Die NWU-vakkundige in ekonomie op die kampus in Mahikeng, prof Olebogeng David Daw, verstaan die publiek se frustrasie. “Om die ekonomiese groei in die land te bevorder en aan die gang te hou, het ons betroubare energievoorsiening nodig,” sê Olebogeng.

 

Hy is passievol oor sy spesialisasieveld in hulpbron- en ontwikkelingsekonomie. Dit dek die areas van kragstelsel-ekonomie en ekonomiese beplanning – ’n gebied van beduidende betekenis vir Suid-Afrikaners te midde van die voortgaande kragvoorsieningskrisis.

 

Olebogeng het in 1990 as voltydse student by die voormalige Universiteit van Noordwes aangesluit, maar het toe gekies om deeltyds te studeer terwyl hy by die universiteit se finansiële departement gewerk het om sy gesin te onderhou.

 

Sy vroeë jare

 

Olebogeng, wat tans sy eerste boekaanbod finaliseer, is in Kimberley in die Noord-Kaap gebore, waar hy ook grootgeword het. Hy was die derde van vyf kinders wat deur hulle ma grootgemaak is.

 

“Nadat ek my eerste graad as deeltydse student voltooi het, het ek ’n beurs gekry om ’n MSc in ekonomiese beplanning by Wits te doen. Ek het in 1999 as dosent in die Departement Ekonomie na Mahikeng toe teruggekeer, waarna ek ’n beurs gekry het om ’n PhD aan China se South Western University of Finance and Economics te doen,” onthou hy.

 

Oor sy keuse van spesialisasie sê Olebogeng: “Ek wil beleide ontwikkel wat werkloosheid en armoede onder Suid-Afrikaners sal verlig.”