Go ne go ipelwa tota ka Diawate tsa Maemo a a kwa Godimo tsa Baithuti ba Nako e e Fetileng tsa 2019. Go tswa ka fa molemeng ke Frederik Louw, moamogedi wa awate ya go nna le seabe mo baaging; Caster Semenya, metshameko; Pieter Twine, go nna le seabe mo baaging; Elmarie Myburgh, tirelosetšhaba; Mop Alta Schutte, patlisiso; Maggy-Emelia Maliti-Ntshwe, boeteledipele jwa kgwebo; Mmahati Mmutlana, yo o neng a amogela awate ya tsa thuto mo boemong jwa kgaitsadie, e leng Mop Mamokgethi Phakeng; Nomsa Mazibuko, moithuti yo mmotlana wa nako e e fetileng, le  Anri van der Linde yo o neng a amogela awate ya botsweretshi le setso mo boemong jwa ga rraagwe, Johan van Rensburg.

YBB e akgola bagaka ba yone

 

 

Baithuti ba nako e e fetileng ba YBB ba di  goga kwa pele e bile ke batlhomasekao ba ba ntshang ga tshwene mo ditirong tsa bone. Yunibesiti e ne ya akgola setlhopha se se gaisitseng botlhe sa baithuti ba nako e e fetileng kwa moletlong wa diawate wa di 11 Diphalane kwa Sandton.

Moletlo o o tumileng wa Diawate tsa Maemo a a kwa Godimo tsa Baithuti ba Nako e e Fetileng o ne wa akgola baithuti ba nako e e fetileng ba le robongwe ba ba tlhomologileng ba ba tlhomileng sekao se se molemo sa go thusa mo gare ga maloko a setšhaba, mo nageng yotlhe ya rona le kwa dinageng di sele.

 

Baamogedi ba diawate ba ngwaga ono ke Maaforikaborwa a a itsegeng a a di gogang kwa pele mo ditirong le mo dikgaisanong tsa mefuta e e farologaneng.

 

Ba akaretsa seopedi; motsamaisa-kgwebo yo o atlegileng; mogaka wa thuto ya boleng jo bo kwa godimo; motho wa ntlha yo o tsayang kgato ya go diragatsa maikarabelo a gagwe mo gare ga maloko a setšhaba; moeteledipele yo o nang le tlhotlheletso mo go tsa thuto; motlhama ditshwantsho tsa dikebekwa; mmatlisisi yo o nang le bokgoni; mogaka wa metshameko; le mokwaladikgang mo teng ga mmedia wa botsalano.

 

Go ne go na le ditlhopha di le robedi tsa diawate, mme se le sengwe sa tsone (sa go nna le seabe mo baaging) e ne e na le sa bafenyi ba le babedi.

 

Diawate tsa Baithuti ba Nako e e Fetileng tse di melediwang mathe di ne tsa newa baithuti ba nako e e fetileng  ba ba tshwanelwang ke tsone.

 

Baamogedi ba tsone ba nako e e fetileng ba akaretsa Maaforikaborwa a a tlotlegang a a jaaka Rre FW de Klerk, Mop Anis Karodia, Moatlhodi Yvonne Mokgoro, Ngaka Bismark Tyobeka, Mop Pieter Stoker, Rre Katlego Maboe, Moatlhodi Frans Kgomo le Mop TT Cloete, gareng ga ba bangwe.

MME BAFENYI KE:

  • AWATE YA BOTSWERETSHI LE SETSO

    Rre Johan van Rensburg, seopedi le motlhagisi wa mananeo a thelebišene. (BUISA GO FETA)

  • AWATE YA MOETELEDIPELE WA KGWEBO

    Moh Maggy-Emilia Maliti-Ntshwe, mmakgwebo yo o atlegileng. (BUISA GO FETA)

  • AWATE YA NNA LE SEABE MO BAAGING

    Rre Frederik Louw, motlhatlheledi yo o tlotlegang yo o rotloetsang thuto ya boleng jo bo kwa godimo. (BUISA GO FETA)

  • AWATE YA NNA LE SEABE MO BAAGING

    Rre Pieter Twine, mokoleka madi yo o tlhagafetseng yo o tsayang kgato ya go diragatsa maikarabelo a gagwe mo gare ga maloko a setšhaba. (BUISA GO FETA)

  • AWATE YA THUTO

    Mop Mamokgethi Phakeng, moeteledipele yo o nang le tlhotlheletso mo go tsa thuto yo gape e leng Motlatsa-Mokanseliri wa yunibesiti ya Aforikaborwa. (BUISA GO FETA)

  • AWATE YA TIRELOSETŠHABA

    Moh Elmarie Myburgh, motlhama ditshwantsho tsa dikebekwa yo o nang le maitemogelo a Tirelo ya Sepodisi sa Aforikaborwa. (BUISA GO FETA)

  • AWATE YA PATLISISO

    Mop Alta Schutte, mmatlisisi wa YBB yo o lwantshang bothata jwa kgatelelo ya madi. (BUISA GO FETA)

  • AWATE YA METSHAMEKO

    Caster Semenya, mogaka wa boditšhabatšhaba wa metshameko yo o robileng rekoto ya lefatshe. (BUISA GO FETA)

  • AWATE YA MOITHUTI YO MMOTLANA WA NAKO E E FETILENG

    Moh Nomsa Mazibuko, mogaka yo e leng mokwaladikgang mo teng ga mmedia wa botsalano. (BUISA GO FETA)

Morago ga go abela mo moketeng wa katlego wa Diawate tsa Baalumni badirammogo ba ba Kgolagano ya Korporatifi le Go Maketa ba ne ba ithabisa mmogo.  Bone go tswa kwa morago mo molemeng ke Willie du Plessis, Annette Willemse, mokaedi Warren Makgowe, Mokaedi Khuduthamaga Clement Manoko, mokaedi Louis Jacobs, Sam Mbatha, Suré Honiball, Mpo Malefane le Nicolize van der Walt. Mo pele go na le Gregory Sekobotsane, Tshegofatso Lekabye, Christi Cloete le René Vermeulen.

 

 

 

Go kgontsha batho go gatela pele

 

Fa Mop Kgwadi a ne a bua kwa moletlong wa diawate, o ne a re YBB e gatetse pele sentle ka boikemisetso jwa yone jwa go sa ipone tsapa go dira tiro ya boleng jo bo kwa godimo le ya tlhamosešwa.

“Boikemisetso jo re nang le jone ka baithuti ba rona bo nonofile go feta pele. Yunibesiti ya rona – yunibesiti ya lona – e gatetse pele.

 

“Bošeng jaana re ne ra fitlhelela maduo a mantšha fa Times Higher Education World Rankings e ne e dira kitsiso ya gore YBB e fitlhile mo maemong a botlhano mo Aforikaborwa.”

 

Mo lefatsheng lotlhe, YBB e bewa mo maemong a a fa gare ga 501 le 600 mo gare ga diyunibesiti di le 1 396 tse di tsayang karolo. Maduo ano a ne a theilwe mo ditshupong tsa ka fa yunibesithing e dirileng ka gone: go ruta le go ithuta, patlisiso, dinopolo, go tlisa dilo tsotlhe ka fa tlase ga taolo ya boditšhabatšhaba le ka fa diintaseteri di amegang ka gone.

 

A re leano le leša la YBB le thulaganyo ya setlamo, tse di neng tsa amogelwa dingwaga di le pedi tse di fetileng, di dirile gore yunibesiti e nonofe go ya pele le go nna seoposengwe fela thata.

“Re dirisa leano la rona le thulaganyo ya rona jaaka motheo wa go tlhama boleng le go tlhomelela batho gore ba gatele pele: gore ba fitlhe kwa mankalengkaleng a go gagamalela mekgele ya bone.”

 

 

Re sale morago