse e tshameka mme baeng ba ba sa lemogeng sepe bone ba tantsha mo phaposing ya bojelo. Tiragalo eno e amana le COVID-19.  Go tla bonala fa nako e ntse e tsamaya gore ditlamorago tsa mogare ono di tlile go nna dikgolo go le go kae, o tlile go anama ka lobelo lo lo kae le gore o tlile go bolaya batho ba le bantsi go le go kae.

 

Tiro ya ka natla ya setlhopha e dirile gore go simololwe letsholo mo baaging le le bidiwang Cobuntu (Cobuntu: go lwantsha leroborobo la COVID-19 ka Ubuntu).

 

Go laola maikutlo a rona ka dinako tse di thata

 

Go nna mongwe wa badiri ba ba di gogang kwa pele ga ga Petra mo go lwantsheng leroborobo leno go ka dira gore nako eno ya totlelelo e nne bodutu le go feta mo go ene, le fa a tshwaregile thata ka tiro.

 

“Maikatlapelo a mmele a a fetofetoga mme diura tsa ka gale tsa tiro le go dira go ya ka thulaganyo e e beilweng ga go tlhole go dira. Go tsenela sekolo ga bana mo gae le tiro ya mo gae le tsone di a ema.

 

Go gopola thuso e e botlhokwa e e dirwang ke setlhopha seno ke gone go dirang gore motho a rotloetsege go tswelela ka tiro “Ke ineetse gore ke thuse batho go fitlhelela bokgoni jwa bone ka botlalo gore rotlhe re kgone go itemogela pholo e e botoka."

 

A re fa a simolola go nyema mooko, o thusiwa ke go golagana le batho ba ba amegang thata ka ba bangwe.

 

Kgakololo e a e nayang badiri – segolobogolo basadi – ba ba tshwaregileng ka diporojeke tse di gwetlhang ke go fetofetoga le maemo le go dira dilo kgato ka kgato. “Ga go ope mo go rona yo e leng makgonatsotlhe, e bile ga go ope yo o lebeletseng seo mo go wena.”

 

Ka dinako tse dingwe go a thusa go sekaseka dilo pele ka kelotlhoko. “Sekaseka pele gore ke eng se se botlhokwa mme o boe gape o eteletse tsa botlhokwa kwa pele fa o na le tiro e ntsi thata mo godimo ga teseke ya gago. Lebana le boammaaruri jwa gore ke eng se se botlhokwa.

Ka tsela eno, ga a iteege tsebe fa a ntse a okametse setlhopha fa se ntse se tswelela pele go diragatsa seabe sa sone sa go lwantsha kgwetlho e kgolo eno e e tlhagetseng batho.