TSEPA GO

 

E re ka re setse re itemogela phetogo ya lekgetlo la bone ya diintaseteri, lefapha la Thekenoloji ya Tshedimosetso (Information Technology (IT)) la YBB le leka ka bojotlhe go tlhofofatsa botshelo jwa baithuti le jwa badiri.

 

IT e atolositse laesense ya yone ya Gartner mo badiring le mo baithuting botlhe, e dira gore maloko a yunibesiti a bone tshedimosetso ka ponyo ya leitlho.

 

 

Rre Boeta Pretorius, mokaedi-mogolo wa lefapha la Thekenoloji ya Tshedimosetso la YBB, a re Gartner e ka go thusa go nna o golagane le badiri ba ditshekatsheko ba le diketekete le dithaka tse di fetang 60 000 ba ba ka go thusang ka matshwenyego a gago, ka ditshwetso le ka go go kaela.

Mo go Gartner® go go naya tshedimosetso ka ponyo ya leitlho

eish! e ne ya bua le Mokaedi-mogolo wa IT ya YBB Boeta Pretorius ka Gartner ka ga gore e tla solegela badiri le baithuti molemo jang..

 

P: Gartner ke eng?

K: Gartner ke setlamo se se di gogang kwa pele sa boditšhabatšhaba sa patlisiso le bogakolodi.

 

Ba tsepa mogopolo mo go direng patlisiso le mo tshedimosetsong e e leng ka ga thekenoloji ya tshedimosetso, lefapha la tsa badiri, dikgang tsa semolao, dithekiso le ditirelo, puisano le go maketa, dikgwebo tse di tlamelang ka dikumo le theko le tlhamosešwa mmogo le ditogamaano.

 

Patlisiso le diathikele tsa bone di bua ka bakhuduthamaga, setlhopha sa botsamaisi se se kwa godimo, se se mo magareng le se se kwa tlase. Dimmenejara tseno di ka dirisa tshedimosetso go dira ditshwetso tse di botlhale, ka sekai, ka go batla ditirelo dingwe go tswa go batlamela ka ditirelo.

 

P: Ke eng se se dirang gore Gartner e farologane le ditlamo tse di gaisanang le yone?

K: Gartner e na le ditlamo di le mmalwa tse di gaisanang le yone, mme bontsi jwa tsone ga se tse dikgolo go le kalo. E re ka go na le mekgatlho e e fetang 15 000 e e dirisang mokgatlho ono, go bonala sentle gore ke one o o gaisang e mengwe yotlhe mo kgannyeng ya go dira patlisiso le ka go tlamela ka tshedimosetso. Diathikele tsa bone le patlisiso ke tsa boleng jo bo kwa godimo e bile di boteng.

 

P: Mesola ya go dirisa sedirisiwa seno ke efe?

K: Lefapha la rona la IT le na le dingwaga di le dintsi le dirisa Gartner gore le nne le kitso ya gore thekenoloji ya ka moso le tshedimosetso ya teng di tlile go nna jang. Gape re e dirisetsa go bona kgakololo ka dilo tsa setegeniki, segolobogolo fa re tshwanelwa ke go dira ditshwetso tsa lobaka lo lo leele tsa diranta di le dimilione-milione.

 

Go na le tshedimosetso e e seng kana ka sepe ka Gartner e e tla solegelang baithuti le badiri ba le bantsi molemo.

 

Badiri ba patlisiso le ba akatemi kwa yunibesiting ba tla kgona go rulaganyetsa dikhoso tse di maleba le tsa tlhamosešwa. Ba tla kgona go fitlhelela deitha le tshedimosetso e e ka dirisiwang go tshegetsa bosupi jwa bone jwa patlisiso.

 

Go tla dirwa gore baithuti ba kopane le maemo a go dirwang patlisiso ka one a dilo tse tota di diragetseng mo kgwebong, dilo tse gantsi di diregang le go newa dikgakololo ke bomankge le go tlhaloganya sentle gore ditlamo di fetotse jang ditsamaiso tsa tsone gore di oketse lotseno lwa tsone lwa madi, go fokotsa ditshenyegelo le go oketsa dishere mo mmarakeng.

 

P: Baithuti le badiri ba ka fitlhelela Gartner jang?

K: O ka kgona go tsena mo saeteng ya bone fano, o dirisa khunololamoraba ya gago ya ka gale ya YBB le nomore ya moithuti kgotsa ya modiri.