ALUMNI 

Oor ons

Daar is talle redes om met u alma mater kontak te behou nadat u ’n graad behaal het. Dit sluit in dat u deel kan wees van ’n wêreldwye netwerk van NWU-alumni wat u opvoedkundige agtergrond deel, dat u toegang kan hê tot die Alumni-loopbaanpoort en die geleentheid kan hê om tot die toekomstige ontwikkeling van die NWU by te dra.

Die Universiteit het twee hoofkanale waardeur kontak met alumni behou word: die Alumnivereniging en die Konvokasie.

Konvokasie

Die Konvokasie is ’n formele struktuur wat die welsyn van die Universiteit bevorder en sy sake aktief deur verteenwoordiging op die NWU-Raad beïnvloed. Vier lede van die Raad kom uit die Konvokasie en word vir hierdie doel deur die Konvokasie verkies. Die liggaam werk ook nou saam met ander NWU-strukture soos die Alumnivereniging, wat graag die interaksie tussen die Universiteit en sy alumni wil bevorder.

Elke gegradueerde van die NWU of sy voorgangers het die reg om aan die Konvokasie te behoort, om genomineer te word om die Konvokasie op die Raad te verteenwoordig en om vir sy lede op die Raad te stem. Lidmaatskap van die Konvokasie is ook oop vir alle vorige en huidige permanente personeellede van die Universiteit.

Alumnivereniging

Die NWU-Alumnivereniging is ’n vleuel van die Konvokasie en bevorder lewenslange skakeling tussen alumni en die Universiteit. Die Vereniging het ’n Alumnikantoor op elkeen van die drie kampusse. Hierdie kantore reël alumnibyeenkomste, van reünies tot gholfdae, en hou lede op hoogte van belangrike verwikkelinge by die Universiteit.

Elkeen wat ’n diploma of graad aan die NWU (of sy voorgangers) verwerf het, kan ’n lid van die Alumnivereniging word. Die vereniging verwelkom ook die lewensmaats van alumni as medelede, asook individuele donateurs wat nie aan die NWU studeer het nie. Medelede het dieselfde regte en voorregte as ander lede.

Einde 2009 het daar nie ‘n nuusbrief verskyn nie – ‘n glansblad Alumnitydskrif het die lig gesien.  Klik hier om die tydskrif te besigtig.