Hierdie personeel doen meer
as net hul deel
Die NWU het toegewyde personeel wat heelwat meer doen as wat van hulle verwag word. In hierdie artikel van Eish! se tweedemyl-reeks gee ons erkenning aan kollegas wat ʼn verskil maak in ander mense se lewens.
Christi Bester
Christi Bester, finansiële administratiewe beampte van die Fakulteit Opvoedingswetenskappe op die Potchefstroomkampus, se volharding en toewyding het ʼn groot indruk gemaak op prof Josef de Beer, navorsingsprofessor verbonde aan die Skool vir Natuurwetenskappe en Tegnologie vir Onderwys. “Toe ʼn besoekende postdoktorale student van die VSA probleme ervaar het met die rekenaar waarmee sy moes werk, het Christi gesien dat die rekenaar nog onder waarborg was. Die rekenaaragentskap het nie saamgestem nie en laat weet dat die herstelkoste amper R8 000 sou beloop. Christi het dit nie sonder meer aanvaar nie; hy het die nodige dokumentasie bymekaargekry en regsadvies ingewin. Die uiteinde is dat die rekenaar gratis reggemaak is.”
Sonette Spangenberg
Dr Diana Viljoen benoem ook vir Sonette Spangenberg, rooster- en skeduleringsbeampte op die Vaaldriehoekkampus, wat erkenning verdien vir die feit dat sy altyd bereid is om te help met enige roosterverwante kwessies.
“Sy trek gereeld ʼn haas uit ʼn hoed om ons te akkommodeer met klasse en lokale.”
Mari-lize van Zyl, Lebohang Motaung, Nombulelo Kumalo, Junior Mthimkhulu
Mandi Wallace, bestuurder van die Sentrum vir Voortgesette Professionele Ontwikkeling (SVPO), benoem die SVPO-span bestaande uit Nombulelo Kumalo, finansiële beampte, Lebohang Motaung, administratiewe beampte, Junior Mthimkhulu, bemarkingsbeampte en Mari-Lize van Zyl, administratiewe beampte, vir die goeie werk wat hulle doen. “Ons is ʼn klein departementjie wat derdegeldstroominkomste genereer deur alle kortkursusse op die Vaaldriehoekkampus te administreer. My span genereer groot volumes werk.” Mandi sê hulle is baie toegewyd en loop beslis die tweede myl. “Ek het nog nooit so ʼn gemotiveerde span teëgekom nie. Hulle is altyd bereid om te help en doen wat ook al nodig is om ʼn projek suksesvol te implementeer.”
Bertus Roux
Vinnige optrede aan die kant van dr Bertus le Roux, bestuurder vir gevorderde-grade-administrasie en -plegtighede op die Potchefstroomkampus, het daartoe gelei dat die NWU R30 000 minder as die oorspronklike kwotasie betaal het toe die uitwerking van Brexit (die Verenigde Koninkryk se besluit om die Europese Unie te verlaat) die wêreldekonomie getref het. Rudi van der Merwe, projekkoördineerder vir tegnologieoordrag en gemeenskapsverbintenis in die Institusionele Kantoor, is vol lof vir Bertus se tydsberekening met die nuwe bestelling vir graadsertifikate van die diensverskaffer in die VK om voordeel te trek uit die verswakking van die Britse pond ná die referendumuitslae in die VK.
Martie Esterhuizen
Dr Diana Viljoen, vakvoorsitter vir risikobestuur en senior lektor in die Skool vir Ekonomiese Wetenskappe op die Vaaldriehoekkampus, sê Martie Esterhuizen, hoofbibliotekaris van die kampusbiblioteek, is ʼn ware wonderwerker.
“Haar geduld is iets om te aanskou. Sy kry dit reg om artikels op te spoor wat ek nooit sou vind nie. Martie hanteer al ons navrae, ongeag of dit één of 10 per dag is.”
Beula de Beer
“Na vier en ʼn half maande se kraamverlof kon ek net terugkom en aangaan met my werk sonder enige krisisse om uit te sorteer.” Reinette Koekemoer, senior administratiewe beampte van die Skool vir Natuurwetenskappe en Tegnologie vir Onderwys op die Potchefstroomkampus, sê Beula de Beer, senior administratiewe beampte, het al haar daaglikse take oorgeneem terwyl sy weg was.
“Sy het dit én haar eie werk gedoen – sonder enige hulp. Sy het nooit oor die ekstra werk gekla nie en aangehou om haar werk met ʼn glimlag te doen.”
Indien jy 'n kollega wil nomineer wat nooit skroom om ekstra moeite te doen nie, stuur asb 'n e-pos aan willie.duplessis@nwu.ac.za. Onthou om jou postitel en die naam van jou departement of skool, sowel as dié van die genomineerde, by die e-pos in te sluit. Gee ook redes waarom jy dink die persoon die tweede myl loop.