NWU-atlete oorwin Comrades

Die sweet het afgetap, die bene het gebewe en elke greintjie uithouvermoë was vir 89 km ingespan. Vir 15 atlete van die Noordwes-Universiteit (NWU) was daar egter ʼn soete beloning ná al dié inspanning: die reg om te kan sê “Ek het die 2012 Comrades-marathon voltooi.”

Mnre James Botha, Fanie Swanepoel, Cliff Wallace, Koos Degenaar, Henro Erasmus, Kaizer Phakathi, me Hilde Kemp, mnr Willie Lubbe, mnr Ockie de Kock, mnr Werner Coetzee, me Erichia Nel, mnr Ettiene Pretorius, mnr Stefan Pienaar, mnr Jaco Barnard en me Rika Huyser het almal hul moeë lywe voor die afsnytyd verby die eindpunt gekry.

Was dit nie vir ʼn geskeurde kuitspier wat hy tydens die marathon opgedoen het nie sou mnr Paul Harmse hom ook in bogenoemde groep bevind het.

Jaco Barnard het die roete die vinnigste voltooi in ʼn tyd van 07:23:37.

NWU-rekenmeesters laat die syfers mooi klop

Institusionele Kantoor - Met inagneming van die getal studente en die slaagsyfer van 88%, het die pas afgestudeerde geoktrooieerde rekenmeesterstudente van die Noordwes-Universiteit (NWU) in 2012 beter as ooit tevore gevaar in die Deel 1-nasionale kwalifiserende eksamen van die Suid-Afrikaanse Instituut van Geoktrooieerde Rekenmeesters (SAIGR).

Dié slaagsyfer was heelwat hoër as die land se gemiddeld van 78%. In ʼn vraag oor Finansiële Bestuur en Bestuursrekeningkunde het die NWU se studente die beste in die land gevaar. Daarmee het hulle voortgebou op die prestasies van vorige NWU-studente wat in die verlede reeds verskeie kere in verskillende vakke die beste in Suid-Afrika was.

Ry-'n-fiets-projek skop af op kampus

• Ooreenkoms met Vlaamse Stigting vir Verkeerskunde

Die Fakulteit Opvoedingswetenskappe het onlangs ‘n Ry-‘n-fiets-projek op die Potchefstroomkampus bekendgestel as deel van ‘n “groener” kampus.

Die fasiliteit is deel van ‘n projek, Mobiliteit en die Omgewing, wat deur die Vlaamse Stigting vir Verkeerskunde (VSV) geborg word. Die projek het twee bene, naamlik die gratis beskikbaarstelling van fietse om op kampus te beweeg en ‘n navorsingsprojek oor die fisiese impak wat fietsry om die menslike liggaam het.

‘n Aantal fietse is aangekoop en word gratis aan studente en personeel beskikbaar gestel om vinnig van een punt na ‘n ander op die kampus te beweeg. Die fietse is voor die Ampie-kiosk naby die ou POK-hoofgebou (C6) geparkeer.

Prof Louis Kotzé ontvang gesogte NNS-graderingstoekenning

Institusionele Kantoor – Prof Louis Kotzé van die Noordwes-Universiteit se Fakulteit Regte op die Potchefstroomkampus is vir die gesogte NNS-graderingstoekenning aangewys.

Die internasionale eweknie-evaluering het prof Louis vir die P-kategorie aangewys wat beteken dat hy internasionaal erken word vir die potensiaal om 'n toekomstige leier op sy gebied te word op grond van die buitengewone potensiaal wat hy as 'n navorser regdeur sy doktorale en nadoktorale loopbaan getoon het.