Elkeen van The Muffineers het ’n toegewysde taak. Tshepiso (links) hanteer al die administratiewe take, Mohapi (in die middel) is in beheer van die bakkery, en Thato (regs) hanteer die verkope en bemarking van die gebakte lekkernye.

Vir The Muffineers smaak en ruik sukses baie soos botterroom, vanielje, sjokolade en aarbei.

Alumnus Tshepiso Maimane en studente Mohapi Motaung en Thato Moeng van die NWU se kampus in Vanderbijlpark is die lewende bewys dat entrepreneurskap ’n lewensvatbare loopbaanopsie vir universiteitstudente en gegradueerdes is.

 

In 2018 sal dit vyf jaar wees sedert Tshepiso, Thato en Mohapi vir die eerste keer hulle voorskote aangesit en ’n baksel muffins gebak het wat hulle aan die personeel en studente wou verkoop.

 

Min het hulle geweet hierdie poging om fondse in te samel om hulle studiegeld te help betaal, sal in ’n winsgewende besigheid verander, met kliënte wat van klasmaats en huweliksbeplanners tot kieskeurige koffiewinkels wissel.

 

Vandag is Tshepiso ’n trotse alumnus van die NWU nadat hy sy BCom-graad in eonomie en risikobestuur in 2016 en ’n honneursgraad in risikobestuur in 2017 verwerf het. Thato en Mohapi is albei BCom-studente en studeer onderskeidelik bemarking en ekonomie, en risikobestuur.

 

“Ons omstandighede bepaal nie wie ons is nie”

 

Die driemanskap het lank gelede besluit dat hulle nie die slagoffers van hulle swak finansiële omstandighede sal word nie.

 

Toe hulle by die universiteit aankom, kon hierdie drie vriende – wat mekaar as eerstejaarstudente ontmoet het – nie met die geld wat hulle van die huis ontvang het, die mas opkom nie.Die idee om muffins te bak en te verkoop is tydens ’n gesprek rondom middagete gebore toe hulle nie ’n maaltyd by die kafeteria kon bekostig nie. Volgens Tshepiso het die gesprek gou in ’n dinkskrum oorgegaan om maniere te kry om ekstra geld te maak sodat hulle maaltye kon bekostig.

 

“Ons het geweet dat ons self iets aan ons situasie moes doen,” verduidelik Tshepiso, en voeg by dat hulle elke idee wat hulle gehad het teen hulle gekombineerde toelaes moes opweeg. Dit was toe dat Thato gesê het hy weet hoe om muffins te bak en die bestanddele relatief goedkoop is. Die drie lag hardop toe hulle hul eerste baksel onthou: 36 muffins wat hulle kampus toe gebring het om etenstyd saam met hulle vriende te geniet.

 

Die soet smaak van oorwinning

 

Dit was nie lank voordat die storie versprei het nie, en die studente het tougestaan om hulle muffins te koop. “Hulle sê honger is die beste kok,” lag Mohapi, en sê in The Muffineers se geval was honger die dryfveer om hulle die soet smaak van oorwinning te laat proe – letterlik en figuurlik.

 

Hulle het pligsgetrou elke oggend sesuur opgestaan – ongeag of hulle klas toe moes gaan of nie – om muffins te bak. The Muffineers verkoop elke week tussen 300 en 500 muffins en gebruik elke maand 150 kilogram meel, 684 eiers en 32 liter kookolie! Hulle kliënte stem beslis met hulle slagspreuk saam dat die lewe eers begin as jy jou eerste muffin geproe het.