Pukfm-stasiebestuurder nou lid van die Bright Stars-klub

Potchefstroomkampus - Me Amoré Truter, stasiebestuurder van Pukfm, die Potchefstroomkampus van die Noordwes-Universiteit (NWU) se studente-radiostasie, is onlangs tydens die MTN Radiotoekennings by die Sandton Konvensiesentrum deur Jeremy Mansfield as lid van die Bright Stars-klub benoem.

Dié klub vereer jong individue in die radiobedryf wat hul merk maak en vir wie daar ʼn belowende toekoms voorspel word, en ʼn meer verdienstelike kandidaat kon hulle nie gekies het nie.

Onder Amoré se bekwame hand het Pukfm van nét ʼn kampusradiostasie gegroei tot ʼn toenemend belangrike rolspeler in die gemeenskap.

Unieke wetenskap-toestelle vul groot leemte

Potchefstroomkampus - Unieke laboratorium-toestelle is deur chemici van die Fakulteit Natuurwetenskappe op die Potchefstroomkampus van die Noordwes-Universiteit (NWU) ontwerp om leerders op laer- en hoërskool met die praktiese sy van wetenskaplike vakke te help.

Dié toestelle word ook met groot vrug in Noorweë en Ethiopië gebruik.

Prof Corrie du Toit, en sy kollega, me Marié du Toit, het in 2001 ʼn kompakte en bruikbare chemie- en natuurwetenskappe-toestel (MyLab) ontwikkel vir wetenskaponderrig in graad 4 tot 12.

Dié stelle kan volgens prof Corrie, afgetrede dosent in wetenskap, ʼn reuse bydrae lewer tot suksesvolle wetenskaponderrig by selfs skole wat oor geen laboratoriums beskik nie.

Onlangs is berig dat die getal skole met wetenskap-laboratoriums tussen 2006 en 1011 met sowat 35% afgeneem het.

NWU-rekenmeesters laat die syfers mooi klop

Institusionele Kantoor - Met inagneming van die getal studente en die slaagsyfer van 88%, het die pas afgestudeerde geoktrooieerde rekenmeesterstudente van die Noordwes-Universiteit (NWU) in 2012 beter as ooit tevore gevaar in die Deel 1-nasionale kwalifiserende eksamen van die Suid-Afrikaanse Instituut van Geoktrooieerde Rekenmeesters (SAIGR).

Dié slaagsyfer was heelwat hoër as die land se gemiddeld van 78%. In ʼn vraag oor Finansiële Bestuur en Bestuursrekeningkunde het die NWU se studente die beste in die land gevaar. Daarmee het hulle voortgebou op die prestasies van vorige NWU-studente wat in die verlede reeds verskeie kere in verskillende vakke die beste in Suid-Afrika was.

Akademiese mobiliteit versterk hoër onderwys in Afrika

Institusionele Kantoor – Die Noordwes-Universiteit (NWU) is een van agt vennote wat aan die Afrika-, Karibiese- en Stille Oseaan-staatsgroepprojek (ACP-projek) vir akademiese mobiliteit, wat deur die Europese Unie befonds word, gaan deelneem.
Hierdie uitruilprogram moedig die uitruil van kennis, vaardighede en ervarings tussen vennoot-universiteite deur middel van omvattende beurse aan.

Die agte vennote is Ardhi (Tanzanië), Buea (Kameroen), Hawassa (Ethiopië), Makerere (Uganda), KNUST (Ghana), NWU (Suid-Afrika), Politegnikum van Namibië (Namibië) en die Universiteit van die Vrystaat (Suid-Afrika).

Toppresteerders in bestuursprogramme deur PBS aangewys

Potchefstroomkampus - Die Potchefstroom Besigheidskool (PBS) se Uitvoerende Leerprogram se jaarlikse sertifikaat-toekenningsgeleentheid het vanjaar weer plaasgevind op Vrydag, 16 Maart by die Quest Konferensiesentrum in Vanderbijlpark.

Verskeie sertifikate vir die beste prestasies op die verskillende vakgebiede is tydens hierdie formele seremonie aan graduandi oorhandig.

Die beste algehele presteerder in die Gevorderde Bestuursprogram was mnr Marius Forbes, bemarkingsbestuurder van Noordfed (ʼn affiliaal van die NWK-groep) in Lichtenburg. Marius het altesaam vyf onderskeidings behaal.   

Die Gevorderde Bestuursprogram spog ook met 27 kandidate wat dié program onder leiding van me Retha Scholtz suksesvol voltooi het en altesaam 16 onderskeidings is vir 2011 behaal.

Ry-'n-fiets-projek skop af op kampus

• Ooreenkoms met Vlaamse Stigting vir Verkeerskunde

Die Fakulteit Opvoedingswetenskappe het onlangs ‘n Ry-‘n-fiets-projek op die Potchefstroomkampus bekendgestel as deel van ‘n “groener” kampus.

Die fasiliteit is deel van ‘n projek, Mobiliteit en die Omgewing, wat deur die Vlaamse Stigting vir Verkeerskunde (VSV) geborg word. Die projek het twee bene, naamlik die gratis beskikbaarstelling van fietse om op kampus te beweeg en ‘n navorsingsprojek oor die fisiese impak wat fietsry om die menslike liggaam het.

‘n Aantal fietse is aangekoop en word gratis aan studente en personeel beskikbaar gestel om vinnig van een punt na ‘n ander op die kampus te beweeg. Die fietse is voor die Ampie-kiosk naby die ou POK-hoofgebou (C6) geparkeer.

Ondernemingsontwikkeling-sentrum – 'n hupstoot vir entrepreneurskap

Vanderbijlpark – Die Fakulteit Ekonomiese Wetenskappe en Inligtingstegnologie op die Vaaldriehoekkampus van die Noordwes-Universiteit (NWU-Vaal) loods 'n Ondernemingsontwikkeling-sentrum (OOS) in die Vaaldriehoek. Die OOS se tuiste sal op die Vaaldriehoekkampus van die NWU wees en is daarop gemik om beginner- of gevestigde entrepreneurs te bemagtig.

Entrepeneurskap word as die hoeksteen van alle toekomstige ekonomiese en maatskaplike ontwikkeling in Suid-Afrika beskou. Deur innovasie skep entrepreneurs nuwe en kompeterende markte en besighede wat op hulle beurt tot werkskepping lei en 'n vermenigvuldigingseffek op die ekonomie het.  

NWU se Mafikengkampus floreer

Agt jaar na die Universiteit van Noordwes met die Potchefstroomse Universiteit vir Christelike Hoër Onderwys saamgesmelt het en die Sebokengkampus van die voormalige Vista Universiteit geïnkorporeer is, toon die Mafikengkampus van die Noordwes-Universiteit besondere sukses en groei in 'n landskap met geweldige uitdagings.

Vanjaar het Mafikengkampus se studentegetalle tot 'n rekord 9 110 gegroei, 2 333 hiervan is eerstejaars en 'n verdere 1 162 studeer nie op die kampus nie. Van die eerstejaarstudente is 718 vir kursusse in die Fakulteit Geestes- en Maatskaplike Wetenskappe ingeskryf terwyl die res by die ander vier fakulteite studeer.

NWU vier voortreflike onderrigvaardighede

Me Stefanie-Marié (Stef) Esterhuizen van die Skool vir Opvoedkundige Wetenskappe in die Fakulteit Geesteswetenskappe op die Vaaldriehoekkampus het in 2011 die beste gevaar in die uitdagende Institusionele Toekennings vir Onderriguitnemendheid-proses (ITOU-proses).

Vir hierdie prestasie het sy die Visekanselier-prestigetoekenning ontvang tydens ʼn gala-geleentheid wat op 2 Maart 2012 in Potchefstroom gehou is. Dr Theuns Eloff, die visekanselier van die NWU, het ʼn wisseltrofee aan haar oorhandig.

Stef is die algehele wenner vir 2011, en uiteraard ook een van die drie kampuswenners. Die ander twee is dr Ralph Manyane van die Fakulteit Geestes- en Sosiale Wetenskappe op die Mafikengkampus en mnr Pieter van der Zwan van die Fakulteit Ekonomiese en Bestuurswetenskappe op die Potchefstroomkampus.