VOX POP
Hul terugvoer het gewissel van “frustrerend” en “uitdagend” tot “produktief” en “leer nuwe tegnologiese vaardighede aan”.
Inperking: pak die bul by die horings
Dit is ’n paar van die reaksies van ons personeellede toe eish! hulle tydens die staat van inperking gevra het oor hul ervaringe om van die huis af te werk, en hoe die inperking hul gesinslewe beïnvloed het.
Kom ons kyk wat hulle sê.
( Klik op elke foto om meer te lees.)
Dr Zimbili Mkhize
Dosent, Chemie-vakgroep, Fakulteit Natuur- en Landbouwetenskappe, Mahikeng
“Die afsonderingstydperk is frustrerend en my produktiwiteit word onderbreek deur ’n gesukkel met die internet, huishoudelike take en hulp aan my dogter met haar skoolwerk wat sy elke dag moet ingee.
“Dit is ook frustrerend omdat die laboratoriums – ’n noodsaaklike deel van chemie – gesluit is.
“Op ’n positiewe noot kan ’n mens fokus op die aanleer van tegnologieë en tegnieke vir e-leer. Vir my en my gesin is dit ook ’n tyd om mekaar beter te leer ken, aangesien dit ons dwing om 24 uur per dag in mekaar se geselskap te wees.”
Prof Nnesi Kgabe
Direkteur: Navorsingsondersteuning, Potchefstroom
“Ek slaag daarin om die tyd wat gewoonlik deur vergaderings opgeneem word, te gebruik om die meeste beplanning, verslagdoening, en verwante aspekte van my werk in te haal.
“Ek kan ook meer fokus, aangesien ek nie meer bekommerd hoef te wees om die risiko van blootstelling vir my spanlede tydens werksure te bestuur nie.
“Dit is as gevolg van die aard van hul werk (noodsaaklike dienste) nie moontlik om by al my gesinslede te wees nie. Ons slaag egter daarin om met behulp van die beskikbare kommunikasietegnologie met mekaar in kontak te bly.”
Dr Manuela Fernandes-Martins
Senior akademiese ontwikkelaar, Sentrum vir Onderrig en Leer, Vanderbijlpark
“Hoewel ons gewoonlik meer ondersteuning van aangesig tot aangesig aan dosente en studente verskaf, is my werk van die huis af produktief.
“My kollegas en ek ervaar goeie leierskap van ons direkteure; ons werk met ’n plan, en motiveer mekaar in hierdie uitdagende tyd.
“Tuis lees my gesin en ek baie meer nuus en bly ons ingelig oor Covid-19. Ons het ook in hierdie tyd gesien dat mense werklik omgee.
“My man verrig noodsaaklike dienste en werk ook van die huis af. Ons kind sien ons toewyding en ons maak ’n punt daarvan om met tussenposes tyd saam deur te bring. Ons is dankbaar dat ons met ons familie kan Skype.”
Dr Piet Ntema
Dosent, Vakgroep Statistiek, Fakulteit Natuur- en Landbouwetenskappe, Vanderbijlpark
“Ek moet erken die staat van inperking is uitdagend, aangesien dit nie moontlik is om vinnig by iemand se kantoor in te stap en hulp te vra wanneer jy dit nodig het nie. Aan die ander kant leer dit ’n mens dissipline en om daardie dinge waartoe ons nou nie so maklik toegang het nie, te waardeer.
“Ek woon nie by al my gesinslede nie, en om in ’n staat van inperking te wees, maak dit moeilik om as ’n gesin saam tyd deur te bring.”
Elize van der Westhuizen
Administratiewe assistent, Aansoeke en Toelatingskantoor, Vanderbijlpark
“By die Toelatingsdepartement help ons hoofsaaklik aansoekers wat ons kantore besoek. Tydens die staat van inperking moet ons hulle met behulp van e-posse help en sommige funksies is nie van die huis af toeganklik nie. Dit beteken waarskynlik dat ons meer tyd daaraan sal moet bestee wanneer die staat van inperking verby is.
“Die staat van inperking het ook ’n impak op my gesinslewe.
“Ek is swanger en ek is bekommerd oor my en my baba se gesondheid. As tweedejaar-NWU-student is ek bekommerd oor kwessies soos dat ek nie klas toe kan gaan nie, dat ek selfstudiemetodes moet gebruik, en of ons toetse en eksamens sal kan skryf. Ek vertrou egter deur al hierdie dinge op God en die krag van gebed.”
Prof Jeanetta du Plessis
Adjunkdekaan: Navorsing en Innovasie, Fakulteit Gesondheidswetenskappe, Potchefstroom
“Dit is belangrik om tydens die staat van inperking met my kollegas kontak te hou en hulle te laat weet ek is bereid om hulle te help. Ek het ook weer kontak gehad met internasionale kollegas wat soort van ‘verlore geraak’ het tydens die rotteresies.
“Nog ’n positiewe uitkoms is dat ek verskeie tegnologiese vaardighede verkry het wat ek nie voorheen gehad het nie … ons Baby Boomers moes baie vinnig leer!
“Met nog net my seun wat by ons woon, mis ek regtig my dogters en my skoonseun, en om daardie familielede te besoek wat hierdie jaar ‘afsonderingsverjaarsdae’ moes vier. Ek geniet dit egter om saam met my man, Johann (van Navorsingsondersteuning), in ons eetkamer te werk, wat nou in ’n tuiskantoor omskep is.”
Vincent Eastes
Kantoor- en projekbestuurder in die kantoor van die Adjunk-visekanselier: IT en Potchefstroomkampusbedrywighede
“Dit is baie uitdagend om tydens die staat van inperking by die normale kantoorure te hou, en dit is vereis dissipline, maar dit is ook baie ontspannend om buite te sit en werk.
“Ek is baie dankbaar vir IT se infrastruktuur en ondersteuning. Hulle maak dit so maklik om van die huis af te werk, maar ek waardeer die geweldige harde werk en toewyding van daardie kollegas agter die skerms.
“Snaaks genoeg, die staat van inperking het ’n baie positiewe invloed op my gesinslewe.
“Die dinamiek van ’n huishouding van ses mense 24/7 is nogal ’n uitdaging, maar ons hanteer elkeen se persoonlikheid en ’n skedule van take maak die lewe makliker. Dit het ons beslis nader aan mekaar gebring en ons geleer om mekaar se persoonlike ruimte en verwagtinge te respekteer!”
Thulani Phakathi
Hulpbronassistent vir onderrig en leer, Sentrum vir Onderrig en Leer, Mahikeng
“Om van die huis af te werk, was aanvanklik ongemaklik as gevolg van die verandering in werksruimte en -omgewing. Ek moes volgens ’n behoorlik beplande daaglikse skedule werk, wat die lewe makliker en die werk meer doeltreffend gemaak het.
“Ek raak soms so meegevoer met my werk dat ek vergeet van middagete en uitvaltyd. Ek probeer nog ’n balans handhaaf tussen tyd vir my werk en tyd vir my gesin. Gelukkig woon ek op die oomblik alleen, dus is ek redelik aanpasbaar ten opsigte van noodsaaklike werk tydens hierdie tydperk.”
Reagan Bahetane
Kampusradiostasie-bestuurder, Studentelewe, Mahikeng
“Die afsonderingservaring is redelik verfrissend en dit leer my om my tyd doeltreffend aan te wend en te bestuur. Die eerste drie dae het hul eie aanpassingsuitdaging gehad, maar tot dusver verloop alles vlot.
“My gesin en ek begin die tyd waardeer wat ons het om aan mekaar te bestee, en ons het nader aan mekaar gekom as ooit tevore.”
Corrie Landsberg
Bemarker, Bemarking en Studentewerwing, Mahikeng
“As bemarkers is dit belangrik om met leerders kontak te behou en hulle op hoogte te hou van hul aansoekstatus. Aangesien hulle nie almal internet het nie, gebruik ons meestal die WhatsApp-platform.
“Tydens ons Maandagvergaderings via Vidyo kyk ons bemarkers na foute wat insluip, en deel ons inligting. Maar hopelik kan ons die kurwe van infeksies saam laat afplat en na ons normale werksomgewing terugkeer. Sosiale kontak sal lekker wees.
“Met drie kinders tussen ses en twaalf jaar … moet ek nog iets byvoeg oor die lewe tydens die staat van inperking? As wetenskaplikes nie vinnig ’n entstof ontwikkel nie, sal ouers dit beslis doen. Gelukkig hou die skoolwerk en take in die huis hulle besig.”