Tiragalo eno ya ngwaga le ngwaga ke ya go akgola batlhatlheledi ba ba gaisitseng botlhe ba YBB. Awate e e kwa godimo ga tsotlhe ya ngwaga ono e neilwe motlhatlheledi kwa khamphaseng ya Potchefstroom, Mop Alfred Henrico wa Legoro la Disaense tsa Ikonomi le Botsamaisi, yo o gapileng Awate ya Maemo a a kwa Godimo a go Ruta (Distinguished Teaching Excellence Award [DTEA]).

 

Awate ke ya go akgolela tiro ya ka natla

"Ke ikutlwa ke le motlotlo e bile ke lebogela YBB awate eno fela thata. Porokeramo ya ITEA ya yunibesiti e dira sentle tota. Boikaelelo jwa yone ga se fela go putsa ba ba dirileng tiro ya maemo a a kwa godimo ya go ruta, mme gape e thusa go tlhabololo dikgono tsa go ruta tsa batlhatlheledi." Alfred a re o leboga badiri-ka-ene botlhe le baithuti ba a ithutileng mo go bone. "Ke bone ba nthusitseng go dira kgatelopele – seno se ka bo se sa kgonega fa e ne e se ka bone."

 

O leba awate ya DTEA e le moputso wa tiro ya gagwe ya ka natla le go ikaelela ga gagwe go tlisa diphetogo mo matshelong a baithuti le go gatela pele ga bone jaaka baeteledipele ba mo isagweng mo Aforikaborwa.

 

Ditlhopha di le tharo tsa tiro ya maemo a a kwa godimo

Diawate di ne tsa ntshiwa ka ditlhopha tse tharo: Diawate Tsa Maemo a a Kwa Godimo tsa Go Ruta tse di Tlhagogang (Emerging Teaching Excellence Award [ETEA]), Awate ya Go Ruta ga Maemo a a kwa Godimo (TEA) le DTEA.

 

Baakatemi ba le somamane le borobedi ba amogetse diawate. Legoro la YBB le le tlhagisitseng bontsi jwa bafenyi e ne e le la Dithuto tsa Mekgwa ya Batho mo khamphaseng kwa Vanderbijlpark, e yone e nnileng le bafenyi ba le robedi. Morago ga moo, mo maemong a bobedi e ne e le mogoro a Diatshe le Disaense tsa Pholo kwa khamphaseng ya Potchefstroom a lengwe le lengwe la one le nnileng le diphenyo di le thataro. Legoro la Thutabomodimo la khamphase le ne le tsaya maemo a boraro ka diawate di le tlhano.

 

Diawate tseno ke tsa go leboga batlhatlheledi ka ntlha ya boineelo jwa bone jwa go atlegisa baithuti, le go rotloetsa badiri ba akatemi gore ba gole mo tirong ya go ruta le go ithuta.

Ono ke ngwaga wa boraro wa go aba diawate go tswa mo ditlhopheng tse tharo.

 

Ka fa tiro ya maemo a a kwa godimo e lekanngwang ka gone

Batsayakarolo mo go abiweng ga diawate ba tshwanetse gore ba fitlhelele 80% ya setlhopha seno mo setlhopheng ka sengwe. Ba tshwanetse go romela potefolio e e dirilweng ka kelotlhoko jaaka bosupi jwa ditiro tsa bone tsa go ruta le go ithuta, e bile ba tshwanetse go bewa leitlho ka nako ya bobotlana ditšhono di le pedi tsa go ithuta, mme ga go kitla go dirwa kitsiso epe ka e nngwe ya tsone.

 

Go lebeletswe gore batsayakarolo ba Awate ya TEA le bone ba neele dipuo kwa kopanong ya baakatemi ya ngwaga le ngwaga ya khamphase kgotsa ya legoro ya go ruta le go ithuta.

 

Diphotefolio tsa bone tse di akanyeditsweng ka kelotlhoko di atlholwa ke ditlhopha kgotsa ke diphanele tse di nang le baemedi ba Kemonokeng ya Setheo ya Tlhabololo ya Akatemi (Institutional Academic Development Support [ADS]) le bagakolodi ba go ruta ba ADS go tswa kwa dikhamphaseng tse tharo tsa YBB.

 

Diphotefolio tse di akanyeditsweng ka kelotlhoko tsa bafenyi ba DTEA di atlholwa mo teng ga setheo le kwa ntle ga setheo.

 

Go fenya ga tiro ya maemo a a kwa godimo le ya tlhamosešwa

Mop Dan Kgwadi, motlatsa-mokanseliri, a re YBB e motlotlo tota ka boleng jwa baakatemi ba yone. "Ke lona lo dirang gore re kgone go solofetsa baithuti ba rona ditlhatlhelelo tsa boleng jo bo kwa godimo."

 

Sebui sa moeng kwa tiragalong eno, e leng Ngaka Diane Parker, mothusa-mokaedi kakaretso wa thuto ya yunibesiti ya Lefapha la Thutogodimo le Katiso, o ne a akgola baakatemi ba YBB ka ntlha ya tiro ya maemo a a kwa godimo e ba e dirang go rotloetsa go ithuta. "Go ineela ga lona go dira tiro ya maemo a a kwa godimo le ya tlhamosešwa le go rata thata ga lona tiro ya go ruta le go ithuta ruri go tla atlegisa baithuti e bile go re rotloetsa rotlhe fela," o ne a bolela jalo.