VOX POP
Die tyd toe dosente voor volgepakte lesinglokale gestaan het, is verby – ten minste tot ná die Covid-19-pandemie.
Met aanlyn onderrig en leer as die “nuwe normaal” by die NWU, het eish! ’n paar dosente gevra hoe hulle dit ervaar en watter terugvoer hulle van hul studente ontvang.
Steil aanlynleerkurwe loop op en af
Kom ons kyk wat hulle sê.
Dr Fortunate Mokoena
Dosent, Biochemie, Fakulteit Natuur- en Landbouwetenskappe, Mahikengkampus
1. Wat is jou grootste uitdaging met aanlyn onderrig?
Ek het gevind dat aanlyn onderrig baie opwindend is, maar dat daar ’n paar klein struikelblokke is wat ’n mens moet oorkom, soos om ’n video ’n paar keer oor op te neem. Dit kan ook baie onpersoonlik wees.
2. Wat is jou aangenaamste ervaring of verrassing met betrekking tot aanlyn leer?
Die geweldige getal modaliteite en studio’s wat ’n mens kan gebruik om inligting en inhoud oor te dra. Die kletskamerinteraksie met studente is ook nogal lekker.
3. Hoe reageer jou studente oor die algemeen op hierdie nuwe manier van onderrig?
Hulle is verbasend aanpasbaar; hulle is betrokke en neem baie meer deel as wat ek verwag het. Die aanlyn leergeleentheid het vir hulle soveel meer selfvertroue gegee om vir my terugvoer te gee.
Tshepang Molale
Dosent, Kommunikasiestudies, Fakulteit Geesteswetenskappe, Mahikengkampus
1. Wat is jou grootste uitdaging met aanlyn onderrig?
My grootste uitdaging is konnektiwiteit en die netwerk. Ek bied my klasse twee keer per week op die Zoom-platform aan, en soms moet ek en my studente as gevolg van netwerkprobleme herhaaldelik inteken. Ek het ook besef dat die meeste studente ná ’n ruk ophou om weer in te skakel en dan het ek net ’n paar oor om die sessie mee af te sluit.
2. Wat is jou aangenaamste ervaring of verrassing met betrekking tot aanlyn leer?
Ek het opgelet dat studente – ongeag die huidige Covid-19-situasie – ’n poging aanwend om te leer en leermateriaal met mekaar te deel. Ek het gesien dat hulle gretig is om selfgerigte leer toe te pas en dat hulle selfs materiaal wat met ons vakinhoud te doen het en wat hulle self in die hande gekry het na ons sessies bring.
3. Hoe reageer jou studente oor die algemeen op hierdie nuwe manier van onderrig?
Hierdie nuwe model van onderrig is uitdagend, aangesien dit (as gevolg van probleme met konnektiwiteit) nie 100% van ons studente bereik nie, maar ek het vertroue in die alternatiewe planne wat vir studente sonder internettoegang geskep is (byvoorbeeld die opsie van die papiergebaseerde materiaal wat gestuur word).
Dr Roxanne Bailey
Senior lektor, Rekenaarwetenskap vir Onderwys, Fakulteit Opvoedkunde, Potchefstroomkampus
1. Wat is jou grootste uitdaging met aanlyn onderrig?
Studente het verskillende vlakke van selfgerigteleer-vaardighede – party kan verantwoordelikheid vir hulle eie leer aanvaar, maar ander verwag nog om “met ’n lepel gevoer te word” en vind die oorgang na aanlyn leer redelik moeilik. Dit is dus nogal uitdagend om hierdie studente te help. Ek is egter trots op die vordering wat sommige studente gemaak het om hierdie uitdaging die hoof te bied.
2. Wat is jou aangenaamste ervaring of verrassing met betrekking tot aanlyn leer?
Die aangenaamste ervaring was om te sien hoe sommige studente die uitdaging aanvaar om selfgerig te leer. Hoewel ek steeds daar is om hulle te lei en te ondersteun waar nodig, kan ek duidelik sien dat party begin besef dat hulle leer en toekoms ook in hulle eie hande lê.
3. Hoe reageer jou studente oor die algemeen op hierdie nuwe manier van onderrig?
Studente is beslis angstig en ek kan sien dat party van hulle werklik deur die hele ervaring ontmoedig is. Ek dink egter die meeste studente is besig om hulle te vestig in hierdie “nuwe” manier van dinge doen, en dat die angs mettertyd sal afneem.
Dr Re-An Müller
Programleier en senior lektor, Bemarkingsbestuur, Fakulteit Ekonomiese en Bestuurswetenskappe, Vanderbijlparkkampus
1. Wat is jou grootste uitdaging met aanlyn onderrig?
Om tussen die kinders en die huistake deur tyd te vind.
2. Wat is jou aangenaamste ervaring of verrassing met betrekking tot aanlyn leer?
Tegnologie kan ons nader aan mekaar bring. Ek voel nou dat ek deur ons WhatsApp-kommunikasie meer as ooit met my studente verbind is.
3. Hoe reageer jou studente oor die algemeen op hierdie nuwe manier van onderrig?
Baie positief – hulle geniet hierdie nuutgevonde vryheid van “klasbywoning” in hul eie tyd en teen hul eie tempo.
David Chuku Taole
Junior lektor, Rekenaarwetenskap en Inligtingstelsels, Fakulteit Natuur- en Landbouwetenskappe, Vanderbijlparkkampus
1. Wat is jou grootste uitdaging met aanlyn onderrig?
Eerstens mis ek my studente baie en ek het nou baie waardering vir die tyd wat ek in die klas met hulle kan deurbring. Wat aanlyn onderrig betref, is my grootste uitdaging dat ek nie seker is of die studente die werk wat ek vir hulle gee ten volle verstaan nie. Onder normale omstandighede is dit maklik vir ’n student om na jou toe te kom wanneer hulle ’n probleem het; nou moet studente ook bykomende uitdagings, soos konnektiwiteit, data en ’n gebrek aan toestelle, hanteer.
2. Wat is jou aangenaamste ervaring of verrassing met betrekking tot aanlyn leer?
Ek is nie aan ’n kantoor gebonde nie, en ek kan buite sit terwyl ek werk! ’n Bykomende bonus is dat ek nie vroeg hoef op te staan vir ’n 07:30-klas nie. Ek moet erken, om met studente via stemnotas in die eFundi-kletskamer, direkte boodskappe en WhatsApp te kommunikeer, maak werklik die ervaring beter.
3. Hoe reageer jou studente oor die algemeen op hierdie nuwe manier van onderrig?
Dit is nie altyd maklik om my studente se reaksies te bepaal nie, aangesien sommige van hulle nie daarop fokus om met my te kommunikeer nie, maar eerder om werkopdragte in te dien om hul modules te slaag. Dié wat kommunikeer, sê dit is ’n uitdaging om by die huis te studeer – hetsy dit is omdat hulle nie die regte toerusting het nie, met konnektiwiteit sukkel, of met ander kwessies tuis gekonfronteer word. As dosent is ek bekommerd wanneer my studente nie gereeld met my kommunikeer nie.
Karabo Mangwekea
Dosent, Taalonderwys (Setswana), Fakulteit Opvoedkunde, Potchefstroomkampus
1. Wat is jou grootste uitdaging met aanlyn onderrig?
Sommige studente vind dit moeilik om ’n stabiele internetverbinding vanaf hul onderskeie huise te kry – iets wat buite hul beheer is. Ander neem baie lank om te reageer op materiaal wat op die eFundi-ruimte gelaai word, en as gevolg daarvan word die inhoud/kurrikulum nie betyds en doeltreffend gelewer nie.
2. Wat is jou aangenaamste ervaring of verrassing met betrekking tot aanlyn leer?
Die aangenaamste ervaring is dat ek besef dat sommige studente positief op die 4de Industriële Revolusie reageer. Die meeste van my studente het skootrekenaars en is ook aktief op die WhatsApp-vakgroepe wat ek geïnisieer het. Ek het nog altyd my ondersteuning getoon en hulle wys ook dat hulle in alle opsigte saamwerk.
3. Hoe reageer jou studente oor die algemeen op hierdie nuwe manier van onderrig?
Die meeste van die studente – veral die eerstejaars wat vir die kontakleweringsmodus ingeskryf is – is ongemaklik met die nuwe stelsel van onderrig en leer wat ingestel is. Tot dusver is hulle reaksie egter belowend, aangesien hulle in hierdie stadium wel belangstelling en toewyding toon.
(Klik op elke foto om meer te lees.)