Met ondersteuning en inspirasie aan studente en dosente, is die personeel van die Sentrum vir Onderrig en Leer (SOL) die noodsaaklike ratte wat die wiele in die klaskamers aan die draai hou.

 

“Ons uiteindelike doelwit is om akademiese personeel te inspireer om hul onderrig- en leervaardighede te verbeter, en om akademiese steun aan studente op hulle pad na sukses te verskaf,” sê hoofdirekteur prof Willie van Vollenhoven.

 

Met ’n fokus op strategie, bedryfsplanne en begroting, bestuur en koördineer Willie alle funksies van die SOL.

 

Ná verlede jaar se herstrukturering en die herbelyning van aktiwiteite, fokus die SOL nou meer op fakulteitsteun en professionele ontwikkeling, en het die sentrum nou minder van ’n kampus- of silo-ingesteldheid, sê Willie.

 

Die sentrum se drie direktorate fokus onderskeidelik op onderrig- en leerondersteuning, gesentraliseerde funksies, en gespesialiseerde projekte en navorsing.

 

Vier domeinkoördineerders maak seker dat die kernbesigheid van die SOL op die voorpunt bly en koördineer die werk oor die drie direktorate heen.