Thulaganyo Gaoshubele, NWU-alumnus en president van die Suid-Afrikaanse Sokkerspelersunie (SAFPU), se doel is om die belange van professionele sokkerspelers in al hulle klubs te beskerm.

 

Thulaganyo, wat in Schweizer-Reneke – een van Noordwes se weggesteekte dorpies – gebore is, het in 1994 by die destydse Universiteit van Noordwes vir ’n BCom-graad ingeskryf.

 

Hy sê die universiteitservaring het hom as persoon heeltemal afgerond. “Ek het alles gedoen wat ’n student moontlik kan doen – van politiek tot skoonheidswedstryde. Die massavergaderings wat gewoonlik by die Great Hall plaasgevind het, was een van die hoogtepunte van my jare op universiteit.”

 

“My tyd by die universiteit is nie net ’n voetnoot in my lewe nie. As ek terugkyk op my studentelewe het ek geen twyfel dat dit een van die dinge is wat my gevorm het om die persoon te wees wat ek vandag is nie. Ek het meer bewus geraak van my regte en ek het die reg beter leer waardeer,” sê Thulaganyo.

 

’n Terugkeer na groener weivelde

 

Thulaganyo het in 1998 vir ’n kort tydperk van ses maande by die Black Management Forum (BMF) aangesluit. “Teen die einde van daardie jaar was dit genoeg, en ek het ’n meer vervullende en interessante reis met sokker aangepak.  Ek het vir spanne gespeel soos Silver Stars FC, Classics FC, Umthata BushBucks FC, Amazulu FC en Hellenic FC.”

 

Hy het op die ouderdom van 29 jaar sy sokkerstewels opgehang toe hy in 2004 as adjunk-sekretaris-generaal by SAFPU aangesluit het en deur die range gevorder het tot by sy huidige posisie as president.

 

Hou talle balle in die lug

 

Sy rol sluit in dat hy as hoofonderhandelaar vir die unie optree, strategiese leierskap verskaf, en aan die hoof staan van die unie se internasionale kantoor wat vir die organisering van verenigings in Suider-Afrikaanse lande verantwoordelik is.

 

Benewens hierdie take is hy ’n raadslid van die federasie van internasionale verenigings van professionele sokkerspelers in Afrika (Federation of International Associations Footballers Professionals (FIFPro) Africa).

 

Hoewel sy sokker deesdae nie op die veld gespeel word nie, is daar geen twyfel oor sy liefde vir en toewyding aan hierdie pragtige spel nie – ’n passie wat lank gelede in sy studentedae gekweek is.