Aankondigings

Aankondigings

Belangrike maatreëls: Reis na en van China (Coronavirus)

10 Februarie 2020

Die NWU sal tot en met verdere kennisgewing geen amptelike studentebesoeke aan China (en enige ander geaffekteerde lande soos en wanneer hierdie lande geïdentifiseer word), toelaat nie.

In die geval van privaat besoeke aan China (en enige ander geaffekteerde lande soos en wanneer hierdie lande geïdentifiseer word), moet die student die relevante kampus se direkteur vir studentelewe voor die besoek in kennis stel, en ook die datum deurgee wanneer hy/sy verwag om terug te keer. Hierdie studente moet met hul terugkeer na Suid Afrika hul relevante kampus se Beroepsgesondheidsentrum in kennis stel, en die kampus vir 14 dae vermy. 

Dit is van toepassing op ALLE kontakstudente en afstandstudente (in die geval waar ʼn afstandstudent ʼn spesifieke kampus vir een of ander rede moet besoek).

Lees meer oor die Coronavirus

 

Vorige aankondigings:

 

Mahikeng-KSR-memorandum met eise, gedateer 29 January 2020

31 Januarie 2020

Die memorandum met eise wat op 29 Januarie 2020 aan lede van die UBK gestuur is, wat op 31 Januarie 2020 herroep is, verwys.

Vind hiermee die skriftelike reaksie op sake wat aangeraak is.


Heropening van Mahikengkampus

30 Januarie 2020

Die Mahikengkampus is op Maandag 27 Januarie gesluit toe die veiligheid van die personeel en studente in gedrang was. Maatreëls om die veiligheid van ons personeel en studente te verseker is nou in plek gestel.

Die kampus sal vanaf môre, 31 Januarie, tot Sondag 2 Februarie oop wees om studente toe te laat om te registreer en om verblyf toe te ken.

Die akademiese program en klasse sal soos beplan op 3 Februarie begin. 

Ons sien uit na ’n suksesvolle akademiese program vir al ons studente vir 2020.
 


Sluiting van die Noordwes-Universiteit (NWU) se kampus in Mahikeng as gevolg van voorvalle van geweld

28 Januarie 2020

Die NWU se bestuur is uiters besorg oor die voorvalle van geweld op ons kampus in Mahikeng. In solidariteit met die beroep deur die South African Union of Students (SAUS) om kampusse regoor die land te sluit, het ’n groep studente sedert gisteroggend (27 Januarie) mense gekeer om die kampus binne te gaan.

Gedurende die aand van 27 Januarie het ’n groep senior studente ander studente aangerand en universiteitseiendom beskadig. Hierdie onaanvaarbare optrede is by die Suid-Afrikaanse Polisiediens (SAPD) aangemeld en ’n saak van aanranding is ook by die Mmabatho-polisiestasie aanhangig gemaak. Die veiligheid van studente en personeel op die kampus is toenemend in gevaar. Die universiteitsbestuur het dus, na raadpleging met die betrokke belanghebbers, insluitend die SAPD, besluit om die kampus tot verdere kennisgewing te sluit om die veiligheid en sekuriteit van belanghebbers te verseker. 

Alle studente word versoek om die kampus teen Dinsdag 28 Januarie om 15:00 te ontruim.  

Die ontwrigtende optrede het reeds ’n negatiewe impak gehad op ’n aantal dienste, insluitend die registrasie van eerstejaars en terugkerende studente, en ook die bystand aan NSFAS-studente wat op finansiële goedkeuring wag.

Ons betreur die ongerief vir al ons belanghebbers en herhaal ons verbintenis tot veiligheid en ’n omgewing wat onderrig en leer, navorsing en ’n studentelewe van betrokkenheid bevorder. 

Vriendelike groete
Prof Dan Kgwadi
Hoof en Visekanselier  


Verwagte voortgaande protesaksie op die Mahikengkampus

27 Januarie 2020

As gevolg van die verwagte voortgaande protesaksie deur studente op die Mahikengkampus, sal normale aktiwiteite op die kampus nie kan voortgaan op 28 Januarie nie.

Ons is jammer vir die ongerief aan ouers, studente en ander belanghebbers van die universiteit, aan wie nie aandag gegee kon word nie, en ook wie ander reëlings moes tref.

Bestuur beklemtoon sy verbintenis daartoe om aan ons studente en ander belanghebbers die nodige diens en ondersteuning te verskaf.


Vriendelike groete
Prof Dan Kgwadi
Hoof en Visekanselier  

Aktiwiteite sal normaal voortgaan op die Vanderbijlparkkampus

27 Januarie 2020

Alle aktiwiteite op die Vanderbijlparkkampus sal op 28 Januarie 2020 hervat word. Eerstejaars en terugkerende studente wat weens die protesoptrede nie vandag kon registreer nie, word versoek om op 28 Januarie aan te meld op kampus om met die proses te begin. Registrasie van studente wat aanvanklik vir 28 Januarie geskeduleer is, sal voortgaan soos beplan. 

Vriendelike groete
Prof Dan Kgwadi
Hoof en Visekanselier  

Protesaksie: Mahikeng- en Vanderbijlparkkampus

27 Januarie 2020

Neem asseblief kennis dat, as gevolg van protesaksies deur studente op die Mahikeng- en Vanderbijlparkkampus as deel van die nasionale versoek om massa-aksie (deur die Suid-Afrikaanse Unie vir Studente - SAUS), is personeel op hierdie kampusse in kennis gestel om nie vandag vir diens aan te meld nie.
Geen voorvalle van geweld is aangemeld nie, maar studente verhoed persone om die kampusse te betree.

As gevolg hiervan, mag dienste op hierdie kampusse negatief geraak word.

Vriendelike groete
Prof Dan Kgwadi
Hoof en Visekanselier  


Aankondigingsargief

Aankondigingsargief 2019

Aankondigingsargief 2018

Aankondigingsargief 2016/2017