Pieter, wat die Suid-Afrikaanse studentesewesspan afrig, rig ook die spanne van die Luiperds Sewes en die NWU Sewes af.

Afrigting is sy passie en ’n nauurse stokperdjie wat goed by sy werk as dosent by die NWU inpas. Hy is die programleier en ’n dosent in afrigtingkunde.

Van klaskamer na die sportveld

Nadat hy aan die voormalige Potchefstroomse Universiteit vir Christelike Hoër Onderwys (PU vir CHO) studeer het, het Pieter vier jaar lank as onderwyser in Suid-Afrika en in die buiteland gewerk.

Hy het in 2002 as dosent teruggekeer na sy alma mater, wat teen daardie tyd die saamgesmelte NWU was.

Sy afrigtingsloopbaan het geblom. In 2012 het die universiteit hom as die NWU Sewes se afrigter aangestel en daardie jaar het hulle tweede in die Varsity Sport-toernooi geëindig.

In 2013, toe hy die Luiperds Sewes begin afrig het, het dié span die nasionale kampioenskap in Kimberley gewen.

In 2014 het hulle die tweede plek in die internasionale toernooi in Zimbabwe behaal, waar net die Blitzbokke sterker as hulle in die finaal was. Die Luiperds het ook by 2014 se nasionale kampioenskap ’n silwermedalje gewen.

Resep vir rugbyglorie

Pieter glo aan harde werk, goeie voorbereiding en wedersydse respek.

Sy raad aan spelers is om nooit te dink dat jy alles weet nie. “Jy kan dalk iets waardevols leer wat jy later in jou gewone lewe kan gebruik.

“Dit is ook belangrik om te onthou dat die persoon wat jy die moeilikste wen, dié een is wat nooit moed opgee nie. Wees daardie persoon – moet nooit handdoek ingooi nie.”