“’n Mediese skool vir die NWU sal help om die universiteit te posisioneer as een van die topdrie universiteite in Suid-Afrika, en dit sal baie help om al die ander fakulteite van die instelling te versterk,” sê Awie.

 

Hy glo dit sal veral ’n deurslaggewende groeipunt vir die NWU se kampus in Mahikeng wees, aangesien dit ook hierdie kampus in staat sal stel om te groei en verder uit te brei.

 

Hy sê ’n mediese skool sal ook die kliniese opleidingsplatform van die fakulteit versterk en sy kliniese navorsingsprogramme verryk. “Al die bestaande programme in die fakulteit sal by hierdie bykomende opleidingsgeriewe baat. Dit sal beslis nuwe paaie vir verdere nuwe professionele grade oopmaak.”

 

’n Eiesoortige mediese skool

 

Awie verduidelik dat die skool ’n gedesentraliseerde-opleidingsbenadering sal volg, aangesien dit studente binne-in gemeenskappe sal plaas. “Dit sal help om die bepaalde behoeftes van die Suid-Afrikaanse gesondheidsorgomgewing te dien.

 

“Ons sal met ’n program van die hoogste gehalte en standaard mediese praktisyns oplei wat vir die Suid-Afrikaanse konteks relevant is.”Hy sê die voorgestelde model sal sterk op menslike kapasiteit steun, asook op nuwe tegnologiese en kliniese benaderings.

 

Gesondheidswetenskappe is gereed om die mediese skool ’n werklikheid te maak. Hy sê hulle het reeds die meeste hulpbronne, infrastruktuur en toerusting om die skool mee te begin. “Tien gedesentraliseerde sentrums by distriks- en streekshospitale sal by die opleidingsprogram betrokke wees en sal die bestaande kapasiteit van die fakulteit geweldig versterk.”

 

Die taak wat voorlê…

 

Awie sê die huidige groot taak is om so veel as moontlik nasionale belanghebbers van die privaat- sowel as van die openbare sektor betrokke te kry. “Ons sal ook die skool internasionaal bevorder en is besig om internasionale belanghebbers te identifiseer.”

 

As dit alles in plek val en die NWU die groen lig kry, kan die universiteit binnekort die voorkeuropleidingsinstelling wees vir diegene wat ’n bydrae op mediese gebied wil lewer.